Read Thado Chin 2 Thusimbu 31 Bible Online

2 Thusimbu 31 - Thado Chin bible

2 Thusimbu 31

¹Tun hicheho jouse akichai nunghin, chua um Israelte jouse chu Judah khopiho-a acheuvin, song milimho avochipmun, thingbomho aphulhuvin, Judah le Benjamin gam, Ephraim le Manasseh gamho-a konin munsang ho le maicham ho jouse chu abeihel kahsen aphuhlhu uvin ahi. Chuin Israel chate jouse akinung leuvin, amitakip agoulona akhopi cheh uva akile taovin ahi.

²Chuin Hezekiah'in thempuho le Levi kihom khenho chu akihopkhen dungjuijun atoh dingu akomu peh-in, amitakip akinbol dingu dungjui cheh-in, thempuho le Levi ho chu govam thilto le chamna thilto toh ding, lhacha natong ding, thangvahna peding, Pakai ponbuh kotpi phunga vahchoi jingdingin angansen ahi.

³ Aman Pakai dan thupeh-a kisun banga, jingkah le nilhah-a dinga govam thilto ding; choldo nikho, lhathah nikho, chule kut bineiho-a dinga govam thilto dingho chu lengpa neile gouva konin aman apohdoh dingin agongin ahi.

⁴ Chukalvalin Pakai danthu-a akitilkhou theina diuvin Jerusalem'a cheng mipi ho chu thempuho le Levi ho chan pedingin athupeh-in ahi.

⁵Chuin thupeh ahung kithejal jal-in, Israel chaten chang, lengpitwi, thao, khoiju, chule lousoh jouse-a kon gamasaho chu ninglhing tah-in ahinpolut nun ahi.

⁶Chule Judah khopiho-a cheng Israel le Judah chate thudol chu, amahon jong bongchal le kelngoiho hopsom, chule Pakai a-Pathen uva dinga kikatdoh thilthengho hopsom ahinpeuvin, asevum jengun ahi.

⁷Lha thum na-a asetvum patnu ahin, lha sagina-in ajou uvin ahi.

⁸Chule Hezekiah le pipuiho chu ahunguva, akisevum chu amuphatnun, Pakai le amite Israelte chu phatthei aboh taovin ahi.

⁹Chuphatnin Hezekiah'in akisevum thudol chu thempuho le Levi ho chu adongin ahi.

¹⁰Chuin Zadok insung mi Azariah thempu chungnung'in adonbutnun, Mipihon Pakai insunga thilto ahinpohlut patnuva patnin nehding bulhing setnin kaneijun, tamtah avaldoh nalaijin ahi: ajehchu Pakaiyin amite phatthei aboh-in, chule thil hijatpi hi amoh chengse chu ahi, ati.

¹¹Chuin Hezekiah'in Pakai insunga chu indan sem dingin thu apen, chule amahon asem taovin,

¹²Chuin thiltoho le hopsom ho, chule thilpeh thengho chu tahsan umtah-in alhoh lutnun: hiche chunga chu Levi mi Conaniah chu vaipo ahin, asopipa Shimei chu ama noidou ahi.

¹³Chuin Jehiel, Azariah, Nahath, Asahel, Jerimoth, Jozabad, Eliel, Ismachiah, Mahath, chule Benaiah, mi hicheng hi Hezekiah lengpa le Pathen houin lamkai Azariah thupeh-a, Conaniah le asopipa Shimei khutnoija vetupma pang ahiuve.

¹⁴Chule solam kotpi ngah-a pang Levi mi Imnah chapa Kore chu, Pakaiya lungcham thilpehho vetuple, Pakaiya dinga thilpeh le thiltheng chung nungho homtoh ding ahi.

¹⁵Ama bana chu Eden, Miniamin, Jeshua, Shemaiah, Amariah, Shecaniah ahiuvin, amaho thempuho khopiho-a umuva, asopihou chu akihopkhenu dungjuija alen aneo kibanga chan ahoppeh dingu;

¹⁶Khanggui kisutna-a kisun pasal kum thuma pat chunglamse tilou, Pakai in'a hunglut amitakip chu akihopkhenu dungjuija nitina akin bolna-a amuding achan chu ahop dingu,

¹⁷Chule apu apateu ingsung kailhah-a dungjuija khanggui kisutna-a jao thempu-a pang le Levi miho kum somni-a pat chunglamse kihomkhena anatoh-u dungjui,

¹⁸Chule mipi jouse lah-a kona khanggui kisutna-a jao jouse, achasen hou, ajiteu, achapateu, chule achanuteu geija ahoppeh dingu ahi: ajehchu amaho akin boldiu kipe mun'a chu thenna-a kisutheng cheh ahiuve.

¹⁹Akhopihou kimvel loujao dunga cheng le khopi tina Aaron chapate thempuho thudola, thempuho lah-a pasal jouse le Levi mite lah-a kon khanggui kisutna-a kisimho jouse chan hoppeh dingin mi phabep akimin kutnin ahi.

²⁰Chule Hezekiah'in Judah gamsung jouse-a hitichun abolin, chule Pakai a-Pathen angsunga chun apha, adih, chule atah jeng abolin ahi.

²¹Chule Pathen houin kinbolna-a anatoh jouse ahin, danthu lam ahin, thupeh lam ahin, abula patnin a-Pathen aholin, alung pumpin atongin; hitichun akhangtou cheh cheh-in ahi.