Read Thado Chin 1 Thusimbu 10 Bible Online

1 Thusimbu 10 - Thado Chin bible

1 Thusimbu 10

¹Tun Philistine ten Israelte ahinsatnun; Israel mite chu Philistine te masanga ajam taovin, chule Gilboa molsanga chun mi tamtah athiuvin ahi.

²Chule Philistine ten Saul le achate chu hadelin adelun; hitichun Philistine te chun Saul chapate Jonathan, Abinadab, chule Malchishua chu athat taovin ahi.

³Chuin gal chu Saul dingin ahahsalheh jengtan, chuin thal themhon ahinkap khauvin, thalthem hon amavotaovin ahi.

⁴Chuin Saul'in agalvon popa jah-a, Nachemjam satdoh inlang, hiche cheptan louho khu ahunguva eihung jumso louna dingun, neisun pailet jenggin, ati. Ahivangin agalvon popa chu anompoi; ajehchu ama akichalheh jengin ahi. Hijeh chun Saul'in achemjam alan, achung chu abotan ahi.

⁵Chule agalvon popan Saul athi amuphatnin, chutobang machun achemjam chungchu abon, athitan ahi.

⁶Hitichun Saul le achapate thum, chule a-insung jouse chu athikhom taovin ahi.

⁷Chuin phaichama um Israel miho jousen, amaho ajamuva, chule Saul le achapate athiu chu amu phatnun, akhopihou adalhauvin ajamtaovin ahi. Chuin Philistine te ahungun, hicheho-a chun acheng taovin ahi.

⁸Chuin ajingin ahitin ahi, Philistine te mithiho von sutlha dinga ahunguva ahile, Saul le achapate Gilboa molsanga anathiu chu amudoh taovin ahi.

⁹Chuin avon asutlhah phatnun, aluchang le agalvon alauvin, amilim semthuhou le mipite henga thupha pole dingin Philistine te gamsunga athot kimvel taovin ahi.

¹⁰Chule agalvonho chu a-pathen houin'a akoijun, aluchu Dagon houin'a atah-un ahi.

¹¹Chuin Jabesh-Gilead mite jousen Saul chunga Philistine te thilbol jouse ajah phatnun,

¹²Mihangsan sese akipatnun, Saul le achapate longchu agalamangun, Jabesh'a ahinpouvin, aguhou chu Jabesh'a gangpi thing noija chun avuijun, chule nisagi an angolun ahi.

¹³ Hitichun Saul chu Pakai thu angailou jeh le, lhakou ho henga thumop adoh-a, Pakai douna suhkhelna aneitah jeh-in athitan ahi;

¹⁴Chule aman Pakai adongpon: hijeh chun aman ama chu athatnin, chule alenggam chu Jesse chapa David henga apetan ahi.