Read Thado Chin 2 Thusimbu 33 Bible Online

2 Thusimbu 33 - Thado Chin bible

2 Thusimbu 33

¹Manasseh lengchanpat chun kumsom le kumni ahin, Jerusalem'a kum somnga le kumnga aleng changin ahi.

²Ahinla Pakaiyin Israelte masanga kona anodoh pathen helou namhon thilbol thet umtah bangchun, Pakai mitmun thilphalou abolin ahi.

³ Ajehchu aman apa Hezekiah suhchimsa munsang ho chu asapha kitnin, Baal maicham ho atungdoh-in, thingbomho aphutnin, van janel jouse ahouvin, amaho chu ajenin ahi.

⁴ Pakaiyin, Jerusalem'a hi a-itih-a kamin umding ahi tia aseina mun, Pakai insunga jong chun maicham ho asemin ahi.

⁵Aman Pakai houin hongcha teni-a chun van janelho jouse-a dingin maicham atungdoh-in ahi.

⁶Aman Hinnom chapa phaicham meisung chu achate apalsah-in, phat ho jong anitnin, phun asangin, doi le ai amangchan, lhakou ho le mitpheldoi themho jong adongin: phinsetna lunghansah nadinga Pakai mitmun thilphalou tamtah abolin ahi.

⁷ Chule Pathen in sunga chun aman milim semthuho akoijin, Pathen'in David le achapa Solomon henga, Israel namjouse anga kana lhendoh hiche Jerusalem houin sungahi a-itih-a kamin kakoi jingding:

⁸Mosi khutna kona kapeh kadanthu jouse le kachona dan ho jouse, chule kachondan jouse atohdoh uva ahile, napu napateu dinga kanapeh leisetna kona jong Israelte keng kachondoh kit louhel ding ahitai tia aseina mun'a chun milim semthuho chu akoijin ahi.

⁹Hitichun Manasseh'in Judah le Jerusalem'a chengho chu Pakaiyin Israelte anga anasuhmang houbeiho sanga khohjo cheh-in thilphalou abolsahtan ahi.

¹⁰Chuin Pakaiyin Manasseh le amite henga thu anaseijin, ahinla amahon ngaipeh-in anei pouve.

¹¹Hijeh chun Pakaiyin Assyria sepai janel lamkaiho chu achunguva achuhsah-in, amahon Manasseh chu linglah-a akaijun, henkol abuvin, Babylon'a akaitaove.

¹²Chuin ama suhgentheija aumphatnin, Pakai a-Pathen aholtan, apu apate Pathen angsunga nasatah-in akineosah tan,

¹³Ahenga ataotai: chuin alungsetna achangin, ataona asanpeh-in, alenggam Jerusalem'a ahinpui kit tai. Chuphatnin Manasseh'in Pakai amachu Pathen ahi ti ahetai.

¹⁴Chuin hiche jouchun David khopi polama Gihon lhumlam vacha phaicham ngalim kotpi lutna geijin, chule Ophel gei umkimvelin kulpi asan, asana sangin atungdoh-in, Judah gama kulbang nei khopi jouse-a chun gal lamkaiho akoitai.

¹⁵Chuin gamdang pathenho le milimho chu Pakai in'a konin aladoh-in, Pakai in molsang Jerusalem'a anatundoh maicham ho jouse chu khopi polama apaidoh sohtai.

¹⁶Chuin Pakai maicham asemphan, achunga chun chamna thilto le thangvahna thilto ganlhai abolin, Judah te chun Israel Pakai ajen dinguvin thu apen ahi.

¹⁷Hijeng jongle mipihon munsang ho-a chun ganlhaina abol nalaijun, amavang Pakai a-Pathen'u hengabou abolu ahi.

¹⁸Tun Manasseh thilbol dangho le a-Pathen henga ataona, chule Pakai Israelte Pathen mina ahenga themgaoho thusei ho chu, veuvin, Israel lengte lekhabua akisun cheh-e.

¹⁹Ataonaho jong, chule Pathen'in iti alungsetnam; chule akineosah masanga achonsetna jouse le asuhkhelna jouse, munsang asahna munho jouse le thingbul le milim aphuho jouse chu, veuvin, themgaoho thusei ho lah-a akisun cheh-in ahi.

²⁰Hitichun Manasseh apu apate toh alumkhomin, amatah insunga avuitaove. Chuin achapa Ammon ama khelin alengchang tan ahi.

²¹Ammon alengchan phatchun akum kum somni le kumni ahin, Jerusalem'a kumni aleng changin ahi.

²²Ahinla apa Manasseh'in anabol bangin Pakai mitmun thilse abolin ahi. Ammon'in apa Manasseh'in anasema anahou khentho milimho jouse henga ganlhaina abolin;

²³Apa Manasseh anakineosah bangin Pakai anga akineosah pon; ahinla Ammon'in asuhkhel bebe jengin ahi.

²⁴Chuin asohte ama dounan galguh abolun, a-insung tah-a athat taove.

²⁵Ahinla Ammon lengpa douna-a galguh bolho jouse chu gamsung miten athatgamun; gamsung mite chun achapa Josiah chu akhelin alengchan sah taovin ahi.