Read Thado Chin 1 Thusimbu 17 Bible Online

1 Thusimbu 17 - Thado Chin bible

1 Thusimbu 17

¹Chuin ahitin ahi, David chu a-in'a atoupetnin Nathan themgao jah-a chun David'in, Ven keima cedar thinga kisa in'a kachengin, ahivangin Pakai kitepna thingkhong chu pon in noija aumnalaije, ati.

²Chuphat chun Nathan'in David jah-a, Nalunga um jouse chu boljengin; ajehchu Pathen'in na-umpinai, ati.

³Chuin chuche jan mama chun ahitin ahi, Nathan henga Pathen thu ahung lhungin, hitin ati,

⁴Kasoh David henga chenlang hitin gaseijin, Pakaiyin hitihin aseije, Nangman kachenna ding in neisahpeh louding ahi;

⁵Ijeh-inem itile Israel kapuidoh nikho-a pat tuni geihin in'a kacheng khapon; ponbuh-a kon ponbuh, chule Houbuh khatna kon achom khatna kakichon lele bouvin ahi.

⁶Israelte jouse toh kachelena jouse-a, ka mipite vahdinga kathupeh Israel vaipoho khatpenpen jah-a chu, Ipidinga cedar thinga in neisahpeh lou uham, tia kasei khah em?

⁷Hijeh chun tun kasoh David jah-a hitia hi naseiding ahi, Janel Pakaiyin hitihin ati, kelngoihon lah-a kon, kelngoi nung najuina ngeija konin kami Israelte chunga leng dingin kapuidoh-in:

⁸Chule nachelena lam jouse-a kalhonpi jingin, namasanga konin namelmaho jouse kasatlhah peh-in, chule leisetna um miloupi tahtah ho min bangin namin kathansah tan ahi.

⁹Chujongle kami Israelte dinga munkhat kagonpeh ding, kaphulut uva, amaho amunuva cheng diu, chule kichonle talou dingu; chule abultil lai banga gitlouna chaten asuhgim kit tahlou dingu,

¹⁰Kami Israelte chunga vaihom dinga thutan ho kathupeh lai banga chu. Chujongle namelmaho jouse kasuhnempeh ding nahi. Chukit jongle Pakaiyin insung khat natundoh pehding ahi ti kaseipeh nahi.

¹¹Chule hunghiti ding ahi, nanikho ho ahung beija napu napate toh umkhom dinga nacheteng, nanunga nachilhah khat katundoh ding, amachu nachapate lah-a kon hiding; chule alenggam kaphudet ding ahi.

¹²Ama chun in eisahpeh ding, chule keiman tonsotna dinga alaltouna katundoh pehding ahi.

¹³ Keima apa kahiding, chule ama kachapa hiding: nangma masanga ana umpa-a kona kalahmang banga, ama-a kon kahepina kalahmang louding:

¹⁴Amavang atonsotna dinga ka insungle kalenggam sunga kachensah ding: chule alaltouna chu a-imatih chana dinga katundoh ding ahi, ati.

¹⁵Hiche thuho jouse dungjui le, hiche gaothil muho dungjuijin, Nathan'in David hengah aseitan ahi.

¹⁶Chuin David lengpa chu ahungin Pakai angah atouvin, hitin aseije, Vo Pakai Pathen, keima koi kahia, chule ka insunghi ipi hija, nangman hichangei jen neihinpui hitam?

¹⁷Ahinla vo Pathen, hichehi nangma mitmun thil neocha bou ahi nalaije; ajehchu nasoh insunga khonung peh sottah jouva hunglhung ding jong naseijin, chule vo Pakai Pathen, nangman keimahi dinmun sangtah nei miho tobangin neikoije.

¹⁸Nasoh najabolna chunga hi David'in nahenga ipidang aseibe thei nahlai ding ham? Ajehchu nangman nasoh hi nahenai.

¹⁹Vo Pakai, nasoh khohsahna jal le, nangmatah lunggel dungjuija, hiche thil loupiho jouse pihi hetsahna dinga, hiche thilloupitah jouse hi nabol ahi.

²⁰Vo Pakai, kakol uva kajah-u jouse dungjuijin nangma tobang koima aumpon, chule nangma tailoujong Pathen dang khatcha aumpoi.

²¹Chule nami Israelte tobanga Pathen'in amite hidinga aga lhatdoh, Egypt gama kona nahuhdoh namite-a dinga amasanguva kona namtin nanodoh-a, namin kithan nadinga thil kidangtah le loupitah nabolna nam khatbeh leiset chunga hi umkham?

²²Ajehchu nami Israelte hi tonsotna namite hidingin nasemtan; chule Pakai, nangma a-Pathen'u nahunghi tai.

²³Hijeh chun tun, Pakai, nasoh chung chang le a-insung chungchang thua nasei thil chu atonsotna dingin sudet inlang, chule naseisama bangin hinboltan.

²⁴Pakai janel Pathen hi Israel Pathen ahin, Israel Pathen ngeichu ahi: tia tonsotna namin choisanga aumna dingin kiphut det hen; chule nasoh David insunghi nangma angsunga phudetnin umhen.

²⁵Ajehchu vo ka-Pathen, nangman nasoh henga insung khat natundoh pehding ahi tin naseipeh tan ahi: hijeh-a chu nasohhin na-anga taona ding lungthim amu ahi.

²⁶Chule tun, Pakai, nangma Pathen nahin, chule hiche phatnahi nasoh henga nateppeh ahitai:

²⁷Hijeh chun tun, na-angsunga tonsotna a-umjing theina dingin, nasoh insung vangboh dinghi nalung lhaina hihen: ajehchu vo Pakai, nangman phatthei naboh ahitan, atonsot geija phatthei boh hiding ahitai, ati.