Read Thado Chin 1 Thusimbu 11 Bible Online

1 Thusimbu 11 - Thado Chin bible

1 Thusimbu 11

¹Chuin Israelte jouse David henga Hebron'a ahung kikhom khomun, ahenga, Ven keiho nagule naphe kahiuve.

²Chujongle tumasanga Saul lengchanlaijin jong Israel puidoh'a puilutjia chu nangma nahin: chule Pakai na Pathen'in naheng-ah, Nangman kami Israelte navah-a, kamipi Israelte chunga vai napoh ding ahi, ati'e atiuvin ahi.

³Hijeh chun Israel upaho jouse Hebron'a lengpa henga ahungun; David'in Hebron'a chun amahotoh Pakai masanga kitepna asemin; chuin Pakaiyin Samuel mangcha asei thucheng dung juijin, David chu Israel chunga leng hidingin thao anutaovin ahi.

⁴ Chuin David le Israelte jouse Jerusalem'a acheuvin, hichu Jebus ahin; chuche gama anachengho chu Jebus mite ahiuve.

⁵Chuin Jebus'a chengho chun David hengah, Nangma hilama nahunglou helding ahi, atiuve. Ahijeng vangin David'in Zion kulpi chu alan, hichu David khopi ahung hitai.

⁶Chuin David'in, Koihile Jebus mite gasat masapen pen chu lamkaiho pipui hiding ahi, ati. Hitichun Zeruiah chapa Joab chu akontou masapenin, apipuipen ahitan ahi.

⁷Chuin David chu kulpi-a chun achengin; hijeh chun amahon hichu David khopi asahtaovin ahi.

⁸Chuin aman khopi chu Millo'a pat akimvelse geijin asadoh-in; chule Joab'in khopi amohse chu asemphan ahi.

⁹Hitichun janel Pakaiyin aumpi jeh chun; David akhangtou chehcheh jengtan ahi.

¹⁰Hicheho hi Israelte chungchanga Pathen'in anaseidoh dungjuija David'in anei mihat pipuiho, alenggam sunga ama le Israel pumpi to kisuhat hochu ahiuve.

¹¹Chule hichehi David'in anei mihat jat ahi: gal lamkaiho pipuipen Hachmon mi Jashobeam ahin: aman atengcha alamin phat khatseh'in mi jathum jen athatgam helin ahi.

¹²Chule ama bana chu Ahoh mi Dodo chapa Eleazer ahin, amahi mihat thumho lah-a khat ahi.

¹³Ama David toh Pasdamim'a umkhom ahin, chule hiche mun'a chun Philistine te galsat dingin anakikhom khomun, chule hiche mun'a chu sakol chang dimsetna akena leiset beh khat aumin ahi. Chuin mipi ho chu Philistine te masanga konin ajamtaove.

¹⁴Chuin amaho chu loulaija chun dettah-in apangun, ahuhdoh-un, chule Philistine te chu athatnun; chule Pakaiyin amaho chu huhdohna loupitah-in ahuhdohtai.

¹⁵Tun gal lamkai somthum lah-a mi thum chu, songpi lama Adullam songko sunga David henga chun achesuh-un; chule Philistine sepai janel chun Rephaim phaichama chun pon in akison uvin ahi.

¹⁶Chule hichepetna chu David kulpi-a uma ahin, chule Philistine te galsat miho chu Bethlehem'a pansaova ahi.

¹⁷Chuin David'in ngaicha tah-in, Oh Bethlehem kotpi phung twikul'a twi chu dondinga eipethei khattou umtave leh! ati.

¹⁸Chuin mi thumho chun Philistine sepai janel chu aphu vangun, Bethlehem kotpi phung twikul'a konin twi agakhaijun, ahin domun, David henga ahinchoijun ahi: ahinla hiche donding chu David anompon, ahinla Pakai henga asunglha jon,

¹⁹Hitin ati, Hiche kabolding hi ka Pathen'in eijahda maihen: ahinkhou tosetna-a dinga pedoh hiche miho thisanhi kadon dingham? Ajehchu ahinkhou tosetna puma ahinchoiju ahi, ati. Hijeh-a chun aman adon tapon ahi. Hichehohi mihat chungnung thumho bol ahi.

²⁰Chule Joab sopipa Abishai hi thumho pipui ahi: ajehchu aman mi jathum chunga atengcha alamin, athat gamhelin, thumho lah-a minphatna achangtai.

²¹Mi thumho lah-a chun ni teni sangin amachu ja-aumjon ahi; ajehchu ama alamkaiju ahi. Hijongle amasa mi thumho chu aphajoupoi.

²²Kabzeel kho-a mihangsan pa chapa Jehoiada chapa Benaiah chun tohdoh tampi aneijin; keipi bahkai tobang Moab mi ni athatnin; chule achesuh-in buhbang lhah laijin kokhuh sunga keipi bahkai khat jong athatnin ahi.

²³Chule aman milen pitah, tong nga-a sang Egypt mi khat athatnin; chule Egypt mipa chun ponkhong ho talhang tejen tengcha khat akichoi ahin; chule aman atenggol akichoijin ajonsuh-in, Egypt mipa khutna konchun atengcha asalhah peh-in, ama tengcha mama chun athattan ahi.

²⁴Hichehohi Jehoiada chapa Benaiah thilbol ahin; mihat chungnung thumho lah-a chun minphat achangtan ahi.

²⁵Veuvin, ama somthum lah-a jana achangin, ahin amasa mi thumho vang chu aphadehpoi; amachu David'in ama ngahtupho chunga apansah-in ahi.

²⁶Chujongle agalsat ho lah-a mihangsan ho chu, Joab sopipa Asahel, Bethlehem'a Dodo chapa Elhanan,

²⁷Haror mi Shammoth, Pelon mi Helez,

²⁸Teko mi Ikkesh chapa Ira, Anathoth mi Abiezer,

²⁹Hushath mi Sibbecai, Ahoh mi Ilai,

³⁰Netophah mi Maharai, Netophah mi Baanah chapa Heled,

³¹Benjamin chapate gama um Gibeah mi Ribai chapa Ithai, Pirathon mi Benaiah,

³²Gaash vadung ho-a cheng Hurai, Arbath mi Abiel,

³³Baharum mi Azmaveth, Shaalbon mi Eliahba,

³⁴Gizon mi Hashem chapate, Harar mi Shage chapa Jonathan,

³⁵Harar mi Sacar chapa Ahiam, Ur chapa Eliphal,

³⁶Mecherathmi Hepher, Pelon mi Ahijah,

³⁷Carmel mi Hezro, Ezbai chapa Naarai,

³⁸Nathan sopipa Joel, Haggeri chapa Mibhar,

³⁹Ammon mi Zelek, Zeruiah chapa Joab galvon popa Beroth mi Naharai,

⁴⁰Ithri mi Ira, Ithri mi Gareb,

⁴¹Hit mi Uriah, Ahlai chapa Zabad,

⁴²Reuben mi Shiza chapa Adina, Reuben mite gal lamkaipa le amatoh um somthum ho,

⁴³Maakah chapa Hanan, Chule Mithni mi Joshaphat,

⁴⁴Ashterath mi Uzzia, Aroer mi Hotham chapate Shama le Jehiel,

⁴⁵Tiz mi Shimri chapa Jediael le asopipa Jaha,

⁴⁶Mahav mi Eliel, chule Elnaam chapate Jeribai le Joshaviah chule Moab mi Ithmah,

⁴⁷Mesoba mi Eliel, Obed chule Jasiel ahiuve.