Read Thado Chin 2 Thusimbu 11 Bible Online

2 Thusimbu 11 - Thado Chin bible

2 Thusimbu 11

¹Chuin Rehoboam Jerusalem'a ahung phatnin, lenggam chu Rehoboam henga puilut kit theina dinga Israelte satdin Judah le Benjamin insunga akilhengtum gal hatcheh mi sangsom le sangetjen akhomin ahi.

²Ahinla Pathen mipa Shemaiah henga chun Pakai thu ahung lhungin,

³Judah lengpa Solomon chapa Rehoboam le Juda gama cheng Israelte le Benjamin mite jouse henga,

⁴Pakaiyin hitin ati, Nangho nachetou loudiu, nasopiteu jong nagasat loudiu ahi: amitakip na-in cheh-a kileuvin: hichehi keimabol ahi, tin seijin, gatin ati. Chuin Pakai thu chu angaijun, Jereboam satdinga achegot uva konin akih taove.

⁵Chuin Rehoboam Jerusalem'a achengin, Judah gamsunga chun kihuhdoh nading khopi Kul asadoh-in ahi.

⁶Aman Bethlehem, Etam, chule Tekoa jengjong asadoh-in,

⁷Beth-zur, Shoco, chule Adullam,

⁸Gath, Mareshah, chule Ziph,

⁹Adoraim, Lachish, chule Azekah,

¹⁰Zorah, Aijalon, chule Hebron asadoh-in, hichehohi Judah le Benjamin gama um kulpinei khopiho ahiuve.

¹¹Kulho chu asudetnin, hicheho-a chun vaipo akoicheh-in, nehding le thao chule lengpitwi akholkhome.

¹²Chule khopi tina lumle tengcha ho akoicheh-in, dettah-in asemin, Judah le Benjamin chu ama lama pang ahi.

¹³Chule Israel gamsung jouse-a thempuho le Levi ho jouse agamkai cheh uva konin ahenga ahunguve.

¹⁴Ajehchu Jeroboam le achapaten Pakai dinga thempu na atoh naova kona ahaisah jeh uva, Levi ho chun agamule aumnao khopi kimvelse adalhah uva, Judah le Jerusalem'a hunguva ahi:

¹⁵ Chule aman munsang ho-a ding, thilhaho-a ding, chule abongnou semho-a dinga thempuho akisuhdet ahitai.

¹⁶Chule amaho nungchun Pakai Pathen holding lungput neija Israelte chu apu apateu Pakai Pathen henga ganlhaina boldingin Israel phung jouse-a konin Jerusalem'a ahunguvin ahi.

¹⁷Chuti chun Judah lenggam chu asuhatnun, kumthum sung Solomon chapa Rehoboam chu ahatsah uvin ahi: ajehchu amahon kumthum sung David le Solomon lampi ajotnun ahi.

¹⁸Chuin Rehoboam'in David chapa Jerimoth le Jesse chapa Eliab chanu Abihail chanu Mahalath chu aji dingin akipuijin ahi.

¹⁹Amachun chate, Jeush, Shemariah, chule Zaham ahinpeh-in ahi.

²⁰Amanu nungin Absalom chanu Maachah akichenpin, amanun Abijah, Attai, Zizah, chule Shelomith ahinpeh-in ahi.

²¹Chule Rehoboam'in Absalom chanu Maachah chu ajite jousele athaikemho lah-a angailu pene, (ajehchu aman ji somleget le thaikem somgup akipuijin; chapa somni le get le chanu somgup anei ahi).

²²Chuin Rehoboam'in Maachah chapa Abijah chu lenga semding agotjeh-in, asopite lah-a vaipo pipen dingin akoijin ahi.

²³Aman chingthei tah-in abolin, achate jouse chu Judah le Benjamin gamjouse khopi kulpi nei tina athecheh-in, nehding nengchetnin apen ahi. Chule amaho dingin ji tamtah agonpeh-e.