Read Thado Chin 1 Thusimbu 18 Bible Online

1 Thusimbu 18 - Thado Chin bible

1 Thusimbu 18

¹Tun hiche jouhin ahitin ahi, David'in Philistine te ajouvin, chule asunemin, chuin Philistine mite khutna konin Gath le akhopiho alatan ahi.

²Chule Moab ajouvin, Moab mite chu David soh-in apangtauvin, chule thilpehho ahinpouvin ahi.

³Chuin David Euphrates vadung geija alenggam tungdet dinga achena-a, Hamath langa Zobah lengpa Hadarezer chu ajoutan ahi.

⁴Chule David'in ama-a konin sakol kangtalai sangkhat, sakol chunga tou sepai sangsagi, chule keng sepai sangsomni ahin lan: chuin David'in kangtalai kai sakol ho jouse chu akeng asat baijin, alah uva konchun sakol kangtalai jakhat kaiding bou akhenin ahi.

⁵Chuin Damascus'a kona Syria miho Zobah lengpa Hadarezer kithopi dinga ahung phatnun, David'in Syria miho chu mi sangsomni le sangni athatnin ahi.

⁶Chuphatnin David'in Syria gamsung Damascus'a sepai atousah in; chule Syria miho chu David soh-in apanguvin, thilpeh ahin choijun ahi. Hitichun Pakaiyin David chu achenalam jouse ah avengbit jingin ahi.

⁷Chuin David'in Hadarezer soh ho chunga um sana lumho chu alan, Jerusalem'a ahinpo tai.

⁸ Chutobang machun David nin Hadarezer khopiho Tibhath le Chun akonin sum-eng atama tam ahinlan; hicheho-a chun Solomon'in sum-eng twikong le khom, chule sum-eng belho asemin ahi.

⁹Tun Hamath lengpa Tou'in Zobah lengpa Hadarezer sepaihon jouse David nin ajousohtai ti ajah phatnin,

¹⁰Hadarezer chu akisatpi-a ajotah jeh chun, ama chibai bohdingle kipapi dingin, achapa Hadoram chu David lengpa henga asolin ahi: (ajehchu Hadarezer le Tou chu ana kidou jingsa ahilhone) chule aman sana, dangka chule sum-eng um le bel namkim ahin solthan ahi.

¹¹David lengpan jong hicheho chutoh nam dangdang ho: Edom'a kon, Moab'a kon, Ammon chate-a kon, Philistine miho-a kon chule Amalek mite-a kona ahinpohho dangka le sanaho chu Pakai henga apedohtai.

¹² Chukalvalin Zeruiah chapa Abishai'in chi phaichama chun Edom mite Sangsom le sangget anathatnin ahi.

¹³Chule aman Edom'a sepai akoijin, Edom mite jouse chu David soh-in apangtauvin ahi. Hitichun Pakaiyin David chu achenalam chenga aveng bitnin ahi.

¹⁴Hitichun David Israel mite jouse chunga aleng changin, chule amipi jouse lah-a thudih le chondih na-in vai ahomin ahi.

¹⁵Chule sepai janel jouse chunga vaihoma chu Zeruiah chapa Joab ahin; chule Ahilud chapa Jehoshaphat chu thuching ahi.

¹⁶Chule Ahitub chapa Zadok le Abiathar chapa Abimelech chu thempu ahilhonin; chule Shavsha chu danthusun ahin;

¹⁷Chule Jehoiada chapa Benaiah chu Chereth mite le Peleth mite chunga vaibol ahin; chule David chapate vang lengpa kimvela pipuipen ahiuvin ahi.