Read Thado Chin 2 Thusimbu 17 Bible Online

2 Thusimbu 17 - Thado Chin bible

2 Thusimbu 17

¹Chuin achapa Jehoshaphat ama khelin aleng changin, Israelte dounan akisuhat nin ahi.

²Aman Judah gamsunga kulbang nei khopiho jouse-a galsatmi akoijin, Judah gamsung le apa Asan analahsa Ephraim khopiho-a sepaihon akoicheh-in ahi.

³Pakaiyin Jehosaphat aumpin ahi; ajehchu aman apa David lampi masa chu ajotnin, Baalim ahol pon;

⁴Pakai apa Pathen joh aholin, ama thupeh ho-a chun achonnin, Israelte chonna bangin achonpon ahi.

⁵Hijeh chun Pakaiyin lenggam chu akhutna asudetnin; Judah te jousen Jehosaphat henga thilpeh ahinchoijun, chule aman haona le jabolna bulhing setnin aneije.

⁶Alungthim Pakai lampiho-a achoisangin; achungchonin jong Judah gamsunga konin mun sanghole Asherah limho alamangin ahi.

⁷Alengchan kumthum na-a jongchun Judah gamsung khopiho-a cheng miho hildingin amilenho Benhail, Obadiah, Zechariah, Nethaneel chule Michaiah asolle.

⁸Chule aman amaho chutoh Levi miho, Shemaiah, Nethaniah, Zebadiah, Asahel, Shemiramoth, Jehonathan, Adonijah, Tobijah, Tob-adonijah, chule amahotoh Elishama le Jehoram thempu teni asoltan ahi.

⁹Amahon Judah gamsunga ahilun, Pakai danthu lekhabu chu akikenun, Judah gamsung khopiho jouse achonchan sohkeijun, mipichu ahil leuvin ahi.

¹⁰Chuin Judah gamkimvela um lenggam ho jouse chunga chun Pakai kichatna achutan, hitichun amahon Jehosaphat dounan gal abol pouvin ahi.

¹¹Chule Philistine mite phabepmin jong Jehosaphat chu thilpeh le dangka kai apeuvin; chule Arab mihon kelngoi hon sangsagi le jasagi toh kelchal jasagi ahin peuvin ahi.

¹²Chuin Jehosaphat chu nasatah-in aloupitan; Judah gamsunga kulpiho le thilkholna khopiho asadoh-in ahi.

¹³Chule aman Judah gamsung khopiho-a chun natoh tamtah aneijin: galbolmiho le mihat mihangsan ho chu Jerusalem'a aumun ahi.

¹⁴Chule hichehohi apu apateu insung kailhah dungjuija ajatnu chu ahi: Judah insunga sang gal lamkaiho pipui chu Adnah ahin; chule amatoh umkhom mihat mihangsan hochu sangjathum ahiuve.

¹⁵Chule ama bana chu gallamkai Jehohanan ahin, ama tohin mi sangjani leh sangsomget aumkhomin ahi.

¹⁶Ama bana chu ama le ama kiphal tah-a Pakai henga kipe Zichri chapa Amasiah ahin; ama tohin mihat mihangsan sangjani aumkhomin ahi.

¹⁷Chule Benjamin'a konin mihat mihangsan Eliada ahin, ama tohin thal le lum thothei mi sangjani aumkhomin ahi.

¹⁸Chule abana chu Jehozabad ahin, ama tohin galkap dinga kigosadem mi sangjakhat le sangsomget aumkhomin ahi.

¹⁹Hicheho hi Judah gamsung pumpi-a kulbang nei khopiho sunga lengpan akoiho simlouva lengpa ngahho chu ahiuve.