Read Thado Chin 2 Thusimbu 15 Bible Online

2 Thusimbu 15 - Thado Chin bible

2 Thusimbu 15

¹Chuin Oded chapa Azariah chunga Pathen lhagao ahungchun:

²Asa kimupi din achen, ahenga, Asa, Judah te chule Benjamin miten kathusei ngaijun; amatoh naum khom lai seuvin, Pakaiyin na-umpive; nanghon ama nahol uva ahileh ama namu dingu; amavang nanungsun uva ahile, aman jong nangho nanungsun dingu ahi.

³Tun Israel hi phat sottah Pathen dih bei le, mihil ding thempu bei, chule dan bei anahiuvin ahi.

⁴Ahinla amaho alungdon uva Israel Pakai Pathen henga akileuva, ama aholuva ahile, ama amu jiuvin ahi.

⁵Chule hichelai chun vaikonpa ahiloule vailhungpa din chamna anaumpon, gamsunga cheng jouse chunga gentheina nasatah anaumjon ahi.

⁶Pathen'in vangsetna jouse-a asuhgenthei jeh-un, namkhat le namkhat, khopi khat le khopi khat akisumang touvin ahi.

⁷Hijeh chun hatnunlang nakhut thau lhomsah hih-un; ajehchu nanatoh-u tohman kipe ding nahiuve, ati.

⁸Chuin Asan hiche thuho le Oded themgao thusei ajah phatnin, ahangsan chehtan, Judah le Benjamin gamsung jouse-a kon le Ephraim molsanga kona akhopi lah ho-a konin kidah umtah milim jouse akoimangin, Pakai hongcha maija um Pakai maicham chu asemphan ahi.

⁹Chuin aman Judah mite le Benjamin mite jouse, chule Ephraim, Manasseh le, Simeon'a kon amaho umpi gamdang miho jouse akhom khomin ahi. Ajehchu Pakai a-Pathen'in aumpi amuphatnuva, Israel'a konin mi tamtah-in ama ahinbelu ahitai.

¹⁰Hitichun Asa lengchan kal kum somle kumnga na, alhathum lhina-in amahole amaho Jerusalem'a akikhom khom taovin ahi.

¹¹Chule hiche chunga chun amahon Pakai henga galthila ahin chomhou lah-a konin bongchal jasagi le kelngoi sangsagi atoh-un ahi.

¹²Chuin amahon alungthim pumpiu le ahinna pumpiuva apu apateu Pakai Pathen hol dingin kitepna aneijuvin;

¹³Hitichun alen hihen aneo hileh, numei hihen pasal hijongle, Pakai Israel Pathen hollou chanchu kithat ding ahi atiuve.

¹⁴Chuin Pakai henga awsang tah-in, sumkon le sumkon binei mutpum in akihahselun ahi.

¹⁵Chule Judah te jouse chu kihahsel na-a chun akipah uvin ahi; ajehchu alung pumpiuva kihahsel uva, angaichat nao pumpi-a aholu ahin; amachu amuvin ahi: chuin Pakaiyin akimveluvah choldona apeuvin ahi.

¹⁶Chujongle Asa lengpa nu Maachah thudola, amanun Asherah lim anakisem jeh-in, lengnu ahina-a konin akoidohtai: chule Asa'n amilim chu aphuh lhun, achon goijin, Kidron vadunga ahal lhatai.

¹⁷Ahinla Israel'a konin munsang ho chu akilamangpon: hijeng jongle Asa lungthim vangchu ahinkho lhumkeijin achamkimin ahi.

¹⁸Chule aman Pathen insunga chun apa thensosa thilho le amatah in athensosa thilho, dangka, sana chule umle belho chu ahin polutnin ahi.

¹⁹Chule Asa lengchan kum somthum le kumnga sungchun gal aumkit tapon ahi.