Read Thado Chin 2 Thusimbu 29 Bible Online

2 Thusimbu 29 - Thado Chin bible

2 Thusimbu 29

¹Hezekiah alengchan pat chun kum somni le kumnga ahin, Jerusalem'a kum somni le kumko aleng changin ahi. Anu minchu Abijah ahin, Zekeriah chanu ahi.

²Ama apa David'in anabolho jouse bangin Pakai mitmu-a adih abolin ahi.

³Alengchan kipat kum, lha masapen-in Pakai in kotho chu ahongin, asemphan ahi.

⁴Aman thempuho le Levi ho apuilutnin, solam khopi lamlena akhom khomin,

⁵Chuin ajah uva, Nangho Levi ho, kathu ngaijun, tun nanghole nangho kisuthengun lang, napu napateu Pakai Pathen in jong suthengun, chule munthenga konin abohho chu podoh uvin.

⁶Ajehchu ipateovin asukhelun, Pakai i-Pathen'u mitmu-a thilphalou anabolun, chule ama adalhaovin, Pakai chenna mun'a konin amai aheimangun, anung ngat taove.

⁷Chujongle hongcha kotho akhah-un, meivah ho asumitnun, muntheng sunga chun Israel Pakai Pathen henga gimnamtui ahal pouvin chule govam thilto jong atohpouve.

⁸Hijeh chun Pakai lunghanna chu Judah le Jerusalem mite chunga achutan, namit tah uva namu-u bangin boina, lungkidanna, chule khoisatna henga apedoh taovin ahi.

⁹Ijeh inem itile veuvin, ipu ipateu chu chemhemin alouvun, hichejeh hin ichapateu le ichanuteu chule ijiteu asohchang taove.

¹⁰Tun alunghana tijat umtah chu eihoa kona aheimang theina dingin, Pakai Israel Pathen toh kitepna semding kalunga aumin ahi.

¹¹Ka chapateho, tun nahsahmon bolhih-un: ajehchu Pakaiyin nangho hi a-angsunga dingding, ama jending, alhacha na tongding, chule gimnamtui hal nadinga nalhenu ahi, ati.

¹²Hichun Levi miho chu, Kohath chapate lah-a kon Amasai chapa Mahat le Azeriah chapa Joel: chule Merari chapate lah-a kon Abdi chapa Kish, Jehalelel chapa Azariah: Gershon mite lah-a kon Zimmah chapa Joash le Joash chapa Eden,

¹³Chule Elizaphan chapate lah-a kon Shimri le Jeiel: Asaph chapate lah-a kon Zechariah le Mattaniah,

¹⁴Chule Heman chapate lah-a kon Jehiuel le Shimei: Jeduthun chapate lah-a kon Shemaiah le Uzziel akipat doh-un ahi.

¹⁵Chuin asopiteu akou khomun, akisuthengun, Pakai thua kona lengpa thupeh dungjuijin Pakai in sutheng ding chun ahungtaove.

¹⁶Chuin thempuho chu asutheng dingin Pakai in sungnunga alutnun, Pakai houin sung athenglou amujouseu chu Pakai inhong sunga ahinpodoh uvin ahi. Chuin Levi mihon Kidron vadung lama pohdoh dingin alauvin ahi.

¹⁷Tun lha masapen nimasanin asutheng pannun, chuchelha nigetnin Pakai hongcha-a ahungun, niget sungin Pakai in chu asuthengun, lha masa nisomle nigupnin ajona asemtaove.

¹⁸Chuin Hezekiah lengpa henga ahungun, ajah-a, Pakai in jouse le govam thiltona maicham chu a-umle belho jousetoh, chule vetsahna changlhah dokhang chu a-umle bel jouse toh kasutheng soh hel taove.

¹⁹Chukalvalin Ahaz lengpan alengvaipoh laija asuhkhelna apaimang um le bel jouse chu kagong toh-un, kasutheng uvin, chule ven, hicheho chu Pakai maicham masanga aumuve, atiuve.

²⁰Hichun Hezekiah lengpa matah-in athouvin, khopi sunga vaihomho akhomin, Pakai houin lama achetou taove.

²¹Chuin lenggam le muntheng chule Judah dinga chonset thilto dingin bongchal sagi, kelngoichal sagi, kelngoinou sagi, chule kelchal sagi ahin kaijun ahi. Chuin hicheho chu Pakai maicham chunga tohdoh dingin Aaron chapate thempuho chu athupeh-in ahi.

²²Hitichun bongchal ho chu athatnun, thempuhon athi chu alauvin, maicham chunga atheuvin; hitobang machun kelngoichal ho chu atha phatnun, athi chu maicham chunga atheuvin; kelngoinou ho jong athatnun, athichu maicham chunga atheuvin ahi.

²³Chuin kelchalho chu chonset thilto dingin lengpa le houkhom ho masanga ahinkaijun; hicheho chunga chun akhutnu angamun:

²⁴Chuin thempu hon hicheho chu athatnun, Israelte jouse-a dinga lhatdohna bolna dingin maicham chunga athisana kichamna asemun ahi: ajehchu lengpan govam thilto le chonset thilto chu Israelte jouse-a dinga boldingin athupeh-in ahi.

²⁵Chuin David le lengpa themgao Gad chule Nathan themgao thupeh bangin, Pakai in'a chun Levi ho chu thih khutbeh, tumging le selangdah ho tumdin akoijun ahi: ijeh inem itile hitia chu boldinga Pakaiyin athemgaoho-a kona thu apeh ahi.

²⁶Chule Levi ho chu David manchah ho toh, chule thempuho chu sumkon toh adingun ahi.

²⁷Chuin Hezekiah'in maicham chunga chu govam thilto ato dinguvin thupeh aneijin ahi. Chuin govam thilto atopat phatnun, sumkon le Israel lengpa David manchah ho toh kithon Pakai la chu asapan taovin ahi.

²⁸Chuin houkhom ho jousen Pathen ahouvun, lasahon la asauvin, sumkon mut hon sumkon amutnun: hicheho jousehi govam thilto kichai kahsen aboljom jingun ahi.

²⁹Chuin thilto ajophatnun, lengpa le aumpiho jouse akunun, Pathen ahou taovin ahi.

³⁰Achung chonin lengpa Hezekiah le pipuihon David le mitvanei Asaph sem Pakai la sadingin Levi ho thu apeuvin ahi. Chuin amahon kipahtah-in vahchoi la asaovin, akunun Pathen ahou uvin ahi.

³¹Hichun Hezekiah'in adonbutnin, Tun nangho Pakaiya dinga kisuhtheng nahitah-u toh kilhonin, hung naijun lang ganlhaina le thangvahna thilto hochu Pakai in sunga hin choijun, ati. Chuin houkhom ho chun ganlhaina le thangvahna thilto hochu ahinchoi lutnun; chule alungthima kiphalna neichan chun govam thilto atoh-un ahi.

³²Chule houkhom ho hinto govam thilto jat chu bongchal somsagi, kelngoi chal jakhat, kelngoi nou jani ahi. Hicheho jousehi Pakai henga govam thilto-a ding ahi.

³³Chule thil kithensoho chu bongchal jagup le kelngoi sangthum ahi.

³⁴Ahinla thempuho alhom behseh jeh-u chun govam thilto jouse chu avun alipjou pouvin; hijeh chun natoh kichai kahsehle thempu dangho akisuhtheng kahseuvin asopihou Levi ho chun akitho piuvin ahi: ajehchu amaho le amaho kisuhtheng nalama Levi ho chu thempuho sangin alungdih jouvin ahi.

³⁵Chujongle govam thiltoho, chamna thilto-a dinga athao ho, chule govam thilto jouse-a dinga don thiltoho chu atamlheh jengin ahi. Hitichun Pakai houin lhacha natoh dan chu akigoltoh chetnin ahi.

³⁶Chuin Pathen'in mipi agontup jeh chun Hezekiah le mipi chu akipah lheh jenguvin ahi: ajehchu thilchu photlotna kibol ahi.