Read Thado Chin 2 Thusimbu 3 Bible Online

2 Thusimbu 3 - Thado Chin bible

2 Thusimbu 3

¹ Chujouvin Solomon'in Jerusalem'a um Moriah molsang, apa David henga Pakai kilahna mun, Jebus mi Ornan pholmun David'in anagona mun'a chun Pakai in chu asapantan ahi.

²Alengchan kum lina, alhani na, nini chan nin insah akipantan ahi.

³Tun hichehohi Pathen in kisah dingdan Solomon anakihil chu ahi. Adunglam chu tena masa dungjuijin tong somgup ahin, avaichu tong somni ahi.

⁴Chule inmai lama um hongcha dunglam chu invai dungjuijin tong somni ahin, asanlam tong jakhatle somni ahin: asunglam chu sana theng twijin aloijin ahi.

⁵Chule aman in alenjo sung chu chahthingin athopmin, hichu sana thengin aloijin, achunga chun tumthingho le thihkhao kiphan lim aseme.

⁶Chuin in chu ahoinadin song mantamin ajemin, sana chu Parvaim gam sana ahi.

⁷Aman in chu a-inkamho, akhomho, abangho, akotho chu sana in aloijin; bangho chunga chun Cherub limho asemin ahi.

⁸ Aman in theng chungnung asemin, adung chu invai dungjuija tong somni ahin, avai jong tong somnima ahi: chuin aman sana thengset talent jagup man jenin aloijin ahi.

⁹Chule akilnaho chu sana shekel somnga-a gih ahin, chule indan chungnung chu sana-a kiloi ahi.

¹⁰ Chule intheng chungnung sunga chun Cherub ni lim asemin, sana in aloijin ahi.

¹¹Cherub teni lhachu tong somni asaovin: Cherub khat lha langkhat chu tong nga ahin, inbang chu aphan ahi: hiche bang chun alha langkhat jong tong nga ma ahin, Cherub khatpa lhaving chu aphai.

¹²Chule Cherub khatpa lhaving langkhat chu tong nga ahin, inbang chu aphan; alhaving dang jongchu tong nga ahin, Cherub khatpa lhaving chutoh akimatnin ahi.

¹³Hiche Cherub teni lhavingho chu tongsomni akijalin, amani akengin adinglhonin, amailhonin sunglam angatgel lhone.

¹⁴ Chule aman ponjal adum, asanthip, asandup, chule tupat ponnem asemin; achunga chun Cherub ho lim achonsah-e.

¹⁵Aman inmaija chun khom ni tong somthum le nga sanggel jong asemin, achungvuma alujum lhon chu tongnga gel ahi.

¹⁶Chuin aman muntheng insunga bangin thihkhao kiphan asemin, khomteni leh-a akhaijin, chule khombula chun kolbuthei lim jakhat asemin, thihkhao kiphana-a chun akoije.

¹⁷Chule aman Houin maija chun khompi ni, khat chu jetlama, khat veilama atungdoh-in; chule jetlama pa minchu Jachin asah-in, veilamapa minchu Boaz asah-in ahi.