Read Thado Chin 2 Thusimbu 21 Bible Online

2 Thusimbu 21 - Thado Chin bible

2 Thusimbu 21

¹Tun Jehoshaphat apu apate toh alumkhomin, David khopi-a apu apate toh avuikhom taove. Chule ama khelin achapa Jehoram alengchang tan ahi.

²Aman Jehoshaphat chapate sopi Azariah, Jehiel, Zechariah, Azariah, Michael, chule Shephatiah aneijin: amahohi abonuva Israel lengpa Jehoshaphat chapate ahiuve.

³Chule apaovin amaho thilpeh nasatah dangka, sana, thilmantam ho, chule Judah gama kulbang nei khopiho apeuvin ahi: ahinla lenggam chu Jehoram apen ahi; ajehchu ama apeng masapen ahi.

⁴Tun Jehoram'in apa lenggam ahin lopat phatnin, amale ama akisuhat nin, asopi pasal jouse chemjamin athatnin, Israel pipuiho dangdang jong athatnin ahi.

⁵Alengchan patchun Jehoram chu kum somthum le kumni ahitan, Jerusalem'a kumget aleng changin ahi.

⁶Aman Ahab insung bangin Israel lengte lamlhah ajotnin ahi; ajehchu aman Ahab chanu jin aneijin: chule Pakai mitmun thilse abolin ahi.

⁷ Ahinla Pakaiyin David to kitepna anasemjeh le, amale achate henga a-itih-a meivah peh dinga anakitep jehchun, David insung chu asumang pon ahi.

⁸ Ama nikholai chun Edom mite chu Judah vaihomna noija aumnaova konin akiphinun, leng khat akitun taovin ahi.

⁹Chuin Jehoram apipuiho le amato umkhom sakol kangtalai jousetoh akondoh-un: chuin jan-in athoudoh-in, ama le asakol kangtalai lamkaiho umkimvela Edom mite chu asatnin ahi.

¹⁰Hitichun tuni geijin Edom mite chu Judah te khutnoija konin akiphinjing taovin ahi. Hiche phatlai mama jong chun aman apu apate Pakai Pathen anungsun jeh-in; Libnah chu akhut noija konin akiphinin ahi.

¹¹Chukalvalin jong aman Judah molsang chungho-a munsang ho asemin, Jerusalem'a chengho ajonthanhoi sah-in, Judah te apuimangin ahi.

¹²Chuin Elijah themgaova konin ahenga lekha ahungin, hitin ati, Napa David Pakai Pathen'in hitin aseije, nangman napa lamlhah najuilou jehle, Judah leng Asa lamlhah najuilou jeh,

¹³Amavang Israel lengte lamlhah najuija, Ahab insung jonthanhoi banga Judah le Jerusalem'a chengho na jonthanhoi sah-a, nang sanga phajo cheh napa insunga nasopite nathagam jeh-in,

¹⁴Vetan, Pakaiyin namite, nachate, najite, chule nanei nagouho jouse chu hise nasatah-a ajepding:

¹⁵Chule nangman gilnatna kona natna nasatah naneiding, ani ni-a hiche natna jeh-a chu nagil hung lotdoh kahse-a natna nanei ding ahi, ati.

¹⁶Chukal valin Pakaiyin Ethopia naija um Philistine miho le Arab miho lungthim chu Jehoram doudingin atildoh-in;

¹⁷Amaho Judah gama ahung kontouvun, abuluvin, lengpa insunga kimu thiljouse le achapate le ajite jong apomangun; hitichun achate lah-a alhumpen Jehoahaz tailou chapa khatcha adalhahpeh pouvin ahi.

¹⁸Chuin hicheho jouse jouhin Pakaiyin amachu gilnat damthei louvin ajeptan ahi.

¹⁹Chuin ahitin ahi, phat phabep sung kumni kichai jouvin, anatnajeh in agiljang ahung lotdoh-in; hitichun natna hoisetah-in athitan ahi. Chule amiten apate meikong anatipeh ji bangun, ama chu meikong atipeh pouvin ahi.

²⁰Alengchan kipat in ama kum somthumle kumni ahin, Jerusalem'a kumget lengvai apon, koimacha alha ngaija beihelin athitan ahi. Ahijeng vangin amahon David khopi-a avuijun, lengte lhan vang ahipoi.