Read Thado Chin 2 Thusimbu 35 Bible Online

2 Thusimbu 35 - Thado Chin bible

2 Thusimbu 35

¹Chukalvalin Josiah'in Jerusalem'a chun Pakai dingin kalchuh kut amangin: lha masapen nisomle nili nin kalchuh kut sa athatnun ahi.

²Chuin thempuho chu akinganse naova apansah-in, amaho chu Pakai in'a kinboldin atilkhouvin,

³Chuin Pakaiya dinga atheng Israelte hila pang Levi ho jah-a chun, Israel lengpa David chapa Solomon'in asah in'a chun thingkhong thengchu koijun; hichu nalengkou uva dinga pohgih hitalou ding ahi: tun Pakai na Pathen'u le ami Israelte jenun,

⁴ Chule Israel lengpa David sutle achapa Solomon sut dungjuijin, napu napateu insungho kailhah dungjui le nakihopkhen dungjuijun kigotup uvin.

⁵Chule mipi ho nasopiteu insung kailhah kikhen dungjuile, Levi insung kailhah kikhen dungjuijin muntheng chun dinguvin.

⁶Hitichun kalchuh kut sa that unlang kisuthengun, chule Mosi khutna kon Pakai thu dungjuija atoh theina diuvin, nasopiteu chu gongtoh-uvin, ati.

⁷Chuin Josiah'in chuche mun'a um mijouse chu kalchuh kutna atodiu ganhon lah-a konin kelngoinou le kelnou sangsomthum le bongchal sangthum apen, hicheho chu lengpa neija kon ahi.

⁸Chuin apipuiho chun mipi ho, thempuho, chule Levi ho chu hongphal tah-in apeuvin; Pathen in vaipo Hilkiah, Zechariah, chule Jehiel chun thempuho chu kalchuh kut thiltodin ganchaneo sangni le jagup le bongchal jathum apeuve.

⁹Conaniah le asopi Shemaiah le Nathaneel, chule Levi ho pipu Hashabish le Jeiel, chule Jozabad jongchun Levi ho henga kalchuh kutna todin ganchaneo sanga le bongchal janga apeuve.

¹⁰Hitichun lhacha natohna chu agongun, lengpa thupeh bangin thempuho chu amun cheh uvah adingun, Levi ho jong aloi loijin apang taove.

¹¹Amahon kalchuh kut sa athatnun, thempuhon akhutna konin thisan atheuvin, Levi hon avun alipmuve.

¹²Chuin Mosi lekhabua kisun banga, mipi chun a-insungu kikhen dungjuija Pakai henga atotheina dingun, govam thiltoho chu aladoh-un ahi. Hitichun bongchalho jong aboluve.

¹³ Chuin kalchuh kut sa chu chondan dungjui jin meija agou minun, thilto theng dangho vang bel le bel lengnei, chule khangbelin ahonun, mipi lah-a chun ahomdoh loi jiuvin ahi.

¹⁴Hiche jouchun amahole thempuhodin asemtoh uvin ahi: ajehchu Aaron chapate thempuho chu thilto thua govam thilto le thao thilto-a khojin geija kisalel uva ahi; hijeh chun Levi ho chun amaho dingle Aaron chapate thempuhodin agongtoh uvin ahi.

¹⁵ Chuin David le Asaph, Heman, chule lengpa mitvanei Jeduthun thupeh dungjuijin, Asaph chapate lasaho chu amun cheh-a aumun; akinuva kona atoldoh theilouna diuvin kotngah hon kotpi tina angah-un ahi; ajehchu asopiteu Levi hon agontohpeh-u ahi.

¹⁶Hitichun Josiah lengpa thupeh bangin kalchuh kut nitna dingle Pakai maicham chunga govam thiltoho tona dingin, hiche nikho mama chun Pakai kinbolna jouse chu agongtoh uvin ahi.

¹⁷ Chule Israel chapate chua umho chun kalchuh kut amangun, cholsolou changlhah kut jong nisagi amanguve.

¹⁸Samuel themgao nikho-a patnin Israel gamsunga chutobang kalchuh kut ana umkhapon; Josiah le thempuho, Levi ho, chule chua um Judah le Israel jouse, chule Jerusalem'a chenghon anaman bangun, Israel lengte jousen jong hitobang kalchuh kut hi anamang khapouve.

¹⁹Josiah lengchan kala kum somle kumget na-a hiche kalchuh kut hi anamanu ahi.

²⁰Hicheho jouse nung, Josiah'in houin agontoh phatnin, Egypt lengpa Nicho chu Euphrates luija Carchemish satdin ahungtouvin; chule Joshiah chu ama doudin akondoh-in ahi.

²¹Ahinla aman ahenga palai ahinsolin, ajah-a, Judah lengpa, nangle kei kikah-a ipi iboina uma ham? tunia nangma doudinga hung kahipoi, kakisatpipa insung doudinga hungjoh kahibouve: ajehchu Pathen'in kikinno dinga eithupeh ahi: eiumpia Pathen nadoudal na-a konin kikhindalin, nasumang khante, agati sah-e.

²²Ahijeng vangin Josiah'in ama-a konin amai aheidoh nompon, akisatpi theinadin amel achomsah-in, Pathen kama kon Necho thusei chu angai hih-in, Megiddo phaichama kisatpidin ahunge.

²³Chuin thal kaphon Josiah lengpa ahin kapkha taovin; hichun lengpa chun asohte henga, Neipodoh-un; ajehchu nasatah-in kamachang tai ati.

²⁴Hijeh chun asohten amachu kangtalai ja konchun aladoh-un, akangtalai nina-a akoijun; Jerusalem'a ahinpolut nun, athin, apu apateu lhankhuh khatna avuitaove. Chuin Judah le Jerusalem mite jousen Josiah chu alunghempi taove.

²⁵Chule Jeremiah'in jong Josiah alunghempin: chule lasa pasal hole lasa numei ho jousen Josiah chu tunigeijin akalaova akacham cham jengun, Israel gamsunga chondan khatnin asem taovin ahi: chule veuvin, hicheho chu kala lekhabua akisunin ahi.

²⁶Tun Josiah thilbol dangho le Pakai danthu-a kisun dungjuija aphatnaho,

²⁷Anatohho apatna le ajona chu, veuvin, Israel le Judah lengte lekhabua akisun cheh-in ahi.