Read Thado Chin 2 Thusimbu 32 Bible Online

2 Thusimbu 32 - Thado Chin bible

2 Thusimbu 32

¹Hicheng thilho kiphudet nunghin, Assyria lengpa Sennacherib ahungin, Judah gama alutnin, kulbang nei khopiho dounan gebuh asongin, ama-a dinga joding angaiton ahi.

²Chuin Hezekiah'in Sennacherib ahunga Jerusalem satding agot chu amu phatnin,

³Apipuiho le amihat hotoh khopi pama twinahho suhbing dingin akihouvun, amahon akitho piuvin ahi.

⁴Hitichun mipi tamtah akikhomun, gamsung lailunga long twinahho le vachaho atingun, Ipibola Assyria lengho, twi nengtah-a amu diuham? atiuve.

⁵Chuin ama akisuhat nin, kulbang kehlai jouse asaphan, insangho atungdoh-in, polama kulbang chom jong agensonin, chule David khopi-a um Millo jong asaphan, tengcha le lumdal jong ninglhing tah-in asemin ahi.

⁶Chuin mipi chunga gal lamkaiho atungin, amaho chu khopi kotpi lamlena chun ahenga akhomin, ahenguva lhamona thu aseijin, hitin ati,

⁷Hatnunlang hangun, Assyria lengpa ahiloule aumpi mipi ho jeh-in kicha hih-un, lungjong lungthoi hih-un: ajehchu ama umpi sangin eiho umpi atamjon ahi.

⁸Ama koma um chu tahsa bantha ahin; eiho koma vang Pakai i-Pathen'u chu eihuhdiu le igalteu satdinga uma ahi, ati. Chuin Judah te lengpa Hezekiah thuseija chun mipi chu alung ngam taovin ahi.

⁹Hiche jouhin Assyria lengpa Sennacherib'in asohte chu (ahinla amale aumpi agalhat ho jouse chun Lachish dounan kulpi akaijun ahi,) Jerusalem'a um Judah lengpa heng le Jerusalem'a um Judah mite jouse henga asolin, hitin agasei sah-e,

¹⁰Assyria lengpa Sennacherib'in hitin aseije, Jerusalem'a umkulsa naum nunguva, ipi-a kisong nahiuvem?

¹¹Hezekiah'in, Assyria lengpa khutna konin Pakai i-Pathen'un eihuh naovinte tia gilkel le dangchah-a nathi nadiuva bou najolu hilouham?

¹²Amunsangho le amaichamho sumanga, Judah le Jerusalem henga, Maicham khat angabou nahou uva, achunga gimnamtui nahaldiu ahi tia seija chu hiche Hezekiah mamahi hilouham?

¹³Kei le kapaten gamdangho chunga ipi kanabolu nahet lou uham? chuche gamsunga cheng namho pathenho chun amaho kakhutna kona anahuhdoh jou beh-um?

¹⁴Kapaten anasuh manghel-u namho pathenho lah-a kakhutna kona amite huhdoh-a koi ana uma, kakhutna kona na-Pathen'u chun nahuhdoh jou diuham?

¹⁵Hijeh chun tun Hezekiah chun nalhemlha hih-u hen, ahiloule najol lhahih-u hen, tahjong tahsan hih-un: ajehchu koimacha namle lenggam pathen khatchan amite chu kakhutna konle, kapate khutna konin anahuhdoh joupoi: na Pathen'un kakhutna kona nahuh dohding chu ichanna lhinglel jocheh hitam? ati, atiuve.

¹⁶Chuin asohten Pakai Pathen le asohpa Hezekiah dounan thu aseibe nalaijun ahi.

¹⁷Aman Israel Pakai Pathen tailtomna le ama dounan lekhathot jong asunin, Gamdangho namdang pathen hon amiteu kakhutna kona ahuhdoh louvu bangin, Hezekiah Pathen'in jong amite kakhutna konin huhdoh ponte, ati.

¹⁸Chujouvin khopi chu alah theina diuvin Jerusalem mite kulbanga um miho henga chun, kichatsah-a, suhboina dingin Judah te paovin awsang tah-in asapkhumun ahi.

¹⁹Amahon Jerusalem Pathen dounan, mihem khutna kisem leiset pathenho douna bangbepmin thu aseijun ahi.

²⁰Chuin hiche jeh hin, Hezekiah lengpa le Amoz chapa Isaiah themgao chu atao lhonin, vanlam sangin akaplhonin ahi.

²¹Chuin Pakaiyin vantil khat asolin, Assyria lengpa gebuh-a um mihat hangsan jouse, chule lamkaiho le vaipoho chu athatgam tan ahi. Hitichun maijum tah-in agamlama akiletai. Chuin a-pathen in'a ahung phatnin asunga kona hungpengho tahchun hiche munachun chemjamin athat taovin ahi.

²²Hitichun Pakaiyin Hezekiah le Jerusalem'a chengho chu Assyria lengpa Sennacherib khutna kon le adang jouse khutna konin ahuhdoh-in, lamtina apuihoijin ahi.

²³Chuin mi tamtah-in Jerusalem'a Pakaiya dingin thilpeh ahinpouvin, Judah leng Hezekiah chu apeove: hitichun hiche-a pat chun namjouse mitmun amachu choi-atnin aumtan ahi.

²⁴Hiche nikholai chun Hezekiah chu thina khopmin anatan, Pakai henga ataovin ahile, Aman ahenga thu aseijin, melchihna khat apen ahi.

²⁵Ahinla Hezekiah'in achunga phatna kibol dungjuijin alethuh pon ahi. Ajehchu alungthim akichoisang tan; hijeh chun amale Judah chule Jerusalem chunga Pathen lunghana achutan ahi.

²⁶Ahinla Hezekiah le Jerussalem'a chengho jouse chu alungsung hoithona-a konchun akineosah taovin, hitichun Hezekiah nikho sungsen achunguva Pakai lunghanna achutapoi.

²⁷Chuin Hezekiah'in nasatah-in haona le jabolna aneitan: aman ama dingin dangka, sana, songmantam, gimnamtui, lumle pho, chule thillu jat jouse khol khomna ding in akisah-in;

²⁸Chujongle chang le lengpitwi, chule thao khol khomna dingin in asan; chule ganhing namkim khumna dingin gan in asan, chule kelngoi ho-a dingin kelngoi hongho asemin ahi.

²⁹Chukal valin khopiho akisahdoh-in, kelngoihon le bonghonho ahaolheh jengin ahi: ajehchu Pathen'in neile gou atama tam apen ahi.

³⁰Hiche Hezekiah mamahin Gihon luipi sahnung jong atingkangin, David khopi lhumlam sanga jangpetnin alonsah-in ahi. Chuin Hezekiah chu anatohna jouse akhangtouvin ahi.

³¹Ahijeng vangin palaija hunga Babylon pipuho thudol, gamsunga thil kidang kibolho kholdinga ahinsol hou thudola vang; alungsunga umjouse ahetdohna dingle apatep nadingin, Pathen ama-a konin apotdoh-in ahi.

³²Tun Hezekiah thilbol danghole aphatnaho chu, veuvin, Amoz chapa Isaiah gaothil mun'a le Judah le Israel lengte lekhabua chun akisunlut cheh-in ahi.

³³Chuin Hezekiah chu apu apate toh alumkhomin, David chapate lhan thupipena chun avuitaove: chule athi chun Judah le Jerusalem'a chengho jousen jabolna apeuve. Chuin achapa Manasseh chu ama khelin alengchang tan ahi.