Read Thado Chin 2 Thusimbu 10 Bible Online

2 Thusimbu 10 - Thado Chin bible

2 Thusimbu 10

¹Chuin Rehoboam Schechem'a achen ahi: ajehchu Shechem'a chu ama leng chansah dinga Israelte jouse hunga ahiuve.

²Chuin ahitin ahi, Solomon lengpa-a kona jam-a Egypt'a ga um Nebat chapa Jeroboam'in hichu ajah phatnin, Egypt'a konin Jerusalem'a ahung kiletai.

³Chuin akou dingin mi asolun ahi. Hitichun Jereboam le Israelte jouse Rehoboam henga hungun,

⁴Napan kanamkol jonu agihsah behseh-in ahi: hijeh chun tun napan kachunguva angap sohthalah natoh hahsa le anamkol gihtah hi jansah domin lang, keihon nangma jennung kate, atiuve.

⁵Chuin aman ajah uva, Nithum joule kahenga hungkit taovin ati. Chuin mipi apotdoh taove.

⁶Chuin Rehoboam'in apa Solomon hinlaija amasanga dingjing tehse ho chu adopmin, Hiche mipihohi donbutna dinga ipi thumop neipeh diuham? ati.

⁷Chuin amahon ahenga, Hiche mipite hi nakhoto-a, nakipa sah-a, ahenguva thupha naseipeh-a ahile, a-itih-a nalhacha ding ahiuve, atiuve.

⁸Ahinla tehse hon athumopmu chu adondan, amatoh seilettha, amasanga dingjing khangdongho thumop chu alajon ahi.

⁹Chuin aman ajah uva, Napan kachunguva anangap namkol jonhi themkhat jansah domin tia kajah-a seija hiche mitekhu idonbut theinadiu ipi thuhil neinei uvem? ati.

¹⁰Chuin amatoh seilettha khangdongho chun ahenga, Napan kanamkol jonu agihsah ahin, nangin vang themkhat beh jansah-in tia nahenga sei mipi chu hitin donbutnin, Kamechahi kapa kong sanga sajo ding ahi.

¹¹Ajeh chu kapan namkol jon gihtah nachung uva angap ahin, keiman na namkoljon'u kabelap ding: kapan khaohola nanasuhgimu ahin, kenvang aipi-a kasuhgim ding nahiuve, tin seijin atiuve.

¹²Hitichun lengpan, Nithum nile hungun anati bangchun, nithum nin Jeroboam le mipi ho jouse chu Rehoboam henga ahungtaovin ahi.

¹³Chuin lengpan amaho chu gumtah-in anadonbutnin; chule Rehoboam lengpan tehse ho thumop chu adon tapon,

¹⁴Khangthah ho thumop dungjuijin, Kapan na namkol jonu agihsah ahin, kenvang kabelap ding; kapan khaohola nasuhgimu ahin, kenvang aipiho-a kasuhgim ding nahiuve tin adonbut tai.

¹⁵Hitichun lengpan mipi ho thu angaitapoi. Ajehchu Pakaiyin Shilon mi Ahijah amanchah-a, Nebat chapa Jeroboam henga anaseisa chu amolso theina dinga, hichu Pathen'in asosah ahitai.

¹⁶ Chuin lengpan athu-u angai pehlou chu Israelte jousen amuphatnun, mipin lengpa chu adonbutnun, David'a chu ipi chan kaneijum? Jesse chapa-a chun goulo imacha kaneipouve. Vo Israel, amitakipmin naponbuh cheh-u kijot taovin: chule tun, David, na-insung kivettan, atiuve. Hitichun Israelte jouse aponbuh cheh-a achetauve.

¹⁷Ahinla Judah gam khopiho-a cheng Israel chunga vang Rehoboam aleng changin ahi.

¹⁸Chuin Rehoboam lengpan kai vaipopa Hadoram chu asolin ahile Israel chaten amachu songin asepmun, athitai. Ahinla Rehoboam lengpa chu Jerusalem'a jamdingin asakol kangtalai ja atoudoh loitan ahi.

¹⁹Hitichun Israel'in tugeijin David insung adoujing taovin ahi.