Read Thado Chin 2 Thusimbu 23 Bible Online

2 Thusimbu 23 - Thado Chin bible

2 Thusimbu 23

¹Chuin kum sagi lhinna-in Jehoida akisuhat nin, Ja lamkaiho, Jeroham chapa Azariah, Jehohanan chapa Ishmael, Obed chapa Azariah, Adaiah chapa Maaseiah, chule Zichri chapa Alishaphat apuijin, amato kitepna aneijin ahi.

²Chuin Judah gam achonleuvin, Judah khopiho-a konin Levi mite le Israel phung upaho jouse akhomun, Jerusalem'a ahungun ahi.

³ Chuin houkhom ho jouse Pathen insung lengpa toh thulhun asemuvin ahi. Chuin aman ajah uva, Veuvin Pakaiyin David chapate thudol asei banga, lengpa chapan lengvai apohding ahi.

⁴Nanghon nabol dingu chu hiche ahi; choldoni-a lutji thempuho le Levi ho lah-a hopthum-a hopkhat chu kotngah-a napandiu,

⁵Hopthum-a hopkhat lengpa in'a; chule hopthum-a hopkhat chu kotpi bula napandiu: chule mipi ho jouse chu Pakai in hongcha ho-a umdiu ahi.

⁶Ahinla thempuho le kinbola pang Levi ho tailou koimacha Pakai insung hunglut louding ahi; amaho athenjeh uva lutdiu ahin: mipi ho jouse vang Pakai anga dingu ahi.

⁷Chule Levi miten akhutna manchah kichoijuva lengpa chu aum kimvel diu; koi hijongle insung hunglut chan chu kithat ding ahi. Ahinla nanghon lengpa chu ahunglut le apotdoh teng naumpi jingdiu ahi, ati.

⁸Hitichun Levi ho le Judah te jousen Jehoida thempu thupeh bangtah-in abolun, chule amitakipmin choldoni-a hunglut ding amiho chu choldoni-a potdoh dingho chutoh apuijun ahi; ajehchu Jehoida thempupan anatoh-u angahsah louvu ahi.

⁹Chukalvalin Jehoida thempupan ja lamkaiho chu Pakai in'a um David lengpa tengcha ho le lumho chu apen ahi.

¹⁰Chuin aman miho jouse chu amitakip akhutna galvon kengcheh-in houin jetlama pat veilam geijin, maicham le houin lhung lhonin lengpa kimvela adin sah-in ahi

¹¹Chujouvin amahon leng chapa ahin puidoh-un, achunga lallukhuh akhuh peh-un, thulhun chu apeuvin, lengin asemtaove. Chuin Jehoiada le achapaten thao anuvin, Pathen'in lengpa huhhing hen atiuve.

¹²Tun Athaliah'in mipi alhai gin le lengpa vahchoina husa ajah phatnin, Pakai insunga mipi henga chun ahungin,

¹³Amanun agahven ahile, veuvin, insung lutna-a khompi phunga chun lengpa adingin, chule lengpa koma chun pipuiho le sumkon mutho adingun: gamsung mipi jouse akipah-un, sumkon amutnun, lasahon jong akihil bangun manchahto thon avahchoijun ahi. Chuphatnin Athaliah'in apon abot eh-in, Kidouna, kidouna, atin ahi.

¹⁴Hichun Jehoida thempupan janel chunga lamkaija akoi ja lamkaiho chu apuidoh-in, ajah uva, Amanu chu milah-a konin puidoh unlang, amanu juichan chu chemjamin thatnun, ati. Ajehchu thempupan, Amanu chu Pakai insunga that hih-un ati, ahi.

¹⁵Hitichun amahon achunga akhut alhaovin; lengpa in khoma sakol lutna kotpi phung ahunggei phatnin, chua chun amanu athat taovin ahi.

¹⁶Chuin Jehoiada'n ama le mipi ho jouse le lengpa kah-a chun Pathen mite ahina diuvin kitepna asemin ahi.

¹⁷Hichun mipi jouse Baal in'a acheuvin, amaichamho le amilimho asuchimun, maicham meija chun Baal thempu Mattan chu athat taove.

¹⁸Chujongle Jehoiada'n Pakai in'a natoh ding jouse chu, Mosi danthu bu-a kimu dungjuija David'in ana gontup bangchun, Pakai insunga kipah le lasa puma Pakai henga govam thilto tohdoh dinga David'in anahoptoh Levi mite thempuho khutna apedoh-in ahi.

¹⁹Chule aman imalam jouse-a thenglou tapou khatcha alut louna dingin, Pakai in kotpi-a kotngah ho akoijin ahi.

²⁰Chuin aman ja lamkaiho, milunho, mipi chunga vaipoho le chuche gama mipi ho jouse chu apuijin, Pakai in'a konin lengpa chu apuilhasuh-un: kotpi sang palgalkai jin leng in lama acheuvin, lengpa chu alenggam laltouna-a atousah taove.

²¹Chule gamsung mipi jouse akipah-un: Athaliah chemjam'a atha phatnun, khopi chu lung mongin aumtan ahi.