Read Thado Chin 2 Thusimbu 34 Bible Online

2 Thusimbu 34 - Thado Chin bible

2 Thusimbu 34

¹ Josiah alengchan patchun kum get ahin, Jerusalem'a kum somthumle kumkhat aleng changin ahi.

²Chule Pakai mitmu-a adih abolin, apa David lamlhahho ajotnin, jetlam le veilama akihei dohpoi.

³Ajehchu alengchan kal kumget lhina-in chapangcha ahinalaijin, apa David Pathen chu ahol pantan ahi. Chuin kum somle nina-in Judah le Jerusalem chu munsang ho, doikhomho, khenthu milimho, chule lhahtho milim ho-a konin asuthengtan ahi.

⁴ Chuin Baal maicham ho chu amitmun asuchimun, chule hicheho chunga um milimho chu aphuh lhun: thingbul hole khettho milimho, chule lhahtho milimho chu avochipmin, leivui ason, ahenguva kilhaiho lhan chunga chun athe jalsoh helin ahi.

⁵ Thempuho guho chu amaicham chunguva ahalin, Judah le Jerusalem chu asuthenge.

⁶Hitichun aman Manasseh, Ephraim, Simeon, chule Naphtali khopiho le akimvelu jouse jongchu hitichun abolcheh-in ahi.

⁷Aman maicham ho le doikhomho asuhchima, milim kikhengho bongsela avoh chipma, Israel gamsung pumpi-a milimho aphuh lhuh soh phatnin, Jerusalem'a akiletai.

⁸Tun alengchan kal kum somle kumget alhinna, gamsungle in chu asuhtheng phatnin, Azaliah chapa Shephan le khopisung vaipo thuchingpa Joahaz chapa Joah chu Pakai a-Pathen in saphadin asole.

⁹Chuin thempu chungnung Hilkiah henga ahung phatnun, amahon kotngah Levi mihon Manasseh le Ephraim mite, chule Israelte amoh umjouse le Judah le Benjamin mite jouse khutna kona adonkhom uva Pathen insunga akoiju sum chu apeuvin; chuin Jerusalem'a akiletaove.

¹⁰Chuin Pakai in vetupma natongho khutna chun akoijun, amahon Pakai in sapha ho le semhoiho khutna apeuvin,

¹¹Judah lenghon anasuhsetnu lhongho semphatna dingin song kikheng le athopna ding thing chohnadin khuthemho le insaho chu apeuvin ahi.

¹²Chuin mihon na chu tahsan umtah-in atongun; amachal nadinguva avetupmuva chu Levi ho Merari chapate-a kon Jahath le Obadiah; Kohath chapate-a kon Zechariah le Meshullam ahin; chule Levi dangho lasahna-a manchah tumthemho jousetoh na chu atonguvin ahi.

¹³Amaho chu pohgih poho vetupma chule lhachaho tintang kinbolna jouse vesuija jong ahiuve; chule lekhasunho, vaipoho, chule kotngah ho chu Levi mite lah-a jeng ahiuve.

¹⁴Chuin Pakai in'a achoilutnu sum chu ahinladoh phatnun, Hilkiah thempupan Mosi'n apeh Pakai danthu lekhabu chu amudoh-in ahi.

¹⁵Chuin Hilkiah'in adonbutnin Lekhasunpa Shaphan henga, Danthu lekhabu chu Pakai in'a akimu dohtai, ati. Chuin Hilkiah'in lekhabu chu Shaphan apetai.

¹⁶Chuin Shaphan'in lekhabu chu lengpa henga achoijin, lengpa henga thu alhut kitnin, Nasohte boldia kigotpeh jouse chu abolnaove.

¹⁷Chule Pakai in'a aum kimu sum chu alakhomun, vetup hole natongho khutna apedoh taove, ati.

¹⁸Chuin lekhasun Shaphan'in lengpa henga, Hilkiah thempupan lekhabu khat eipei, ati. Chuin Shaphan'in lengpa anga hichu asimdoh pehtan ahi.

¹⁹Chuin ahitin ahi, lengpan danthuho chu ajah phatnin apon abottel tai.

²⁰Chuin lengpan Hilkiah le Shaphan chapa Ahikam, Micah chapa Abdon, lekhasun Shaphan, chule lengpa soh Asaiah chu thu apen,

²¹Cheovin, hiche lekhabu kimu chungchanga hin keima le Israel le Judah'a kidalha ho din Pakai chu neigadoh peh-un: ajehchu hiche lekhabua kisun banga ipu ipateovin Pakai thu anajoplou jeh-un, Pakai lunghanna chu ichunguva akibung lhatai, ati.

²²Chuin lengpan anganseho le Hilkiah chu ponho chingtupma pang Hasrah chapa, Tikvath chapa, Shallum jinu, Huldah themgaonu henga acheuvin; (tun amanu Jerusalem indan nina-a cheng ahi,) chule hiche thuchu agasei taove.

²³Chuin amanun amaho chu adonbutnin, Israel Pakai Pathen'in hitin ati, Kahenga nahinsolpa chu seipeh uvin,

²⁴Pakaiyin hitin aseije, Veuvin hiche munle asunga chengho chunga Judah lengpa masanga asimdoh-u lekhabua kisun sapsetna jouse chu kalhunsah ding ahi:

²⁵Ajehchu amahon eida lhaovin, akhutnuva athilbol uva kona eilunghan sahna diuvin pathen dangho henga gimnamtui ahalun ahi; hiche jeh-a chu hiche mun chunga kalunghana kibunglha ding, chule kisumit jou louding ahi.

²⁶Ahin Pakai dong dinga nahin soluva Judah lengpa thudol chu hitin seipeh-un, Nangman najah thuho thudola hin Israel Pakai Pathen'in hitin aseije,

²⁷Hiche mun douna le asunga chengho douna athusei najah phatna, nalung anema, Pathen anga nakisuhnem jeh-in, chule kamasanga nakineosah-a, napon nabotel-a, kamasanga naka jeh-in; keiman jong nathu kangaipeh-e, tin Pakaiyin aseije.

²⁸Ven, keiman napu napate toh kagop khom ding, lungmonga lhana nakivui ding, hiche munle asunga chengho chunga kalhunsah ding thilphalou jouse chu namitnin amulouding ahi, ati. Hitichun lengpa henga thu ahinpo taovin ahi.

²⁹Chuin lengpan mi asolin, Judah le Jerusalem'a upa jouse akhomin ahi.

³⁰Chuin lengpan Judah mijouse le Jerusalem'a chengho jouse toh, thempuho, Levi ho, chule mijouse alen aneo Pakai in'a achetouvun; chuin aman Pakai in'a amudoh-u kitepna lekhabua thu jouse chu anabenguva asimdoh peh-in ahi.

³¹Chuin lengpa chu aumna mun'a adingin, alungthim pumpi le ahinna pumpi-a Pakai nung juiding le, athupehho, ahettoh sahnaho, achondanho nitding, chule hiche lekhabua kisun kitepna thuho jouse tongdoh dingin Pakai angsunga kitepna aneijin ahi

³²Chuin Jerusalem le Benjamin'a umjouse hiche-a chu dingdet dingin aseijin ahi. Chuin Jerusalem'a chengho chun a-Pathen'u, apu apateu Pathen thulhun dungjuijin abol taovin ahi.

³³Chuin Josaiah'in Israel chate gam jouse-a konin thil thet umjouse alamangin, Israel'a umjouse chu Pakai a-Pathen'u bouchu ajensah-in ahi. Chuin ahinkho lhumkeijin Pakai, apateu Pathen ajuija konin akichoi dohpon ahi.