Read Thado Chin 2 Thusimbu 14 Bible Online

2 Thusimbu 14 - Thado Chin bible

2 Thusimbu 14

¹Hitichun Abijah apu apatetoh alumkhomin, David khopi-a avuijun: chule achapa Asa ama khelin alengchang tan ahi. Ama nikholaijin gamsung chu kum som galmongin aumuvin ahi.

²Chule Asa'in Pakai a-Pathen mitmun apha le adih jeng abolin ahi.

³Ajeh chu aman gamdang pathenho maicham ho le munsang ho aladoh-in, milimho avobongin, Asherah limho aphuh lhun:

⁴Judah te chun apu apao Pakai Pathen aholuva, adanthu le athupeh anit dingun athupeh-in ahi.

⁵Aman Judah te khopiho jouse-a konin munsanghole milimho alamangin; lenggam chu ama noija galmongin aumin ahi.

⁶Aman Judah gamsunga chun khopi kulneiho asan ahi: ijeh inem itile gamsungin choldona amun, chule chuche kumho-a chun aman gal aneipon ahi: ajehchu Pakaiyin choldona apeh ahi.

⁷Hijeh chun aman Judah te henga, Gamhi imasanguva aumpetnin, hiche khopiho hi saohitin, akimveluvah kulbangho, insangho, kotpiho, chule kotgolho semuhite; ajehchu eihon Pakai i-Pathen'u iholun, eihon ama iholun chule aman ningjouse-a choldona eipeuvin ahi, ati. Hitichun amahon asaovin, akhangtou lheh-un ahi.

⁸Chule Asa'n Judah'a konin thih khutbu le tengcha choi cheh galsat mi sangsomthum aneijin, Benjamin'a kona lum le thal thocheh mi sangjani le somget aneijin: amaho mihat mihangsan cheh ahiuve.

⁹Chuin Ethiopia mi Zerah chu amaho satdin galmi janel asang asangto, sakol kangtalai jathum toh ahung kondoh-in; Mareshah'a ahungun ahi.

¹⁰Chuin Asa ama satdin ahung kondoh-in, Maresha'a um Zephathah phaichama chun galsat dingin akigoltoh taove.

¹¹Chuin Asa'n Pakai a-Pathen akouvin, Pakai, nangman napanpi ding chu mi tamtah manchah ding hihen, ahiloule thanei louho manchah ding hijongle imacha ahichom poi: vo Pakai ka Pathen'u, neipanpi uvin; ajehchu nanga kingai kahiuvin, namina mihonpi hi satdinga che kahiuve. Vo Pakai, nangma ka Pathen'u nahi: mihemin najouhih helhen, ati.

¹²Hitichun Pakaiyin Asa le Judah te masanga Ethiopia mite chu ajouvin; Ethiopia mite ajamtaove.

¹³Chuin Asa le aumpi mipi chun amaho chu Gerar geijin adelun: Ethiopia mite chu ajoutaovin, hitichun amaho akidodoh jou tapouve; ajehchu Pakai le ajanel angsunga gallel ahitaove; chuin amahon galthil kichom tamtah ahinkipoh mangun ahi.

¹⁴Chuin amahon Gerar kimvela khopi jouse asumangun ahi; ajehchu achunguva Pakai ginna hung chu-a ahitai: chule amahon khopi jouse achomun ahi: ajehchu hiche ho sunga chu galthilchom tamtah uma ahi.

¹⁵Amahon ganchaho ponbuh ho jong asumangun, kelngoiho le sangongsang ho tampitah akikaimangun, Jerusalem'a ahung kile taove.