Read Thado Chin 2 Thusimbu 12 Bible Online

2 Thusimbu 12 - Thado Chin bible

2 Thusimbu 12

¹Chuin ahitin ahi, Rehoboam'in lenggam atundoh-a, ama hattah-a akisahdoh phatnin, amale aumpi Israelte jousen Pakai danthupeh chu anungsun taove.

²Chule ahitin ahi, amahon Pakai douna asuhkhel jeh uvin, Rehoboam lengchan kal kum nga lhina-in, Jerusalem satdingin Egypt lengpa Shishak chu ahung kontou tan,

³Sakol kangtalai sangkhat le jani le, sakol touthem sangsomgup toh ahung kontaovin: Egypt'a kona ahin kondohpi Lubim miho, Sukkiim miho, Ethiopia miho chu simjoulou ahiuve.

⁴Aman Judah gamsung kulpinei khopiho chu aban lah-in, Jerusalem'a ahungtai.

⁵Chuin Shishak jeh-a Jerusalem'a kikhom Rehoboam le Judah pipuiho henga chun Shemaiah themgao chu ahungin, ajah uva, Pakaiyin hitin aseije, Nanghon neinungsun taovin, hijeh-a chu kenjong Shishak khutna kadalhah-u nahitaove, tin Pakaiyin aseije, ati.

⁶Hichun Israel pipuiho le lengpa chu akineosah uvin, Pakai chu chonpha ahi atiuve.

⁷Chuin Pakaiyin akineosah-u chu amuphatnin, Shemai henga Pakai thuchu ahung lhungin, hitin aseije, Amaho akineosah taovin; hijeh chun sumang tapong ting, amavang akihoidoh nadiu themkhat kapeh ding ahi. Chule Shishak khutna kona Jerusalem chunga kalunghana kabuh lhah louding ahi.

⁸Hijeng jongle keima kinbol le lenggam dangho kinbol ahetkhen theina diuva, amaho ama soh-a pangdiu ahi, ati.

⁹ Hitichun Egypt lengpa Shishak'in Jerusalem ahungsatnin, Pakai in sunga gouho le leng in sunga gouho chu apomangin; aman Solomon'in anasem sana lumdal ho jong chu apomangtai.

¹⁰Hicheho khelchun Rehoboam lengpan sum-eng lumho akisemin, hiche chu leng in lutna kotngah vaipoho khutna akoitan ahi.

¹¹Chule lengpa Pakai in sunga alutji tengle kotngahpa chu hunga, agalahdoh jia, chule kotngah ho indan sunga akoilut kitji ahi.

¹²Chuin ama akineosah phatnin, asuh manghel lounadin Pakai lunghanna chu ama-a konin akilehei tan; chule Judah gamsunga jong thil ache hoi tan ahi.

¹³Hitichun Rehoboam lengpa chu Jerusalem'a akisuhat nin, lengvai apon ahi. Ajehchu Rehoboam alengchan patchu akum kum somli le kum khat ahitan, Pakaiyin amin umna dinga Israel phung jouse-a kona alhendoh khopi Jerusalem'a chun kum somlesagi lengvai apon ahi. Chule anu min chu Naamah ahin, Ammon mi ahi.

¹⁴Chule Pakai holna dinga alungthim agontuplou jeh-in, thilse jeng abolin ahi.

¹⁵Tun Rehoboam thilbol abula pat ajogei chu Shemaith themgao lekhabu le, mitvanei Iddo khanggui bu-a kisun hilouham? chule Rehoboam le Jereboam kah-a chun kidouna aumjom jingin ahi.

¹⁶Chule Rehoboam chu apu apate toh alumkhomin, David khopi-a akivuitai: chule achapa Abijah chu ama khelin alengchang tai.