Read Thado Chin 1 Thusimbu 28 Bible Online

1 Thusimbu 28 - Thado Chin bible

1 Thusimbu 28

¹Chuin David'in Israel pipuiho jouse, phung pipuiho, chule aphat kihop dungjuija lengpa nehle chah sutupma pang loi lamkaiho, asang sang chunga lamkaiho, aja aja chunga ja lamkaiho, chule lengpa neile gou jouse vetupma pang neiching ho, achapate le milen milal ho jouse, chule mihangsan ho jouse chu Jerusalem'a akoukhom sohkeijin ahi.

² Chuin David lengpa chu adingdoh-in, Kasopite le kamiteho, kathuseihi ngaijuvin, keiman Pakai kitepna thingkhong kicholdona ding le, i-Pathen'u kengto ngapna ding in sah ding kalungin kana ngaiton, in sahna ding jong kagongtoh soh hel tan ahi.

³Ahinla Pathen'in kajah-a, Nangman kamin dingin in nasah louding ahi, ajehchu nangma galsat mi nahin, thisanso mi nahije, ati.

⁴Hijeng jongle Israel Pakai Pathen'in kapa insung jouse lah-a atonsotna Israel leng hidingin eina lhengtan ahi; ajehchu aman Judah phunga kapa insung alhengin, chule kapa chapate lah-a konin Israel jouse chunga leng hidingin keima eina deilhentai.

⁵Chule kachapate jouse lah-a jong, (ajehchu Pakaiyin chapa tamtah einapen,) Israelte chunga Pakai leng laltouna-a tou dingin kachapa Solomon hi alhengtan ahi.

⁶Chule aman kajah-a, Nachapa Solomon, aman ka in le kahong sungho asah ding ahi; ajehchu amachu kachapa dinga kalhendoh ahitan, keima apa kahi ding ahi.

⁷Chujongle aman kathupeh ho le kathutan lhahho chu tunia banga hi anit jinga ahile, ama lenggam chu atonsotna dinga kasemdoh ding ahi, ati.

⁸Hijeh chun tun, Pakai mipi ho Israel jouse mitmule, Pathen jah tah-a kasei ahi, Pakai na Pathen'u thupeh ho jouse chu holunlang nitnun; chutile hiche gampha hi nalouva, nangho nunga nachateo goulo ding a-imatih chana dinga nadalhah peh thei dingu ahi.

⁹Chule nangma, kachapa Solomon, nangman napa Pathen hi hejingin lang, lungsung chamkimkei le lungthim thanom tah-in jenin; ajehchu Pakaiyin lungsung jouse akholin, lungsunga lunggel ho jouse jong ahesoh keije. Ama nahola ahile namu ding: amavang amachu nadalhah-a ahile, aman atonsotna dinga nanotthap ding ahi.

¹⁰Tun chingtheijin, ajehchu Pakaiyin muntheng sadinga nalhendoh ahitai: hatninlang hichu tongin, ati.

¹¹Chuin David'in achapa Solomon chu hongcha lim, in lim, asumkholna in lim, inchungdan lim, indan sungnung lim, chule hepi touna mun lim kigongho chu apen,

¹²Chule lhagaova kona agontoh lim jouse, Pakai in hongsung, chule akimvela indanho jouse, Pathen in'a goukhol khomna, chule akikatdoh thilho kholkhom lim chu apen;

¹³Chujongle thempuho le Levi mite aloi aloija aumna dingu mun limho, Pakai in'a kinbolna ding jouse limho, chule Pakai in'a kinbolna-a kimangcha ding um le bel limho jong,

¹⁴Kinbolna-a sana kimang ding jouse chu sana-a kisem din atedohpeh-in apen, kinbolna-a dangka kimang ding jouse jong chu akin jatna manchah dingin dangka atedohpeh-in;

¹⁵Sana meivah ho geijin, sana meivah khom ho ding, sana-a kisem meivah ho takip ding: chule dangka meivah ho ding jong atepeh cheh-in, meivah dingle ameivahkhom dingin jong, ameivah dungjuijin atedohpeh cheh-in ahi.

¹⁶Chule vetsahna changlhah dokhangho semna ding le dokhang jouse-a dingin sana ape-in; chule chutima chun dangka dokhangho semna ding dangka agih tesan apen ahi.

¹⁷Chujongle satul kaho ding, lhengkong ho ding, khonho dingin sana thengsel atepeh-in; chule sana kongdal ding ho-a dingin, sana kongdal khatcheh dingin sana tesan apen; chutobangma chun dangka kongdal khat khat ding jong dangka tesan apecheh-in ahi.

¹⁸Chule gimnamtui maicham ding sana kilha thengsel, chule Pakai kitepna thingkhong khukhum na-a alha jah Cherub kangtalai dingin sana apen ahi.

¹⁹David'in, Hicheho jousehi Pakaiyin ama khutna kachunga suttho-a, nakitoh dingdan lim jouse hi eihetsah ahi, ati.

²⁰Chule David'in achapa Solomon jah-a, Hatninlang hangsanin, chule hichu tongin; kicha hih-in, chule lung jong lungthoi hih-in; ajehchu Pakai Pathen, ka Pathen ngeichun naumpi ding; aman nalosam sah louding, Pakai in kinbolna natohho jouse nachaidoh kahse-a da jong nadalhah lou ding ahi.

²¹Chule ven, aloi aloija kihomtoh thempuho le Levi mite chun Pathen in'a kin kibolna jouse-a dinga naumpi jing dingu ahin; chule ipi kinbolna hijengjongle natohna jouse-a thanom tah natong themgil mihon naumpi dingu: chujongle pipuiho le mipi ho jouse chu nathupeh-a umdiu ahi, ati.