Read Thado Chin 2 Thusimbu 27 Bible Online

2 Thusimbu 27 - Thado Chin bible

2 Thusimbu 27

¹Jotham alengchan pat chun kum somni le kumnga ahin, Jerusalem'a kum somle kumgup aleng changin ahi. Anu min chu Jerushah ahin, Zadok chanu ahi.

²Chuin aman apa Uzziah'in anabol jouse dungjujin Pakai mitmu-a adih chu abolin ahi: ahijeng vangin ama Pakai houin sunga analutpoi. Ahin mipichun thilphalou abol nalaijun ahi.

³Aman Pakai houin kotpi sang chu asan, chule Ophel kulbang chu nasatah-in asan ahi.

⁴Chukalvalin Judah molsang ho-a khopiho asan, gam mangho-a chun in thupi tahtah le insangho asan ahi.

⁵ Ammon lengpa tojong akisatnin, amaho chu ajouvin ahi. Chule Ammon chaten hiche kum mama chun dangka talent jakhat toh suhlouchang atena dim sangsom le sakolchang atena dim sangsom apeuvin ahi. Hitichun Ammon chaten amachu akum ninale thum na-in jong tamtah tah apeuve.

⁶Hitichun jotham'in Pakai Pathen anga alampi akigontup jeh-in, ahung hat lhehtan ahi.

⁷Tun Jotham thilbolho dangho jouse, agalbolho jouse, alamlhah jouse chu, veuvin, Israel le Judah lengte lakhabu-a akijihlut cheh-e.

⁸Ama alengchan pat chun kum somni le nga ahin, Jerusalem'a kum somle kumgup lengvai apon ahi.

⁹Chuin Jotham apu apate toh alumkhomin, David khopi-a avuitaove: chuin achapa Ahaz chu ama khelin alengchang tan ahi.