Read Thado Chin 1 Thusimbu 21 Bible Online

1 Thusimbu 21 - Thado Chin bible

1 Thusimbu 21

¹Chuin Israelte dounan Satan adingdoh-in, Israelte simsah din David chu atildohtan ahi.

²Chuin David'in Joab le mipi vaipoho jah-a, Cheovin, Beersheba apat Dan geipeh-in Israel jat simunlang, kahet theina dingin kahengah ajatnu hin lhutnun, ati.

³Chuin Joabmin adonbutnin, Pakaiyin amite chu ajat jakhatna tamjon punsah hen: ahinla ka pakai lengpa, amaho chu ka pakaipa sohte ngen hilouham? Ipidinga ka pakaiyin hiche thilhi angaichat hija ham? Ipidinga ama Israel themmo channa hunghi dingham? ati.

⁴Ahijeng vangin lengpa thusei chun Joab chu ajoujotan ahi. Hijeh chun Joab akipatdoh-in Israel achonsoh keijin, Jerusalem'a ahungkile kit tai.

⁵Chuin Joab'in David hengah mipi asimdoh jat chu apei. Chule Israel lah-a chemjam lamthei cheh chu mi sang sangkhat le sangjakhat ahiuve: chule Judah lah-a chemjam lamthei cheh chu mi sangjali le sangsomsagi ahiuve.

⁶Ahivangin Levi le Benjaminte chu alah uva akisimtha poi; ajehchu lengpa thusei chu Joab dinga thet umtah ahije.

⁷Chule hiche thil la hin Pathen alunglhai tapon, hijeh chun Israel chunga jepna achuhsah tai.

⁸Chuin David'in Pathen hengah, hiche thil kabol jeh hin keima nasatah-in kachonse tai: ahin tun, nahenga katao ahi, nasoh khangit louna hi lamangtan; ajehchu ngolhoi tah-in kana chontai, ati.

⁹Chuin Pakaiyin David mitvah neipa, Gad henga thu ahin seijin, hitin ati,

¹⁰Chenlang David hengah hitin gaseijin, Pakaiyin hitihin aseije, keiman nangma thil thum kagonpeh-e: nachunga katoh theina dingin alah-a khat kilhenin gatin, ati.

¹¹Hitichun Gad chu David hengah ahungin, ajah-a, Pakaiyin hitihin ati, Nangman kilhenin,

¹²Kumthum kel lhah ham; ahiloule namelmate masanga lhathum sunga suhmanga naum ding, hiche sunga chu namelmate chemjamin nadelding; ahiloule nithum sunga gamsunga Pakai chemjam, hise ngeichu gamsunga uma, chule Pakai vantil'in Israel gamkol jouse asuhmang ding nalhenam. Hijeh chun tun, eihin solpa henga ipi thu kalhut dingham kilhen temin, ati.

¹³Chuphatnin David'in Gad jah-a, Keima kalung adonglheh jengtai: tun Pakai khutna lhalut jenging kate; ajehchu amihepina nasatah-in alenin ahi: mihem khutna vang neilhahlut sah hihbeh-in, ati.

¹⁴Hitichun Pakaiyin Israel chunga hise alansahtan, Israel lah-a mi sangsomsagi athi taovin ahi.

¹⁵Chule Pathen'in Jerusalem sumang dingin vantil asoltan: chule aman asuhmang laitah-in, Pakaiyin aven, chule thilse atohgotna konchun alung aheijin, asumang vantil henga chun, Aphasettai, tun nakhut tuhtang tan, ati. Chuin Pakai vantil chu Jebus mi Ornan phola chun adingtan ahi.

¹⁶Chuin David akhodah-in ahile, Pakai vantil chemjam kidopma Jerusalem lam nga-a, leile van kikah-a adin amutan ahi. Chuphatnin David le Israel upaho khaodippon kisila umho chu tolla abohkhup taovin ahi.

¹⁷Chuin Davidn'in Pathen hengah, Mipi ho simding thu pe-a chu keima kahi hilouham? Achonsea khanset bola chu keima ngeihi kahi; ahin hiche kelngoi ho vanghin ipi aboluvem? Vo Pakai ka Pathen, nahenga katao ahi, nakhut chu keimale kapa insungah chujohen; ahin hiche namite hin natset atona dingun chuhda hen, ati.

¹⁸Chujouvin Pakai vantil'in Gad hengah David chu achetouva, Jebus mi Ornan phola Pakai dinga maicham agasem nadinga David aseipeh dingin athupeh-in ahi.

¹⁹Chuin Gad'in Pakai mina aseibang chun David achetou tan ahi.

²⁰Chuin Ornan chu akinung heija ahile vantil chu amutan; chule akoma um achapa liho akisel taovin, ahin Ornan chun suhlouchang chu achil jingin ahi.

²¹Chuin David Ornan koma ahung laichun, Ornan'in ahinven ahile David chu amutan, chuin phola konchun achedoh-in, amai tolla asulutnin David anga chu abohkhuptan ahi.

²²Hitichun Davidn'in Ornan jah-a, Mipi lah-a kona natset atan theina dingin, hiche phol munhi Pakai henga maicham kasem theina dingin neipen; aman lhingsetna dinga neipeh ding ahi, ati.

²³Chuin Ornan'in David jah-a, Kilah jengin, chule ka pakai lengpan pha asah bang bangin boljeng hen; ven, govam thilto dingin bongchal, thing dingin changchilna manchah ho, chule anneh thilto dingin suhlouchang kapei: abonahi kapeh sohkei nahi, ati.

²⁴Chuin David lengpan Ornan jah-a, Ahipoi, aman lhingsetna kachohtei ding ahi: ajehchu nangma-a chu Pakaiya dinga kalah louding, imacha suhmang louva govam thilto kato louding ahi, ati.

²⁵Hitichun David'in Ornan chu chuche mun man ding chun sana shekel jagup-a gih apen ahi.

²⁶Chuin David'in chumunna chun Pakai dingin maicham asemin, govam thilto hole chamna thiltoho apen, Pakai henga ataovin ahi; chuin aman meijin van'a konin govam thilto maicham chunga chun ahindonbut nin ahi.

²⁷Chuin Pakaiyin vantil chu thu apen, chuin achemjam chu apaijah akhumkit tan ahi.

²⁸Chule David'in Jebus mi Ornan chang chilna phol mun'a Pakaiyin adonbut amu phatnin, hia chun ganlhaina aboltai.

²⁹Ajehchu gamthipma Mosi'n asem Pakai Houbuh le govam thilto maicham chu chuche petna chu Gibeon munsanga uma ahi.

³⁰Ahivangin hiche masanga chu Pakai dong dingin David ache ngampon ahi; ajehchu Pakai vantil chemjam jeh-a chu kicha-a ahi.