Read Thado Chin 2 Thusimbu 25 Bible Online

2 Thusimbu 25 - Thado Chin bible

2 Thusimbu 25

¹Amaziah chu alengchan patchun kum somni le kumnga ahin, Jerusalem'a kum somni le kumko aleng changin ahi. Chule anu minchu Jehoaddan ahin, Jerusalem mi ahi.

²Chule aman Pakai mitmu-a adih abolin, ahinla lungthim chamkimtah-in abolpon ahi.

³Tun ahitin ahi, lenggam chu ama-a akiphudet phatnin, apa lengpa anathat asohho chu athat tan ahi.

⁴ Ahinla achate chu athatpoi; Mosi danthupeh lekhabua kisun, Pate chu chate jeh-a thilou ding, chate dinga jong pate jeh-a thilou ding, amavang mitin ama chonset jeh-a thiding ahi, tia Pakaiyin athupeh bangchun abolin ahi.

⁵Chukalvalin Amaziah'in Judah te akhom khomin, Judah le Benjamin gamsunga apu apateu insung kailhah dungjuijin sang chunga lamkai le ja chunga lamkaijin apansah-in: chule kum somni-a pat chunglamse asima ahile, tengle lum choija gal konthei lhentum cheh mi sangjathum aumuvin ahi.

⁶Aman Israel gama kon mihat mihangsan cheh sangjakhat jong dangka talent jakhat-in athalah-e.

⁷Ahinla ahenga Pathen mi khat ahungin, Vo lengpa, Israel galsat ho chu lhonpi hih-in; ajehchu Pakaiyin Israel le Ephraim chate aumpipon ahi.

⁸Ahin nache ding ahi jongle, boljengin, galsat dingin kisuhatnin: Pathen'in melmate masanga nalhuhsah ding ahi; ajehchu Pathen'in panpi theina le pailhah theina thahat anei ahi, ati.

⁹Chuin Amaziah'in Pathen mipa jah-a, Achutile Israel sepaiho kapeh dangka talent jakhat chu i-ilo dingu hitam? ati. Chuin Pathen mipan adonbutnin, Pakaiyin chuche sanga gamchenga tamjo napehthei ahi, ati.

¹⁰Chuphatnin Amaziah'in Ephraim'a kona ahenga hung sepaiho chu in'a kile kitdin achom khentai. Hijeh chun Judah te chunga alunghang lheh jengun, lunghang tah-in inlama akilekit taove.

¹¹Chuin Amaziah akisuhat nin, amite chu apuidoh-in, chi phaichama acheuvin, Seir miho chu sangsom jen athatnun ahi.

¹²Chuin ahing hoiju sangsom dang chu Judah ten gal hingin akaijun, songpi chungvuma akaitouvun, songpi vuma konin asonlhaovin, abonchauvin agoisoh jengun ahi.

¹³Ahinla Amaziah'in amatoh galsatna chelou dinga anungsolho chu Samaria apat Beth-horon geijin Judah gam khopiho chunga achuvin, mi sangthum athatnun, thilchom tamtah akipoh uvin ahi.

¹⁴Tun ahitin ahi, Edom mite athana-a Amaziah ahung kilekit phatnin, Seir chate pathenho chu ahinpon, a-pathen dingin atungdoh-in, a-anguva chun akunin, ahenguva gimnamtui ahalin ahi.

¹⁵Hijeh chun Amaziah chunga Pakai lunghan akongjahtan, ahenga themgao khat ahin solin, ama chun ajah-a, Ipi dinga nakhutna kona amite huhdohjoulou chuche mite pathenho najuiham? ati.

¹⁶Chuin ahitin ahi, ajah-a thu aseilai chun, lengpan ajah-a, Nangma lengpa thumopma kisem nahim? kithipmin, ibola kithat ding nahim? ati. Chuin themgaopa chu akhongaijin, Nangman hichehi nabola, kathumop nasan loujeh-in, Pathen'in nangma suhmangdin nagotai ti kahei, ati.

¹⁷Chujouvin Judah lengpa Amaziah'in mi thuhilna alan, Israel lengpa Jehoahaz chapa, Jehu chapa, Joash henga mi asolin, Hungin khatle khat kimaito-in kisat hite, agatisah-e.

¹⁸Chuin Israel lengpa Joash'in Judah leng Amaziah henga, Lebanon'a lingphungin Lebanon'a cedar phung jah-a, kachapa jiding nachanu neipen ati; chuin Lebanon'a konin gamsa khat ahungin, lingphung chu achon lhutan ahi.

¹⁹Nangman, Ven, keiman Edom mite kajouve natin, nalung thimin nangma kihoitho sah dingin nadom kangin ahi: tun na-in'a kium thimin; ibola nangma le naumpi Judah mite lhuhna dinga kisalung gima nahim? ati.

²⁰Ahinla Amaziah'in ngaisah ding agopon ahi; ajehchu Edom mite pathenho ahoujeh uva, amelmateu khutna apehdoh theina dinga Pathen thilgon hija ahi.

²¹Hitichun Israel lengpa Joash ahung kontouvin, amale Judah lengpa Amaziah chu kimaito-in Judah gamsunga um Beth-shemeash'a kimaiton akisat lhontai.

²²Chuin Judah ten Israelte masanga gal alel taovin, amitakip aponbuh cheh uva ajam taove.

²³Chuin Israel lengpan Jehoahaz chapa, Joash chapa, Juda lengpa Amaziah chu Beth-shemesh'a amanin, Jerusalem'a ahinkaijin, Jerusalem kulbang chu Ephraim kotpi-a pat kulning kotpigei tong jalijen asuchimin ahi.

²⁴Chuin aman Pathen insunga sana le dangka, chule um le bel ho jouse chu, lengpa in'a gouchinga pang Obed-edom le lhachaho pumin akaijin, Samaria'a akiletai.

²⁵Chuin Judah lengpa Joash chapa Amaziah chu, Israel lengpa Jehoahaz chapa Joash thinungin kum somle kumnga ahing nalaije.

²⁶Tun Amaziah thilbol dangho jouse abula pat ajogei chu, vetan, Judah le Israel lengte lekhabua kisunlut hilouham?

²⁷Tun Amaziah'in Pakai anungsun jouvin, Jerusalem'a chun ama dounan galguh abol taovin, chule ama Lachish'a ajamtai; ahinla Lachish'a mi anungdel sah-un, hia chun athat taove.

²⁸Chuin sakol ho chunga ahinpouvin, Judah khopi-a chun apu apate toh avuikhom taove.