Read Thado Chin 1 Thusimbu 16 Bible Online

1 Thusimbu 16 - Thado Chin bible

1 Thusimbu 16

¹Chutichun amahon Pathen thingkhong chu ahin pouvin, David'in chuche dinga anason ponbuh lailung tah-a chun angauvin; chule Pathen angsunga govam thilto le chamna thilto atoh-un ahi.

²Chuin David'in govam thilto le chamna thilto aboljou phatnin, Pakai minin mipi ho chu phatthei aboh-in ahi.

³Chule Israelte amitakip apasal anumeijin, mitin changlhah tumkhat, saphehoi lhang khat, chule lengpitwi pai khat apecheh-in ahi.

⁴Chule aman Levi te mi phabep chu Pakai thingkhong masanga lhacha ding, thu ching ding, chule Israel Pakai Pathen thangvah le vahchoi dingin apansah-in;

⁵Pipui Asaph, chule amabana Zekeriah, Jeiel, Shemiramoth, Jehiel, Mattithiah, Eliab, Benaiah chule Obed-edom ahiuvin: chule Jeiel chu tumgingle selangdah thoding ahin, hinlah Asaph chu thih khutbeh bengin apangin;

⁶Thempu Benaiah le Jahaziel'in Pathen kitepna thingkhong masanga chun sumkon amutjing lhonin ahi.

⁷Chule hiche nikho chun David'in amasapen dingin hiche Pakai thangvahna la Asaph le asopite khutna apedoh-in ahi.

⁸Pakai henga vahchoina peuvin lang, aminin taovun, mihemte lah-a athilbol hetsah-un.

⁹Ahenga la saovin, Ahenga vahchoi La saovin, athil kidang bolho jouse seijun.

¹⁰Amintheng chu loupisah-un; Pakai holho lungthim kipah hen.

¹¹Pakai le ahatna holunlang; tanglouvin amai holjingun.

¹²Aman ana tohdohsa anatoh kidangho, athil kidangho, akamsunga athutanho chu geldoh-un;

¹³Vo nangho Israel chilhah asohte, vo alhentum nangho Jacob chate,

¹⁴Amachu Pakai i-Pathen'u ahin; athutanho chu leiset chung jouse-a aume.

¹⁵Akitepna chu a-itih-in geldoh jingun; khang sang sanga dinga athupeh thuho chu;

¹⁶ Abraham henga akitepna ngei le, Isaac henga akihahselna chu;

¹⁷ Chule hiche mama chu Jacob henga danthu-a dingin asudetnin; chule Israelte henga tonsotna kitepna dingin asuhdetnin,

¹⁸Ahenga, Canaan gam chu nangma dinga, nachan ding gouva kapeh ding nahi, ati.

¹⁹Nangho hiche gamahi lhomcha bou, tahbeh-a lhomcha bou khopem nahilaiju chun.

²⁰Chule amaho nam khatna kona nam khatna, lenggam khatna kona midang henga achele laijun,

²¹ Koiman adihlouva aboldiu aphalpon; chule amaho jeh-in lengho aphohsal jin;

²²Kathaonupa hi tongkha hih-un, chule kathemgao ho chunga khangse hih-un, atin ahi.

²³Leiset pumpin Pakai vahchoi La saovin: anitinin ahuhhingna phongjalun.

²⁴Aloupi na chu Pathen helou ho lah-a; chule anatoh kidangho chu namtin lah-a phongjalun.

²⁵Ajehchu Pakai hi loupitah ahin; loupitah-a choiat ding ahi: Ama Pathen dang jouse chung vuma ginding ahi.

²⁶Ajehchu miho pathen jouse chu milim bou ahin; Pakaiyin vang vanho asemin ahi.

²⁷Loupina leh jana ama-a aumin; thahatna le kipana ama munah aume.

²⁸Pakai henga peuvin, nangho phungtina miho, Pakai henga loupi na le thahatna peuvin.

²⁹Pakai henga aminto kithuh loupina peuvin: thilto hin choi jinlang a-angsung hungun; athenna hoina-in Pakai chu houvun.

³⁰Lei pumpi a-anga kichauvin; vannoi jong akilon louna dinga detding ahi.

³¹Vanho kipahhen lang leiset thanom hen: chule Pakai alengchang tai, tin miten namtin lah-a seijuhen.

³²Twipi le asunga umjouse ginglellul henlang: gamho le asunga umho jouse thanomuhen.

³³Chujou tengle gammang thing jousen Pakai anga la asahdoh dingu ahi, ajehchu ama leiset thutan dingin ahunge.

³⁴ Aw Pakai henga thangvahna peuvin; ajehchu ama aphan; ahepina atonsotnin aumjinge.

³⁵Chule nanghon, Vo eihuh hinguva Pathen, neihuhhing un, namin theng kathangvah uva, napachat na-a loupina kapeh theina dingun, neikhom khomun lang, Pathen helouho-a konin neihuh doh-un, tiuvin.

³⁶Israel Pakai Pathen chu atonsot atonsotnin nunnom hen, ati. Chuin mipi jouse chun AMEN, Pakai chu vahchoijun atiuve.

³⁷Chutichun aman Asaph le asopite cheng chu Pakai kitepna thingkhong masanga chun, niseh-a tohding angai dungjuija kitepna thingkhong masanga tanglouva kinbol jing dingin;

³⁸Chule Obed-edom toh asopite somgup le get, Jeduthun chapa Obed-edom chu Hosah toh kotngah-a pang dingin;

³⁹Chule thempu Zadok le asopite thempuho chu Gibeon'a um munsanga Pakai Houbuh masanga,

⁴⁰Aman Israelte ana thupeh, Pakai danthua kisun jouse dungjuija boldingle, tanglouva jingkah nilhah seh-a govam thilto maicham chunga govam thilto pejing dingin;

⁴¹Chule amaho chutoh Heman le Jeduthun, chule amin kiminkutna kilhengdoh adangho sese chu ahepina tonsotna aumjing jeh-a Pakai henga thangvahna pedingin;

⁴²Chule amaho chutoh Heman le Jeduthun chu sumkon ho le thihkhutbehho chule Pathen tumgingtheiho tumging dingin adalhan ahi. Chule Jeduthun chapate chu kotngah ahiuve.

⁴³ Chuin ami jouse chu a-inlam cheh-a akile taovin: chule David jong a-insung vangboh dingin akiletan ahi.