Read Thado Chin 2 Thusimbu 30 Bible Online

2 Thusimbu 30 - Thado Chin bible

2 Thusimbu 30

¹Chuin Hezekiah'in Israelte le Judah te jouse henga mi asolin, chule Ephraim le Manasseh henga jong, Pakai houin Jerusalem mun'a ahunguva, Israel Pakai Pathen henga kalchuh kut ahung manna diuvin lekha athotnin ahi.

² Ajehchu lengpa le apipuiho chule Jerusalem'a houkhom ho jouse chu lhanina-a kalchuh kut mang dinga kihoutoh-u ahi.

³Ajehchu thempuho bulhing setna akisuh theng lou jeh-u le, mipi ho jong Jerusalem'a ahung kikhopkhom loujeh uva, hichepetna chu amanthei louvu ahi.

⁴Chule hiche thilhin lengpa le houkhom ho jouse alung lhaisah lheh-in ahi.

⁵Hitichun Beersheba'a pat Dan geija Israelte jouse henga, Jerusalem'a ahunguva Israel Pakai Pathen henga kalchuh kut ahungman diuva phonjal dingin akilol lha taovin ahi: ajehchu akisutdan bangtah a phat sottah anabol louvu ahitai.

⁶Hitichun lekha thah ho chu lengpa le pipuiho-a kona lekhathot pumin Israel le Judah gamjousea acheuvin, lengpa thupeh bangin hitin agaseijuve, Israel chate, nangho Abraham, Isaac, chule Israel Pakai Pathen henga hungkileuvin, chutile ama nangho Assyria lengte khutna kona hoidoh amohho henglama hungkile kitding ahi.

⁷Chule nangho apu apateu Pakai Pathen douna-a sukhela napu napateu le nasopiteu bangin umhih-un, hijeh-a chu namu-u bangahi aman amaho chu akamhel dinga apehdoh-u ahitai.

⁸Tun nangho napu napateu bangin lungtah hih-un, Pakai henga nangho le nangho kipelut unlang, a-itih-a dinga asuhthengsa amunthenga chun lutjouvin: chule alunghana tijat umtah chu nangho-a kona aheimang theinadin, Pakai na Pathen'u kin boluvin.

⁹Ajehchu Pakai heng lama nahung kilehei kitnuva ahile, nasopiteu le nachateo chu hiche gama ahung kilekit nadinguva gal hinga akaimanghou angsunga lungsetna chang dingu ahi: ajehchu Pakai na Pathen'u chu lungset le hepina-a dim ahin, nangho ama heng lama nakile heijuva ahile, aman nangho-a kona amai aheimang louding ahi, atiuve.

¹⁰Hitichun lekha thah ho chu Ephraim le Manasseh chule Zebulun geipeh-in khopitina acheuvin: ahinla amahon anuisatnun anahsah pouvin ahi.

¹¹Ahijeng vangin Asher le Manasseh chule Zebulun mi phabep akineosah-un, Jerusalem'a ahungun ahi.

¹²Pakai thua kona lengpa le pipuiho thupeh jopnadin, Judah gamsung jong Pathen'in lungkhat aputsah uve.

¹³Chuin alhanina-in cholsolou changlhah kut mangdin Jerusalem'a mi tamtah, mipi atama tam akikhomun ahi.

¹⁴Chuin amaho akipatnun Jerusalem'a maicham ho chule gimnamtui halna maicham ho aladoh-un, Kidron vadunga aseplut taove.

¹⁵Hichun amahon lhanina nisomle nilinin kalchuh kut ding gan athatnun ahi: chuin thempuho le Levi ho chu ajahcha taovin, chuphatnin amahole amaho akisuthengun, govam thiltoho chu Pakai insunga alalut taovin ahi.

¹⁶Chuin Pathen mi Mosi danthu dungjuijin, amaho chongai danin ama muncheh-a adingun: thempuhon Levi ho khutna alah-u thisan chu atheuvin ahi.

¹⁷Ajehchu houkhom ho lah-a mi tamtah kisutheng lou aum nalaijun: Pakaiya dinga suhtheng ahina diuva, athenglou takipma dinga kalchuh kut sa thapeh ding mopohna chu Levi ho changuva ahi.

¹⁸Ajehchu mipi choplop, Ephraim, Manasseh, Issachar le Zebulun'a kon mi tamtah chu kisutheng lou ahiuvin, ahinla akisun banglouvin amahon kalchuh kut an chu ane jenguvin ahi. Ahinla Hezekiah'in amaho ataopeh-in, Pakai Phatah chun amitakip,

¹⁹Munthenga kisuhthengna dungjuija thenga hihih jongle, Pathen, apu apateu Pakai Pathen holdinga alungsunga kigotna neichan chu ngaidamhen, ati.

²⁰Chuin Pakaiyin Hezekiah taona asanpeh-in, mipi chu asudamtai.

²¹Chuin Jerusalem'a um Israel chate chun cholsolou changlhah kut chu kipana nasatah-in nisagi amangun: Levi ho le thempuho chun ani anin Pakai avahchoijun, manchah gingtah pumin Pakaiya la asaove.

²²Chuin Hezekiah'in Pakai hetna phatah thuhila pang Levi ho jouse henga lhamona thu aseijin: amahon apu apateu Pakai Pathen henga chamna thilto atoh-un, chonset phondohna aneijun, chule kut ni sagi lhumkeijin aneuvin ahi.

²³Chuin khoppi pumpi chu nisagi bang manbe dingin akihouvun, kipahtah-in nisagi amanbe kitnun ahi.

²⁴Ajehchu Judah lengpa Hezekiah'in houkhom ho chu bongchal sangkhat le kelngoi sangsagi apen; chule pipuiho chun houkhom ho chu bongchal sangkhat le kelngoi sangsom apeuvin: thempu tamtah akisuthengun ahi.

²⁵Chuin Judah gam houkhom ho jouse, thempuho le Levi ho toh, chule Israel gama kona hungdoh houkhom ho jouse, Israel gama kona hungdoh-a Juda gama cheng gamdang mijouse jouse chu akipah-un ahi.

²⁶Hitichun Jerusalem'a kipana nasatah aume: ajehchu Israel lengpa David chapa Solomon nikho-a patnin chutobangtah kipana chu ana umkhapon ahi.

²⁷Chuphatnin thempuho le Levi ho chu akipat doh-un, mipi chu phatthei abohtauve: chuin athuseiju chu ngaipeh-in aumin, ataonao chu achenna muntheng van geijin alhungin ahi.