Read Thado Chin 2 Thusimbu 2 Bible Online

2 Thusimbu 2 - Thado Chin bible

2 Thusimbu 2

¹Chuin Solomon'in Pakai min dinga in khat le alenggama dinga in khat sah ding agel lhutai.

²Chuin Solomon'in pohgih poding mi sangsomsagi, molsanga song khengding mi sangget, chule avetupdiu mi sangthum le jagup alhengdoh tan ahi.

³Chuin Solomon'in Tyre lengpa Huram henga mi asolin, Kapa Davidn'in achenna ding in khat akisahna dinga cedar thing nathotna nabolna bangin keimatah jong neibolin.

⁴Vetan, choldo nikho, lhathah nikho, chule Pakai ka Pathen'u kutpi nikhoho le ama henga katdoh ding, amasanga gimnamtui halna ding, tanglouva vetsahna changlhah tona ding, chule jingkah nilhah-a govam thilpeh bolna dinga Pakai ka Pathen mina inkhat kasah ahi. Hichehi Israelte dinga a-itih-a houdan thupeh ahi.

⁵Chule ka-in sahhi lentah ahin; ka Pathen'u hi pathenho jouse sanga lenjo ahi.

⁶ Ahinla vanle vanho van jengin jong ama adoljoulou ahin, kon ama dinga in asahpeh jou dingham? Ama anga ganlhaina kago tailou, kei koi kahia ama dinga in kasahpeh thei dingham?

⁷Hijeh chun tun kapa David'in anamanchahsa Judah le Jerusalem'a kaumpi natongthem hotoh tongkhom dingin, sana, dangka, sum-eng, thih, pon asandup, asanthip, adum ho jouse-a thepna nei mikhat neihin solpeh-in.

⁸Labanon'a konin cedar thing, chah thing, algum thingho jong neihin tolpeh-in; ajehchu nasohte chu Lebanon thing tuhdan athemuve ti kahei; chule vetan, keima sohten nangma sohte kithopiu vintin,

⁹Thing nengtah-a eigonpeh dingu ahi; ajehchu ka in sahgot hi kidangtah-a len hiding ahi.

¹⁰Chule, vetan, nasohte, thing phuh-a tanho chu suhlou chang kigoibong tena sangsomni, sakolchang tena sangsomni toh, lengpitwi tena sangsomni, chule thaotwi tena sangsomni kapeh ding ahi, tin mi agahsole.

¹¹Chuphatnin Tyre lengpa Huram'in sut tho-in adonbutnin, Solomon athot tai; Pakaiyin amite angailut jeh-in, nangma achunguva lengin nasemtai.

¹²Achung chonin Huram'in aseiben, Van le lei sempa, Pakai dinga in khatle alenggam dinga in khat sathei dinga David dinga chihna le hetkhen themna nei chapa chingtah khat pepa Pakai Israel Pathen chu nunnom hen.

¹³Chule tun keiman kapate Huram mi, mithemnal, hetkhen themma nei mi khat kahin solpeh-e.

¹⁴Ama Dan chanute numei khat chapa, apachu Tyre mi ahin, sana-a, dangka-a, sum-enga, ponduma, tupat ponnema, ponsanthip lama themtah ahin; thiljem jouse khengthei, boldinga kigonpeh jouse boldohthei ahin, nangma khutthemho le kapu David napa khutthemho toh kithothei ahi.

¹⁵Hijeh chun tuhin ka pakaiyin anaseisa suhlou chang, sakolchang, thaotwi, lengpitwi chu asohte henga hinthot tahen;

¹⁶Chule keihon Lebanon'a konin nangaichat dingjat jat chu phuh ungting; keihon nahenga Joppa geijin twipi chunga puma kahin toldiu, chule nanghon Jerusalem geija naki lhoh dingu ahi, ati.

¹⁷Chuin Solomon'in apa David'in anasimsa bangin, gamsunga um gamdangmi jouse asimin; amaho chu sangjakhat le sangsomnga chule sangthum le jagup asimdoh-in ahi.

¹⁸Chuin amaholah-a sangsomsagi chu thilgih poding, mi sangsomget chung molchunga song khengding, chule mi sangthum le jagup chu anatoh-u vetup dingin apansah tan ahi.