Read Thado Chin 1 Thusimbu 23 Bible Online

1 Thusimbu 23 - Thado Chin bible

1 Thusimbu 23

¹ Chuin David ahung teh-a akum ahung tamlheh phatnin, achapa Solomon chu Israel chunga leng dingin apansahtan ahi.

²Chule aman Israel pipuiho jouse chu thempuho le Levi ho toh akhomkhom soh keijin ahi.

³Tun Levi mite kum somthuma lhah achunglamse akisimin ahile: akisim dungjuijun mi pasal cheh sangsomthum le sangget alhinguve.

⁴Hicheho lah-a sangsomni le sangli hohi Pakai in kisah vetup ding ahiuvin; chule sanggupho chu milenho le thutan ho ahiuve.

⁵Chukalvalin sangli chu kotpi ngahho ahiuvin; chule sanglima chu Pakai vahchoi nadinga kasem manchah ho chu amanuva, Pakai chu avahchoi dingu ahi, tin David'in aseije.

⁶Chule David'in Levi chapate lah-a Gershon, Kohath chule Merari loi tin amaho chu aloi loijin akhenin ahi.

⁷Gershon mite-a kon Laadan le Shimei;

⁸Laadan chapate chu; apipen Jehiel ahin, Zetham, chule Joel, mi thum ahiuve.

⁹Shimei chapate chu; Shelomith, Haziel, chule Haran, mi thum ahiuve. Hiche hohi Laadan pate insung pipui ahiuve.

¹⁰Chule Shimei chapate chu; Jahath, Zina, Jeush, chule Beriah ahiuve. Hiche mili hohi Shimei chapate ahiuve.

¹¹Chule Jahath chu apipen ahin, Zizah anina ahi: ahinla Jeush le Beriah'in chapa tampi anei lhonpoi; hijeh-a chu amahohi apu apateu insung dungjuija insung khatna kisim ahiuve.

¹²Kohath chapate chu; Amram, Izhar, Hebron, chule Uzziel, mi li ahiuve.

¹³ Amram chapate chu; Aaron le Mosi ahi: Aaron vang chu amale achapate a-itih-a dinga thiltheng chung nungho chu sutheng dingle, Pakai anga gimnamtui halding, ama jending le, a-itih-a ama mina phatthei bohdinga khendoh ahiuve.

¹⁴Tun Pathen mi Mosi thudol chu, achapate chu Levi phunga kiminvo ahitaove.

¹⁵Mosi chapateni chu Gershom le Eliezer ahilhone.

¹⁶Gershom chapate lah-a pipui chu Shebuel ahi.

¹⁷Chule Eliezer chapate lah-a pipui chu Rehabiah ahin, chule Eliezer'in chapa dang himhim aneipon, Rehabiah'in vang chapa tamtah aneije.

¹⁸Izhar chapate lah-a pipui chu Shelomith ahi.

¹⁹Hebron chapate lah-a kon; amasapen Jeriah ahin, anina Amariah, athumna Jahaziel chule alina Jekameam ahi.

²⁰Uzziel chapate lah-a kon; amasapen Michah ahin, anina chu Jesiah ahi.

²¹Merari chapateni chu; Mahli le Mushi ahilhone. Chule Mahli chapateni chu; Eleazar le Kish ahilhone.

²²Chuin Eliezar chu chapa neilouvin athitan, chanuho bou aneijin: amaho chu asopiteu Kish chapaten akichenpiuvin ahi.

²³Mushi chapate chu; Mahli, Eder chule Jeremoth, mi thum ahiuve.

²⁴Hichehohi apu apateu insung dungjuija Levi chapate ahiuvin, a-insungu kisimna dungjuija kisimdoh, apu apateu lah-a pipui cheh, Pakai in'a kintheng bolna-a pang, kum somni-a lhah achunglamse ahiuve.

²⁵Ajehchu David'in, Israel Pakai Pathen'in amite chu Jerusalem'a atonsotna achentheina dingun choldona apei, atin;

²⁶ Chule Levi mite jah-a jong, Houbuh ahiloule kin bolna-a manchah dinga umle bel ho apohleu ngaitalou ding ahi, ati.

²⁷Ajehchu David thusei nukhahpenho dungjuija Levi mite chu kum somni apat achunglamse kisima ahiuve.

²⁸ Ajehchu atoh dingu chu, Pakai in lhacha natohna-a hongsungho le dansungho-a Aaron chapate kithopi ding, thil thengho jouse sutheng ding, chule Pathen in'a lhacha natoh toh ding;

²⁹Vetsah changlhah le anneh thilpeh ding changbong nel chung, cholsolou changlhah phengho chung, khangbela agoa kikangmin chule thaova kikangmin chung, chule atam alhom alet aneo chunga mopoh ding,

³⁰Chule jingkah nilhah seh-a, Pakai thangvah le vahchoina la sadinga dingding,

³¹Chule cholngah nikhoho, lhathah nikho ho, chule kut kitep nikho ho-a chu amaho tohding thu kipeh dungjuija, mijat chun Pakai henga govam thilto jouse, Pakai masanga abol jingjeng ding;

³²Chule Pakai in'a kintheng bolna-a asopiteu Aaron chapate akithopi ding, chule munthengle mipi Houkhom ho Houbuh vetupma pangding chu ahi.