Read Thado Chin 2 Thusimbu 13 Bible Online

2 Thusimbu 13 - Thado Chin bible

2 Thusimbu 13

¹Tun Jeroboam lengchan kum somle kumget lhin kum-in Judah gama Abijah alengchang panin ahi.

²Aman Jerusalem'a kumthum lengvai apon ahi. Anu min chu Michaiah ahin, Gibeah mi Uriel chanu ahi. Chule Jeroboam le Abijah kah-a gal ana umin ahi.

³Chuin Abijah chu galsat dingin lhentum cheh sepai galsat mihangsan sangjali to akigol toh-in: Jeroboam'in jong lhentum cheh sepai galsat mihangsan sang jaget toh ama satdingin akigol toh-in ahi.

⁴Chuin Ehpraim molsanga um Zemaraim mol chunga Abijah adingin, Nangma Jeroboam le Israelte jousen kasei ngaijuvin;

⁵Pakai Israel Pathen'in Israelte chunga lenggam hi David le achapate henga chi-a kitepna-a tonsotna dinga anapehsa ahi chu nahet diudol hilouham?

⁶Hijongle David chapa Solomon sohpa Nebat chapa Jeroboam chu akipatdoh-in, a-pakaipa dounan akiphintan ahi.

⁷Chule ama henga chun pannabei ho, Belial chate akikhomun, Rehoboam chu khangdong cha le lungthim nemhiuheo ahi-a amaho doudal thei ahilou petchun, Solomon chapa Rehoboam dounan akisuhat nun ahi.

⁸Chule tun nanghon David chapate khutna um Pakai lenggam chu doudal dingin nangaitou vin; chule nangho mihonpi tamtah nahiuvin, Jeroboam'in pathenho dinga anasempeh-u sana bongnouho chu nangho toh aumkhomin ahi.

⁹Nanghon bongchal khat le kelngoichal sagi-a kisutheng dinga hungchan chu pathen hilouho thempu ahithei nadinga; Pakai thempuho, Aaron chapate le Levi ho nanodoh uva, gamdang namho chona banga thempu nakisem thu-u hilouham?

¹⁰Keiho din vang Pakai chu ka Pathen'u ahin, ama chu kanungsun pouve; chule Pakai kinbol thempuho chu Aaron chapate ahiuvin, chule Levi hon amaho kin abol jingun ahi.

¹¹Chule amahon jingkah nilhah sehle Pakai henga govam ganlhaina le gimnamtui ahaljiuvin; vetsahna changlhah jong chu dokhang theng chunga atoh jiuvin; chule nilhah seh-a halding sana meivah khomle chua meivah pumin akoitoh jiuvin ahi. Ajehchu keihon Pakai i-Pathen'u thupeh kanit jingu ahin; nanghon vang ama nanungsun taove.

¹²Chule veuvin, Pathen amatah chun eilamkai hidingin eiumpiuvin, chule athempuho jong nangho douna gal sumkon mutdingin aumjinguve. Vo Israel chate, napu napateu Pakai Pathen'u chu kisatpi hih-un; ajehchu najolou dingu ahi, ati.

¹³Ahinla Jeroboam'in anunglam uva kona hinbulu ding asolin ahi: hitichun amaho Judah te masanga aumun, chule ahin bulu dingho chu anunglam uva aumun ahi.

¹⁴Chuin Judah ten akinung heijuva ahile, veuvin, gal chu anung ama uva aumtan ahi: Chuin Pakai henga ataovun, chule thempuhon sumkon amutnun ahi.

¹⁵Chuin Judah mite a-aovun: chule Judah mite hatah a a-ao phatnun ahitin ahi, Pathen'in Jeroboam le Israelte jouse chu Abijah le Judah te masanga agal lelsah tan ahi.

¹⁶Chuin Israelte chu Judah masanga ajamtaovin; Pathen'in amaho chu akhutnuvah apedoh tai.

¹⁷Chuin Abijah le amiten amaho chu atamatam athat taovin: hitichun hikoma chun Israel mite chu lhentum cheh sangjanga athiuvin ahi.

¹⁸Hitichun chuche chunga chun Israel chate chu suhnemin aumun, Judah chate chun apu apateu Pakai Pathen chunga akingai jeh-un ajoutaovin ahi.

¹⁹Chuin Abijah'in Jeroboam anungdelin, ama-a konin khopi phabep alan, Bethel chu akholenho pumin, Jeshanah chu akholenho pumin, chule Ehpraim chu akholenho pumin alatan ahi.

²⁰Abijah nikho laijin Jeroboam chu ahatdohjou tapon ahi: chuin Pakaiyin adengin, athitai.

²¹Abijah vang ahat cheh cheh-in, ji somleli aneijin, chapa somnileni toh chanu somgup ahingin ahi.

²²Abijah thilbol adangse le alamlhah ho, chule athuseiho chu Iddo themgao thusima kisun cheh ahi.