Read Thado Chin 2 Thusimbu 4 Bible Online

2 Thusimbu 4 - Thado Chin bible

2 Thusimbu 4

¹ Chukalvalin aman sum-eng maicham, adung tongsomni, avai tongsomni, chule asan tongsom khat asemin ahi.

²Aman twikonglen ageilang khatna pat langkhat kah chu tongsom lha-a akimvel kikolkhum ahin, chule asanlam chu tong nga asangin asemin, chule khaojang tong somthum khatnin akimvel akolkhumin ahi.

³Anoilam chu bongchalho lheh lheh abangin, hiche lim chun akimvelin akolkhumin, tong khatna som cheh-in twikong chu akimvelin ahi. Hiche kisun laija chu bongchal lim golnia kisung ahi.

⁴Hichu bongchal somleni chunga chun adingin; thumin sahlam angan, thumin lhumlam angan, thumin lhanglam angan, chule thumin solam angai: chule twikong chu hitiho chungvuma chu kiluija, atou chu akholut cheh-u ahi.

⁵Asadan khutphang chana sa ahin, agei chu khongeija molhoipah kisem tobang ahin; hichun bath sangthum adole.

⁶ Aman twidol jong som asemin; kisilna dingin jetlama nga akoijin, veilama ngama akoijin ahi: hicheho sunga chu govam thiltoho asopjiu ahin, ahinla twikongho chu thempuho kisilna ding ahi.

⁷Chule agongu dungjuijin sana meivah khom som asemin; houin sunga jet lama nga, chule veilama nga atunge.

⁸ Aman dokhang som jong asemin, houin sunga chun jetlama nga chule veilama ngama akoije; chule sana twikong jakhat jong asemin ahi.

⁹Chuche bana aman thempuho hongsung le kulpi, chule kulpi kotkhah asemin; chule kotho chu sum-eng in aloijin ahi.

¹⁰Chule twikong chu solam mong jetlam lhanglam jona chun akoijin ahi.

¹¹Chuin Huram'in belho le vutloho, chule twikongho chu asemtan ahi. Chule Huram'in Pathen in'a dinga Solomon lengpa abolpeh natohho chu ajoutan ahi.

¹²Hetding chu khomteni, khombemho, khom teni lehvuma abohteni, chule khompiteni lehvuma abohtenia khombem teni khuna ding pahvuiteni;

¹³Pahvui teni chunga kolbuthei jali, khomho chunga abohtenia khombem teni khuna ding pahvui khat khat chunga chu kolbuthei golnini ga ahi.

¹⁴Aman akhomho asemin, chule akhomho chungadin twidol ho aseme.

¹⁵Twikong khatle anoija bongchal somleni asemin;

¹⁶Belho jong, vutlona le satulka; hicheho jouse hi apa Huram'in Pakai in'a dinga sum-eng duljetna Solomon lengpa asempeh ahi.

¹⁷Jordan phaicham Succoth le Zeradathah kikah-a hahlei laija lengpan alhahtho ngen ahi.

¹⁸Hitichun Solomon'in hiche umle belho jousehi bulhing setnin asemtan ahi: ajehchu sum-eng ho gihchu hetsoh jouhoi ahitapoi.

¹⁹Chule Solomon'in Pathen in dinga umle belho jouse asemjouvin, sana maicham jong, chule achunga vetsahna changlhah kitoh koina dokhang jong;

²⁰Chukalvalin muntheng pen masanga adan dungjuija adetjiu meivah khomhole ameivahho jong sanathengin asemin;

²¹Chule pahchaho, thaomei ho, chaicheho jouse jongchu sana thengselin asemin;

²²Chule thaomei ponchenaho, twikongho, thihkheho, gimnamtui lhengho chu sana thengselin asemin: insung lutna, muntheng chungnung kotkhah sungnung, chule houin kotkhah ho chu sana in asemin ahi.