Read Thado Chin 2 Thusimbu 16 Bible Online

2 Thusimbu 16 - Thado Chin bible

2 Thusimbu 16

¹Asa lengchan kal kum somthum le kumgup kum-in, Judah lengpa Asa henga koimacha alut le apot aum louhel nading gelnan Israel lengpa Baasha chu Judah satdin ahungtouvin, Ramah chu asadohtan ahi.

²Hichun Asa'n Pakai in'a konle leng in goukholna in'a konin dangka le sana aladoh-in, Damascus'a cheng Syria lengpa Banhadad agah thotnin, ahenga,

³Kapa le napa kah-a anaum bangin keima le nang kah-a kitepna aumin ahi: ven, dangka le sana kahin thotne; chen, ama keija kona apotdohna dingin, Baasha toh nakitepna lhon gasukehtan, ati.

⁴Chuin Benhadad'in Asa lengpa thu angaijin, agalsat lamkaiho chu Israel khopiho satdin asolin; amahon Ijon, Dan, Abel-maim le Naphtali thilkholna khopiho jouse agajou taove.

⁵Chuin ahitin ahi, Baasha'n hichu ajah phatnin, Ramah asah chu adalhan, anatoh atansahtai.

⁶Chuin Asa lengpan Judah te jouse apuijin, amahon Baasha'in amanchah Ramah songho jouse le thingho chu apomangun, hicheho-a chun Geba le Mizpeh asadohtan ahi.

⁷Hichelai chun mitvahnei Hanani chu Judah lengpa Asa henga ahungin, ahenga, Nangma Pakai na Pathen'a kingai louva Syria lengpa-a nakingai jeh-in, Syria lengpa sepai janel chu nakhutna konin ahoidoh taovin ahi.

⁸Ethiopia mite le Lubim mite chu sakol kangtalai tamtah le sakol touthem tamtah janel mihonpi hilouvu ham? ahivangin Pakaiya nakingai jeh-in aman amaho nakhutna apedoh-in ahi.

⁹Ajehchu ama lama alungthim chamkimho henga amaho khela ahatna musah dinga Pakai mit chu leiset pumpi-a suhletunga lhailele-a ahi. Hichea hin nangman ngolhoi tah-in thil naboltai: hijeh-a chu tua patna gal nanei jingding ahitai, ati.

¹⁰Chuphatnin mitvah neipa chunga Asa alunghangin, songkul'a akhumtai; ajehchu hiche thilho jeh-a chu achunga alungsalheh jenga ahi. Chule hiche laichun Asa'n mi phabep asugentheijin ahi.

¹¹Chule vetan, Asa thilbol amasale anunung chu, vetan, Judah le Israel lengho lekhabua akisunlut cheh-in ahi.

¹²Chule Asa lengchan kal kum somthum le kumko lhin kum-in akenga natna aneitan; ahanat kikhon geijin anatan: ahinla anatna-a chun Pakai hollouvin louthem ho joh anaholin ahi.

¹³Chuin Asa apu apate toh alumkhomin, alengchan kal kum somli le kumkhat lhina-in athitan ahi.

¹⁴Chuin amahon aman David khopisunga anakisem lhansunga avuijun, gimnamtui semhon gimnamtui jat chomchom agonu dimset jalkhuna chun alupsah taove. Chule amahon ama dingin meikong deojejun atih-un ahi.