Read Thado Chin 2 Thusimbu 20 Bible Online

2 Thusimbu 20 - Thado Chin bible

2 Thusimbu 20

¹Hiche jou jonghin ahitin ahi, Moab chatele Ammon chate chu Ammon mite hilou adangtoh Jehoshaphat satdin ahunguvin ahi.

²Chuin mi phabep Jehoshaphat henga ahungun, Mihonpi tamtah nangma doudin twipigal hilam Syria'a konin ahung konun; chule vetan, Engedi kite Hazazon-tamar'a aumun ahi, tin ahilun ahi.

³Chuin Jehoshaphat akicha tan, Pakai holdin akipen, Judah gamsung pumpi-a an ngol din aphongdoh tan ahi.

⁴Chuin Judah chu Pakai kithopina thumdin akikhom khomun: Judah khopiho jouse-a konin Pakai holdin ahungdoh-un ahi.

⁵Chuin Jehoshaphat chu Judah le Jerusalem houkhom ho lah, Pakai insunga inhong thah maija chun adingin,

⁶Hitin ati, Vo kapu kapateu Pakai Pathen, nangma van'a um Pathen nahi hilouham? chule Pathen helou mite lenggam ho chunga vaihom nahi hilouham? chule koimachan nanan joulou na dinga, nakhutna thahatna le thaneina uma hilouham?

⁷ Nami Israelte masanga kona hiche gama chengho nodoh-a, nagolpa Abraham chilhahte tonsotna dia pe-a ka-Pathen'u nahi hilouham?

⁸Chuin amaho hia chun achengun, hia chun namin dingin muntheng khat nasahpeh-un,

⁹Ijemtia kachunguva thilphalou, chemjam, thutana, hise, kellhah ho kachunguva ahung chuh-a ahile, hiche in mai le na angsung tah-a hi kadindiu, (ajehchu hiche insunga hi namin uma ahi,) kathohgim naova kona nangma henga kapendiu, chuteng nangman neingaipeh uva neikithopi dingu ahi, tin anaseijuve.

¹⁰ Chule tun, vetan, Egypt gama kona ahungdoh laijuva Israel ten gala asat dingu nanaphal louho, amavang amaho-a kona kinungle uva, asuhmang louvu Ammon chate le Moab chate, chule Seir molsang miho hi;

¹¹Vetan, itobanga eilethuh-u hitam, nangman kalodiuva neinapeh-u nagouchana kona nodoh dingin ahunguve.

¹²Vo ka Pathen'u, nangman athu-u natanlou dingham? Ajehchu eidoudiuva hungkon hiche hon tamtah ho douna dingin hatna kanei pouvin; alonaje jong kahepouve: ahin kamitnu hi nangma chunga aume, ati.

¹³Chuin Judah te jouse chu Pakai angsunga achasen houle ajiteu, chule achateu toh adingsoh keijun ahi

¹⁴Hichun Levi mi Asaph chate lah-a Mattania chapa, Jeiel chapa, Benaiah chapa, Zekeriah chapa, Jahaziel chunga chun houkhom ho lailung tah-a Pakai lhagao ahungchutan;

¹⁵ Chuin aman, Ngaijun, nangho Judah te jouse le Jerusalem'a cheng jouse, chule nangma Jehoshaphat lengpa, Pakaiyin najah uva hitin aseije, Hiche mihonpi jeh hin nangho kicha hih-un, lung jong lungthoi hih-un; ajehchu galsat hi nangho-a ahipon, Pathen'a joh ahi

¹⁶Jing nikhole amaho doudingin konsuh-un; veuvin, amaho Ziz songkol'a ahung kaltou uve; nanghon Jeruel gamthip masang, vadung kichaina lama namudiu ahi.

¹⁷ Hiche galhi nangho sat ngailou ding ahi: nangho le nangho kigol toh-un, dingthim beh uvinlang, napanpiuva Pakai huhhingna chu veuvin, vo Judah le Jerusalem: kicha hih-un, lungjong lungthoi hih-un; jingtengle amaho doudingin kondoh-un; ijeh inem itile Pakaiyin na umpi dingu ahi, ati.

¹⁸Chuin Jehoshaphat akunin amai tolla asuluttai: chuin Judah le Jerusalem'a cheng jouse Pakai anga alhuvin, Pakai chu ahou taove.

¹⁹Chuin Kohath chate lah-a kon le Korhi chate lah-a kon Levi miho chu awgin sangtah le nasatah-a Israel Pakai Pathen vahchoi dingin adingdoh uvin ahi.

²⁰Chuin jingpi tah-in athouvun, Tekoa gamthipma alutnun: amaho achedoh laijun Jehoshaphat adingin, ajah uva, Vo Judah le Jerusalem'a chengte, kathusei ngaijun; Pakai na Pathen'u tahsanun, chutile naki phutdet dingu ahi; athemgaoho tahsanun, chutile nalolhin dingu ahi, ati.

²¹Chuin mipi toh akihoutoh phatnin, Pakai vahchoijun, ajehchu ahepina tonsotnin aumjinge, tia sepaiho masanga achepumuva athen hoina vahchoi ding le Pakai henga lasa ding mi alhengdoh-in ahi.

²²Chuin amahon lasah le vahchoina apat phatnun, Pakaiyin Judah doudinga hunga Ammon chate, Moab chate, chule Seir molsang miho dounan changpang akoijin; chuin amaho chu ajou taovin ahi.

²³Ajehchu Ammon chate le Moab chate chu Seir molsang miho thatgam hela sumanghel dingin amaho dounan akipat doh-un: Seir'a chengho athagam phatnun, amitakip khatle khat akisumangto taovin ahi.

²⁴Chuin Judah te gamthipma um khongahpa insang ahung lhun phatnun, mihonpi lam chu aveovin ahile, veuvin, tolla mithilong alhuchap jengin, khatcha ahoidoh aumpouve.

²⁵Chuin Jehoshaphat le amite chu galthil kichomdinga ahung phatnun, amahon mithi longho-a chun thil mantam tahtah haosatna le kijepna thil lutahtah ho amuvin, apohlel khophel dingun amaho-a din akisut lhah-un ahi: chule atam behseh jehchun, galthil chu nithumjen achom khomun ahi.

²⁶Chuin nilinin amaho Berachah phaichama akikhomun ahi; ajehchu hia chun Pakai achoi-anun ahi. Hijeh chun hiche mun minchu tugeijin Berachah phaicham akitin ahi.

²⁷Chujouvin Judah le Jerusalem mite jouse akinung leuvin, Jerusalem'a kipahtah-a chedingin Jehoshaphat chu alamkaijin ahi; ajehchu Pakaiyin amelmateu chunga akipasah-u ahi.

²⁸Chuin tumging le selangdah, chule sumkon tho-in Jerusalem'a Pakai in chu ahunglhung taove.

²⁹Chuin Pakaiyin Israel te-a dingin amelmateu dounan gal asatne ti ajah phatnun, chuche lenggam ho jouse chunga Pathen ginna achutai.

³⁰Chuin Jehoshaphat gamsunga lungmona aumtan ahi; ajehchu a-Pathen'in akimvela choldona apeh ahi.

³¹Hitichun Jehoshaphat chu Judah te chunga aleng changin ahi. Ama alengchan pat chun kum somthum le kumnga ahin, ama Jerusalem'a kum somni le kumnga aleng changin ahi. Chule anu minchu Azubah ahin, Shilhi chanu ahi.

³²Chule aman apa Asa lamlhah ajotnin, chua kona petdoh louvin Pakai mitmu-a adih chu abolin ahi.

³³Ahijeng vangin munsang ho chu lahmangin aumpon ahi; ajehchu mipi chun apu apateu Pathen lama dingin alungthimu agongtup hihlaijun ahi.

³⁴Tun Jehoshaphat thilbol dangho jouse chu abula pat achaina gei chu, veuvin, Israel lengte lekhabu sunga kiphapoh, Hanani chapa Jehu lekhabua akisuncheh-in ahi.

³⁵Hiche jou nung hin Judah lengpa Jehoshaphat chun thil giloutah bola Israel lengpa Ahaziah toh kiguijopna aneijin;

³⁶Aman Tarshish'a chena ding kong-innei semna'a amato chun akigui jopmin; chule amanin Ezion-gaber'a kong innei chu asem lhonin ahi.

³⁷Chujouvin Mareshah mi Dodavah chapa Eliezer'in Jehoshaphat dounan gaothu aseijin, ahenga, Nangman Ahaziah toh kiguijopna nabol jeh-in, Pakaiyin nanatoh ho asusetai, ati. Hitichun kongho chu suhsetnin aum gamin, Tarshish'a achethei lhon tapoi.