Read Thado Chin 2 Thusimbu 5 Bible Online

2 Thusimbu 5 - Thado Chin bible

2 Thusimbu 5

¹ Hitichun Pakai in dinga Solomon'in aboljouse chu jo ahitan: Solomon'in apa David'in anakatdohsa thil jouse; chule sana, dangka, chule manchah jouse chu Pathen in thilkholna lah-a chun ahin polut tan ahi.

² Chuin Solomon'in Israel upa hole phung upaho, Israel chate upaho lamkai jouse chu David khopi Zion'a kona Pakai kitepna thingkhong podoh din Jerusalem'a akhomin ahi.

³Hijeh chun Israel mite jouse lha sagi lhinna kut-a chun lengpa henga akikhom taove.

⁴Chuin Israel upaho jouse ahungun; Levi ho chun thingkhong chu apodoh taove.

⁵Chule amahon thingkhong, houkhom ho houbuh, chule houbuh sunga um le bel thengho jouse ahinpo touvun; hichehohi thempuho le Levi ho hinpohtou ahi.

⁶Solomon lengpa le ahenga thingkhong maija mipi kikhom Israel hou lamkaiho jouse chun kelngoiho le bongchal ho-a kilhaina abolun, hichu atambehseh jeh-in seijougol ahitapoi.

⁷Chuin thempuho chun Pakai thulhun thingkhong chu ama mun, houin'a muntheng lai, muntheng chungnung pena chun Cherubim lhaving noi ngeija ahinpolut taovin ahi:

⁸Ajehchu Cherub teni lhaving chun thingkhong kikoina ding chung chu akhu ahin, chule Cherub teni chun thingkhong le achunga amoljol teni chu akhu ahi.

⁹Chuin thingkhoga moljol teni chu asao behseh jeh-in, munthenga konin akimuphan ahi; ahin polama vang akimupoi. Hitichun hikoma chun aumjing nalaije.

¹⁰ Thingkhong sunga chu Egypt'a kona ahungdoh laiju, Pakaiyin Israel chatetoh Horeb mun'a kitepna asem laija, Mosi'n anakoilut songpheng teni tailou imacha umlou ahi.

¹¹Chuin ahitin ahi, Thempuho chu munthenga kona ahungdoh phatnun, (ajeh chu thempu aumho jouse kisutheng cheh jiuva ahin, ahona kingahlou ahiuve:

¹²Chujongle Levi lasaho jouse, Asaph'a kon jouse, Heman'a kon, Jeduthun'a kon, achapateu le asopiteu jouse chu tupat ponbangleh-a akivonun, thih khutbehho, tumgingho, selangdah ho akichoijun, maicham mong solama chun adingun, chule amaho chutoh sumkon mut thempu jakhat le somni dinguva ahi:)

¹³ Ahung hitin ahi, Pakai vahchoina le thangvahna aw akijah nadinga sumkon mut hole lasaho chun awkhat banga ahin ginsah uva; sumkon le thih khutbeh chule tumgingthei manchah ho jouse to kitho-a apenuva, Ama aphai, ijeh inem itile ahepina atonsotnin aum jinge, tia Pakai avahchoi laijun: Pakai houin ngeichu meilhangin adiptan;

¹⁴ Meilhang jehchun thempuho chu kinbol dingin ading thei tapouve: ajehchu Pathen in chu Pakai loupi na-in adip ahitai.