Read Thado Chin 2 Thusimbu 22 Bible Online

2 Thusimbu 22 - Thado Chin bible

2 Thusimbu 22

¹Chuin Jerusalem'a chenghon achapa lhumpen Ahaziah chu ama khelin alengchansah taove. Ajehchu Arab miho toh kiloija gebuh-a hunga mihon ho chun a-ute sese atha gamu ahitai. Hitichun Judah lengpa Jehoram chapa Ahaziah chu alengchang tan ahi.

²Alengchan patchun Ahaziah chu kum somli le kumni ahin, Jerusalem'a kumkhat aleng changin ahi. Anu min chu Athaliah ahin, Omri chanu ahi.

³Amajong Ahab insung lamlhah ajuijin ahi. Ajehchu anu chu athilse bolna dinga athumopma pang ahi.

⁴Hijeh chun aman Pakai mitmun Ahab insung bangin thilse abolin ahi: ajehchu apa thinungin amaho chu amanthahna dinga thumopmin apanguvin ahi.

⁵Amajong amaho thumop bangchun achonin, Israel lengpa Ahab chapa Jehoram toh kilhonin Syria lengpa Bazael toh kisatdin Ramoth-Gilead'a achen: chule Syria mihon Joram chu amavouvin ahi.

⁶Chuin Syria lengpa Hazael toh Ramoth'a akisatna-a amachanjeh-in, kijendam dingin Jezreel'a ahung kiletai. Chuin ama adamlou jehchun, Judah lengpa Jehoram chapa Azariah chu Ahab chapa Jehoram ve dingin Jezreel'a ache suh-in ahi.

⁷Chule Joram henga Amaziah ahungchu amanthahna dinga Pathen thilgon ahi: ajehchu ama ahung chun, Pakaiyin Ahab insung sumang ding thao anu Nimshi chapa Jehu doudin Jehoram toh akondoh lhonin ahi.

⁸Chuin ahung hitin ahi, Jehu'n Ahab insung chunga thutana anei laijin, Judah pipuiho le Ahaziah sopiho chapaten Ahaziah ajenu chu amun, amaho chu athat tan ahi.

⁹Chuin aman Ahaziah aholin; chule amahon ama amanun, (ajehchu ama Samaria'a anakisel ahin,) Jehu henga ahin puijun ahi. Chuin amahon ama atha jouvun avui taovin ahi. Ajehchu amahon, Amahi alung pumpi-a Pakai hola Jehoshaphat chapa ahi, atiuve. Hitichun Ahaziah insung miten lenggam chunga lengvaipo ding anei tapouvin ahi.

¹⁰Ahinla Ahaziah nu Athaliah'in achapa thi amu phatnin, akipatdoh-in Judah insunga lengte chilhah jouse athat gamtan ahi.

¹¹Ahinla lengpa chanu Jeho-shabeath'in Ahaziah chapa Joash chu akithatna leng chapate lah-a konin agudoh-in, adonnu toh indan sung khatna akoitai. Hitichun Jehoram lengpa chanu Jehoiada thempupa jinu Jeho-shabeath chun (ajehchu amanu Ahaziah sopinu hija ahi,) amanun amapa atha louna dingin, Athaliah'a konin aselin ahi.

¹²Chuin ama chu amahotoh kumgup sung Pathen in'a akiselin: chule gamsunga chun Athaliah'in lengvai apon ahi.