Read Thado Chin 2 Thusimbu 24 Bible Online

2 Thusimbu 24 - Thado Chin bible

2 Thusimbu 24

¹Joash chu alengchan patchun kum sagi ahibepmin, Jerusalem'a kum somli aleng changin ahi. Anu min chu Zibiah ahin, Beersheba mi ahi.

²Jehoiada thempu nikho laisen Joash'in Pakai mitmun adih abolin ahi.

³Chule Jehoiada ama dingin ji ni apuipeh-in, aman chanu chapa ahingin ahi.

⁴Chuin hiche jouhin ahitin ahi, Joash'in Pakai in semphat ding alungviltai.

⁵Chuin aman thempuho le Levi ho akhomin, ajah uva, Judah khopiho-a cheovinlang, akum kum-a Pakai in semphatnadin Israel mijouse henga dangka gadong khomun, chule hiche natoh hi nakino sah dingu ahi, ati. Ahinla Levi ho chu akino pouvin ahi.

⁶ Chuin lengpan thempu chungnung Jehoiada chu akouvin, ajah-a, I-atile Pakai soh Mosi le Israel houkhom ho thupeh dungjuija hettohsahna houbuh-a dinga tokhom chu Judah le Jerusalem'a kona gadongkhom dinga Levi mite nasol louham?

⁷Ajehchu numei phalounu Athaliah chapaten Pathen in chu asuseuvin; Pakai in'a thil kikatdoh jouse jong Baal'a dingin apedoh gam taovin ahi, ati.

⁸Chuin amahon lengpa thupeh-in sumbom asemun, hichu Pakai in kotpi polama akoijun ahi.

⁹Chuin gamthipma Pathen soh Mosi'n Israelte chunga anapohsah tokhom chu Pakai henga ahinchoi diuvin, Judah gamjouse le Jerusalem'a asam phong taovin ahi.

¹⁰Chuin pipuiho jouse le mipi ho jouse athanomun, ahinchoijun, apehchai kahseovin sumbom sunga alehlut nun ahi.

¹¹Tun ahung hitin ahi, hichelai chun sum thingkhong chu lengpa natohna mun'a Levi ho khutnin ahin domlutnin, sum tampi aumtai ti ahet phatnun, lengpa thuchingpa le thempu chungnung vaipoho ahungun, sumbom chu ahongun, aladoh-un, chule amun mama-a agakoi kitnun ahi. Hitichun niseh in abolun, sum tampi akholdoh taovin ahi.

¹²Chuin lengpa le Jehoiada'n hicheho chu Pakai in'a natong kinbolho apedoh lhonin; chule amahon Pakai in semphat nadin songkheng hole thingthem ho agoijun, chujongle Pakai in chu bolpha dingin thih le sum-enga semphaho jong agoijun ahi.

¹³Hitichun natong hon atongun amaho-a konin natoh chu amolsouvin, Pathen in chu amasalai bangin atungdoh-un, asudet taovin ahi.

¹⁴Chuin ajophatnun sumval chu lengpa le Jehoiada henga ahinchoijun, hichea chun Pakai in'a ding um le bel ho, kinbol nading le thiltona ding manchah ho, thihkhe ho, sanale dangka umle bel ho asemuvin ahi. Chuin Jehoiada nikho laisen Pakai in'a chun govam thilto tanglouvin atoh jinguvin ahi.

¹⁵Ahinla Jehoiada chu atehlheh tan, nikho alhingsetnin athin; athi chun kum jakhatle somthum ahitai.

¹⁶Chule Israelte lah-a Pathen'a ding le a-in dinga thilpha aboljeh-in, amahon David khopi-a lengho lah-a avuitaove.

¹⁷Tun Jehoiada thinungin Judah pipuiho ahungun, lengpa chu jana ahung peuvin ahi. Chuin lengpan amaho angaipeh tan ahi.

¹⁸Chuin amahon apu apateu Pakai Pathen in adalhauvin, thingbul le milim semthuho ahou taove: chule hiche suhkhelna jeh hin, Judah le Jerusalem chunga lunghanna achutai.

¹⁹Ahinla aman amaho chu Pakai henga hinlepui kit dingin themgaoho asolin; chule amahon amaho dounan thu aseijun: ahinla angaipeh pouve.

²⁰ Chuin Jehoiada thempupa chapa Zechariah chunga Pathen lhagao ahung chun, amachu miho chunglama adingin, ajah uva, Pathen'in hitin aseije, Nakhantou louna diuva ibola Pakai thupeh chu nasuhkhelu ham? Nanghon Pakai nanungsun tah jeh-un, amanjong nangho nanungsun taove, ati.

²¹Chuin ama dounan guhthimin akihou khomun, Pakai inhong sunga chun lengpa thupeh-in songin aseplih taove.

²²Hitichun Joash lengpan apa Jehoiada'n ama anahepina ageldoh tapon, achapa chu athat tan ahi. Chuin athi konin, Pakaiyin hinvehen lang, hinlethuh hen, ati.

²³Chuin kumlhun phatnin ahitin ahi, Syria sepaite chu ama doudingin ahung kontouvun; amaho Judah le Jerusalem'a ahungun, mipi lah-a kona pipuiho jouse athat gamun, amaho-a kona achomdoh jouse chu Damascus lengpa athot soh hel taove.

²⁴Ajehchu Syria sepaiho hon lhomcha hunguva ahin, Pakaiyin janel mihon tamtah chu amaho khutna apedoh tan ahi; ajehchu amahon apu apateu Pakai Pathen anungsun taovin ahi. Hitichun amahon Joash chunga thutanna anei taove.

²⁵Chuin amahon ama adalhah phatnun, (ajehchu natna nasatah thoh puma adalhah-u ahi,) Jehoiada chapate thisan jehchun asohte guhthimin akihou somun, ajalkhuna athatnun, ama athitai. Chuin David khopi-a avuijun, lengte lhanna vang avuipouve.

²⁶Chule ama douna-a guhthima kihou somho chu hichehohi ahiuve; Ammon mi Shimeath chapa Zabad, Moab mi Shimrith chapa Zehozabad ahilhone.

²⁷Tun achapate thudol le, achungah pohgih natsatje thu, chule Pathen in kisemphat thudol chu, veuvin, lengho thusimbua akisun chen cheh-in ahi. Chuin achapa Amaziah chu ama akhelin alengchang tan ahi.