Read Thado Chin 1 Thusimbu 5 Bible Online

1 Thusimbu 5 - Thado Chin bible

1 Thusimbu 5

¹ Tun Israel cha masapen Reuben chapate chu, ama chu (cha masapen hijeng jongle, apa jalkhun asuhboh tahjeh-in upa hina chu Israel chapa Joseph chapate chu kipe ahitan; chule akhanggui thu chu upa hina dungjuija kisut talou ding ahi.

² Ahin Judah chu asopite sangin achung nungin, hitichun ama-a konin vaipo pipu ahungkon doh-in: ahivangin upa hina chu Joseph'a hijaa hi.)

³Israel cha masapen Reuben chapate chu: Hanoch, Pallu, Hezron chule Karmi ahiuve.

⁴Joel chapate chu: achapa Shemaiah, achapa Gog, achapa Shimei,

⁵Achapa Micah, achapa Reaiah, achapa Baal,

⁶ Achapa Beerah, ama chu Assyria lengpa Tilgath-pilneser in gal hinga akaimangpa ahin; Reuben mite lamkaipa ahi.

⁷Akhangu khanggui thu akisutlaija a-inko ko-a asopihou lah-a pipui chu Jeiel le Zekeriah,

⁸Chule Aroer, Nebo le Baalmeon geija cheng Joel chapa, Shema chapa, chule Azaz chapa Bela ahi.

⁹Chule amaho chu solamsang Euphrates vadunglen'a pat gamthip ma lutnachan geijin anachengun ahi. Ajehchu Gilead gama chu agancha honu punglheh jenga ahi.

¹⁰Saul damlaijin Hagar mite toh akidouvun, amaho chu anajouvun, Gilead solam sese-a aponbuh uva anachengun ahi.

¹¹Chule Gad chu Bashan gamsunga Salcah changeijin amahotoh akigalsaijin achenge.

¹²Apipuiju chu Joel ahin, aban Sapham chule Bashan, Jaanai le Shaphat ahiuve.

¹³Apu apateu insunga asopihou chu: Michael, Meshullam, Sheba, Jorai, Jachan, Zia chule Heber; mi sagi ahiuve.

¹⁴Hichehohi Buz chapa, Jahda chapa, Jeshishai chapa, Michael chapa, Gilead chapa, Jaroah chapa, Hur chapa, Abihail chate ahiuve.

¹⁵Guni chapa, Abdiel chapa Ahi hi apu apateu insunga pipupen ahi.

¹⁶Amahohi Bashan gama Gilead le akhopihou, chule Sharon kimvel changeijin achengun ahi.

¹⁷Hicheho sesehi Judah lengpa Jotham nikholai le Israel lengpa Jeroboam nikholaija akhanggui thubu houva ana kisun ahi.

¹⁸Reuben chapate le Gad mite chule Manasseh phung kehkhat, mihang cheh, chemjam le lum thothei, thal kapthem le galdou them, galla kontheiho chu sangsomli le sangli le jasagi le somgup ahiuve.

¹⁹Chuin amahohin Hagar mite, Jetur, Naphish chule Nodab chunga gal abolun,

²⁰Chule amaho douna-in panpi achangun, Hagar mite le apankhompi jouse chu akhutnuva akipelut taove: ajehchu kidouna munna Pathen akou jeh uva aman ataonao asanpeh ahi. Ajehchu amahon Ama-a atahsanao angamun ahi.

²¹Hitichun aganchahou, asangonsangu sangsomnga, kelngoi sangjani le sangsomnga, sangan sangni, chule mihem sangjakhat akai mangun ahi.

²²Kidouna chu Pathen'a ahijeh-in mitamtah athiuvin ahi. Chule amaho gal hinga akikaimang kahseuvin agamuvah chun acheng taovin ahi.

²³Chule Manasseh phung kehkhat chate chu chua chun anachengun; Bashan'a kipat Baal-hermon le Senir chule Hermon mol geijin anapunguve.

²⁴Chule hichehohi apu apateu insunga apipupen cheh ahiuve: Epher, Ishi, Eliel, Azriel, Jeremiah, Hodaviah chule Jahdiel, amahohi mihatle hangsan, mi minthang le apu apateu insunga aluchang cheh ahiuve.

²⁵Chuin amaho apu apateu Pathen douna-in achonkhelun, amaho masanga Pathen'in anasuh mangsa, chuche gama miho pathenho chu ajon thanghoipi taovin ahi.

²⁶ Hijeh chun Israel Pathen'in Assyria lengpa Pul, hichu Assyria lengpa Tilgath-pilneser ahin; amachu ahintildoh-in, aman Reuben mite, Gad mite chule Manasseh phung kehkhat chu gal hingin akaijin; Halah, Habor, Hara chule Gozan vadunglen geijin ahinpuijin, tunigeijin achengden taove.