Read Thado Chin 2 Thusimbu 18 Bible Online

2 Thusimbu 18 - Thado Chin bible

2 Thusimbu 18

¹Tun Jehoshaphat chu haona le jabolna nasatah achangtan, chule Ahab toh kiguijopna aneitan ahi.

²Chuin kum ijat-ham jouvin Ahab henga Samaria'a achesuh-in ahi. Chuin Ahab'in amale alhonpiho chu kelngoi le bongchal nengchetnin athapeh-in, Ramoth-gilead'a kilhon toupi din ajolin ahi.

³Chuin Israel lengpa Ahab'in Judah lengpa Jehoshaphat henga, Ramoth-gilead'a neilhonpi dingham? ati. Chuin aman adonbutnin, Keima nangma tobang kahin, kamite jong namite tobang ahi; galchu sat hu nao vinge, ati.

⁴Chuin Jehoshaphat'in Israel lengpa jah-a, Katao ahi, tuni hin Pakai thu doptadin, ati.

⁵Hijeh chun Israel lengpan themgaoho mi jali jen akhomin, ajah uva, Ramoth-gilead'a galsatna kakon diuham, ahiloule kahaidiu ham? ati. Chuin amahon, Kontaovin; ajehchu Pathen'in lengpa khutna apehdoh dingu ahi, atiuve.

⁶Ahinla Jehoshaphat'in, Hicheho tilouva hi eihon idop theidiu Pakai themgao umlouva hitam? ati.

⁷Chuin Israel lengpan Jehoshaphat jah-a, Eihon Pakai thu idopna theidiu mi khat aum nalainai: ahinla keiman ama kahon ahi; ajehchu aman thilphalou tilou apha eigaopeh ngaipoi: amachu Imla chapa Micaiah ahi, ati. Chuin Jehoshaphat'in, Lengpan hiti chun thu seihih-in, ati.

⁸Chuin Israel lengpan lamkaiho khat akouvin, Imla chapa Micaiah chu kintah-in gakouvin, ati.

⁹Chuin Israel lengpa le Judah lengpa Jehoshaphat chu Samaria lutna kotpi bul mun onglaija lengvon pumin alaltouna gella atou lhonin; a-angsung lhona chun themgaoho chun gaothu aseijun ahi.

¹⁰Chuin Chenaanah chapa Zedekiah chun thih sakiho akisemin, Hicheho-a hi Syria mite chu amanhel tokah seova nano ding ahi tin Pakaiyin aseije, ati.

¹¹Chuti chun themgao jouse chun chutima chun gaothu aseijun, Ramoth-gilead'a chetouvin lang galo lhingin: ajehchu Pakaiyin hichu lengpa khutna apehdoh ding ahi, atiuve.

¹²Chuin Micaiah kou-a che sottol chun ajah-a, Ven, lengpa henga themgaoho chun kitohtah-in aphalam aseijuve; katao ahi, nathu chu amaho-a tobangin hihen, chule apha seijin, ati.

¹³Chuin Micaiah'in, Pakai hingjing min pana kasei ahi, Ka-Pathen'in asei sei bouchu keiman kaseiding ahi, ati.

¹⁴Chuin ama lengpa henga ahung phatnin, lengpan ajah-a, Micaiah, Ramoth-gilead'a galbola kakon diuham, ahiloule kahaisah diham? ati. Chuin aman, Kontou vunlang galo lhingun, amaho chu nakhutna kipedoh ding ahi, ati.

¹⁵Chuin lengpan ajah-a, Pakai mina thutah tailou imacha dang seilou dinga ijatvei kaki hahsel sah ding nahim? ati.

¹⁶ Chuin aman, Israelte molsang chungho-a achingbei kelngoi banga akithecheh-u kamui: chule Pakaiyin, Hiche hohin lamkai anei tapouve; hijeh chun amitakip a-incheh-a lung mongin kiletaohen atie, ati.

¹⁷Chuin Israel lengpan Jehoshaphat henga, Aman thilse tailou apha eigaopeh ponte tia kasei hilouham?

¹⁸Chule Micaiah'in aseiben, Pakai thu ngaijun; Pakai alaltouna-a atouva, ajetle veija vanmi janel jouse adinnu kamui.

¹⁹Chule Pakaiyin, Koipen tah-in Israel lengpa Ahab chu Ramoth-gilead-a agathi den nadinga agalhep dingham, ati. Chuin khatnin hitobanghin atin, achom khatnin khutobang khun atin ahi.

²⁰Chujouvin lhagao khat ahung potdoh-in, Pakai anga agadingin, Ken lheminge, ati. Chuin Pakaiyin ajah-a, ipi lampi-in em? ati.

²¹Chuin aman chedoh ingting, athemgaoho koma jouthu sei lhagaova kagapan ding ahi, ati. Chuin Pakaiyin, Nangman nagalhep ding, jojong najoding ahi: chen lang chuti chun gaboltan, ati.

²²Hijeh chun tun, vetan, Pakaiyin hiche nathemgao ho kama jousei lhagao akoija, Pakaiyin nangma douna-a thilse asei ahitai, ati.

²³Chujouvin Chenaanah chapa Zedekiah chun ahin naijin, Micaiah ngeiphe abengin, ajah-a, Hoiche lampi-a Pakai lhagao chu keima-a kona nangma henga thusei dinga che-a ham? ati.

²⁴Chuin Micaiah'in, Ven, kiseldinga indan sungnunga nalut nikhole hetan nate, ati.

²⁵Chuin Israel lengpan, Micaiah chu man unlang, khopi vaipo Amon le, lengpa chapa Joash henga lekaijun;

²⁶Chule, Lengpan hitin aseije, Hichepa hi keima lhamonga kahung kilekit kahsen songkul'a khumin lang, gimbolna changlhah le gimbolna twijin vah uvin atie, tin gaseijun ati.

²⁷Chuin Micaiah'in, Lungmonga nahung kile ngeingeija ahile Pakaiyin keima mangcha-a thu aseilou hinte, ati. Chule aman, Mipi jousen ngaijun, ati.

²⁸Hitichun Israel lengpa le Judah lengpa Jehoshaphat chu Ramoth-gilead lama akontou lhontai.

²⁹Chuin Israel lengpan Jehoshaphat jah-a, Keiman kalim kachom sah-a galmuna kache ding ahi; nangma vang naleng von kivonin, ati. Hitichun Israel lengpan alim achomsah-in, galmuna ache taove.

³⁰Tun Syria lengpa chun alhonpi sakol kangtalai lamkaiho athupeh-in, Nanghon Israel lengpa tailou alen jong aneo jong nasat loudiu ahi, ati.

³¹Chuin ahitin ahi, sakol kangtalai lamkaihon Jehoshaphat amu phatnun, Hichekhu Israel lengpa ahi, atiuve. Hijeh chun kisatpidin ahin um taovin; ahinla Jehoshaphat chu apeng jah-in ahile, Pakaiyin akithopin; Pathen'in amaho chu amapa adalhah sahtan ahi.

³²Ajehchu ahung hitin ahi, sakol kangtalai lamkaihon Israel lengpa ahilou ahetphat uvin, ama nung adel naova konin ahung kinungle taovin ahi.

³³Chuin mikhatnin doitum neilouvin athal akapmin ahile, Israel lengpa ompho kikah tah chu akhan ahi. Hijeh chun asakol kangtalai tolpa henga, Janel lah-a kona neitoldoh theinadin nakhut leheijin; ajehchu keima kamachang tan ahi, ati.

³⁴Chule hiche nikho chun galkisat anasalheh jengin: ahijeng vangin Israel lengpa chu sakol kangtalai chunga Syria mite lamngan nilhah geijin aumin: chuin nisa lhumphat donin athitan ahi.