Read Thado Chin 1 Thusimbu 29 Bible Online

1 Thusimbu 29 - Thado Chin bible

1 Thusimbu 29

¹ Chukit jongle leng David'in mipi ho jouse jah-a chun, Pathen bouvin alhendoh kachapa Solomon hi achapang nalaijin ima ahenaipon, anatoh ding hila alen lheh jengin ahi. Ajehchu hiche leng inpihi mihem'a ding ahipon, Pakai Pathen'a ding ahi.

²Tun kahatna jousen ka Pathen in dingin sana-a kisem thilho dingin sana, chule dangka-a kisem thilho dingin dangka, chule sum-enga kisem thilho ding sum-eng, chule thih-a kisem thilho dingin thih, chule thinga kisem thilho dingin thing: Song engdang songho, setding songho, avahthei songho, ajem chomchom le song mantam jat chomchom, chule songkang atama tam kagotan ahi.

³Chukalvalin, ka Pathen in kangailut behseh jal-in, hiche in theng dinga kagot ho chungvumin jong, keima tuma dinga kanei sana le dangka jong ka Pathen in dingin kapen ahi.

⁴Abangho jephoina dingin Ophir sana, sana talent sangthum, chule dangka thengsel talent sangsagi;

⁵Amanchahna ding jat chomchoma natong themhon amanchah dingun, sana thil manchahna dinga manchah dingin sana, chule dangka manchahna dinga dangka kapen ahi. Ahile tunia Pakaiya natohna-a dinga kiphal tah-a kipenom koi umem? ati.

⁶Hitichun apu apateu pipuiho, chule Israel phungho lah-a pipuiho, chule sangkhat chungle jakhat chunga lamkaiho chun lengpa natohna-a vaipo sese toh kiphal tah-in,

⁷Chuin Pathen in sahna dingin sana talent sangnga le dram sangsom, chule dangka talent sangsom, chule sum-eng talent sangsom le sangget, chule thih talent sangjakhat apeuvin ahi.

⁸Chule song mantam neiho chun Gershon mi Jehiel khutna Pakai in gouthil kholkhom na-a dingin apeuvin ahi.

⁹Hitichun mipi ho chu Pakai dinga alung pumpiuva kiphal tah-a thil apehjeh-u chun athanom lheh jengun, chule leng David jong kipa mainah-in akipahpon ahi.

¹⁰Hijeh chun houkhom ho jouse masang-ah David'in Pakai chu avahchoijin: chule David'in hitin aseije, Kapu kapau Israel Pakai Pathen, nangma atonsot atonsotnin nunnom jingin.

¹¹ Vo Pakai, letna, thaneina, loupina, galjona, choi-atna jouse nanga ahi: ajehchu van'a le leija thil jousehi nangma-a ahin, Vo Pakai lenggam chu nangma-a ahin, ijakai chungvuma aluchang hidinga choisang nahi.

¹²Haonale jana agoma nanga hungkon ahin, chule nangma ijakai chungvuma vaihom nahi; chule nakhutna thilbol theinale thahat aumin; chule nakhutna mijouse dinga loupisah nading le thahat pehtheina aume.

¹³Hijeh chun tun, ka-Pathen'u, nangma kathangvah-un, namin loupi kavahchoi juve.

¹⁴Hijongle keimahi koi kahia, ka mipite jonghi ipi hiuva, hitobang khopma kiphal tah-a kapeh theiju hija ham? Ajehchu thil jousehi nanga hungkon ahin, chule nangma-a mama chu kahin lepeh kitnu ahibouve.

¹⁵Ajehchu keiho hi nangma angsunga kapu kapatehou jouse banga maljin le khopem bou kahiu ahi: chule leiset chunga kahinkhouhi le-lim tobang bou ahin, aumden ding imacha aumpoi.

¹⁶Vo Pakai ka Pathen, namin theng dinga in kasahpehna diuva, kakigot nao hiche thil hijatpi hi nangma khutna kon bou ahin, abonchan nangma-a ahi.

¹⁷Ka Pathen, nangman lungsunghi napatep jin, chondihna chunga nalunglhaije tijong kahei. Keijong kalungsung chondih na-in thilho jousehi hongphal tah-in nangma kanapetan: tun kipah tah-in namite hilaija umho hin kiphal tah-a nahenga athilpehhou kamutan ahi.

¹⁸Vo Pakai, kapu kapateu Abraham, Isaac chule Israel Pathen, hitobang lunggel hi namite lungthima a-itih-a aumjing theina dingin koijingin lang, nangman alungsungu gongtoh-in.

¹⁹Chule kachapa Solomon hin nathupeh ho, nathu hettohsah ho, nachon danho anitna, hicheho jousehi abolna ding le, chule kana ngaito in loupi hi asahthei nadingin lungsung phachamkim hinpen, ati.

²⁰Chuin David'in mipi ho jouse jah-a, Tun Pakai na Pathen'u chu vahchoijun, ati. Chuin mipi ho jouse chun apu apateu Pakai Pathen chu avahchoijun, chule akunun, Pakai le lengpa chu chibai aboh-un ahi.

²¹Chuin chuche nikho jou ajingin Pakai hengah ganlhaina asemun, chule Pakai henga govam thilto din bongchal sangkhat le kelngoichal sangkhat, chule kelngoinou sangkhat toh, donding thiltoho toh Israel pumpi dingin ganlhaina tampitah asemun ahi.

²²Chule hiche nikho chun kipah thanom tah-in Pakai angsunga chun aneuvin adontauvin ahi. Chule amahon David chapa Solomon chu anivei channa-in leng dingin asemkitnun, chule Pakai henga vaipo pipuipen hidingin thao anuvin, chule Zadok chu thempun asemun ahi.

²³ Hitichun Solomon chu apa David khelin Pakai laltouna-a chun lengin atoutan, chule akhangtouvin; chule Israelte jousen athu angaijun ahi.

²⁴Chule pipuiho jouse, mihangsan jouse, chule Leng David chapaho jouse jongchu leng Solomon henga chun akipelut taovin ahi.

²⁵Chule Pakaiyin Israel jouse mitmun Solomon chu nasatah-in achoisangin, chule Israel gamsunga ama masanga leng khatchan jong aneikhah louvu leng hina loupina achansah tai.

²⁶Hitichun Jesse chapa David chu Israel jouse chunga chun lengvai apon ahi.

²⁷ Ama Israel chunga alengchan sungchu kum somli ahin, Hebron'a kum sagi aleng changin, chule Jerusalem'a kum somthumle kumthum aleng changin ahi.

²⁸Chuin ama upatah le tehkem keijin, chule haotah le jabol changpumin athitan ahi; chule ama khelin achapa Solomon chu alengchang tan ahi.

²⁹Tun, David lengpa natohho abula patna achaina gei chu, veuvin, mitvahnei Samuel lekhabu le Nathan themgao lekhabu, chule mitvahneipa Gad lekhabu ho-a akisunsoh keijin,

³⁰Alengvai poh thu jouse le athahatje, chule ama chungle Israel chung, chule gamjousea lenggam jouse-a thilsoh jouse chu achongsoh keijin ahi.