Read Thado Chin 2 Thusimbu 19 Bible Online

2 Thusimbu 19 - Thado Chin bible

2 Thusimbu 19

¹Chuin Judah lengpa Jehoshaphat chu lungmong tah-in a-in lam Jerusalem'a ahung kile kit tai.

²Chuin ama kimupi din mitvahnei Hanani chapa Jehu apotdoh-in, Jehoshaphat lengpa henga, Nangman Pathen helouho napanpi-a, Pakai hotbolteho nangailut ding hijaham? hijeh chun Pakai masanga konin nachung uva lunghana achutan ahi.

³Ahivangin hiche gama kona doikhomho nalahmanga, Pathen holding nalungthim nagot jeh-in, nangma-a thilpha akimun ahi, ati.

⁴Chuin Jehoshaphat Jerusalem'a achengin; Beersheba'a pat Ephraim molsang geijin amite lah-a achelen, Pakai apu apateu Pathen lama amaho chu ahin lepui kitnin ahi.

⁵Chuin aman Judah gama kulbang nei khopiho jouse-a, khopi tina thutan ho akoijin,

⁶Thutan ho henga, Nathilbol uva chingtheijun: ajehchu mihem dinga thutan nahipouvin; nathutan naova na-umpiu Pakai ding joh-a thutan nahiuve.

⁷Hijeh chun tun nachung uva Pakai ginna umhen; chingthei tah-in bolun: ajehchu Pakai i-Pathen uva chun khangitlouna, maipha vetna, chule nehguh nehna aumpon ahi, ati.

⁸Chukalvalin amaho Jerusalem'a ahung kile phatnun, Jehoshaphat'in Jerusalem'a chun Pakai thutan ding le thunoh baotamna-a thutan dingin Levi ho le thempuho, chule Israel phung upaho akoijin ahi.

⁹Chule aman amaho chu athupeh-in, Nanghon Pakai ging pum le kitah tah-a, chule lungthim chamkim tah-a hichu naboldiu ahi.

¹⁰Chule achennao akhopi houva nasopiteu lah-a kon ipi thu hijongle: thisan le thisan kikah thu, danthu le thupeh kikah thu, chondanho le thutanlhahho thua naheng uva hungchan chu, nangho le nasopiteu chunga lunghanna achuh louna dinga Pakai douna-a asuhkhel louna diuva nahil chahdiu ahi. Hichehi bolun, chutile nasuhkhel lou dingu ahi.

¹¹Chule veuvin, thempu chungnung Amariah chu Pakai thulam jouse-a nachung uva aumin; chule lengpa thulam jouse-a Judah te insung vaihompa Ishmael chapa Zebadiah aume; chule Levi mite jong chu namasanguva lamkai hidiu ahi. Hangtah-in tongun, chule Pakaiyin miphaho aumpi ding ahi, ati.