Read Thado Chin 2 Thusimbu 6 Bible Online

2 Thusimbu 6 - Thado Chin bible

2 Thusimbu 6

¹Chuin Solomon'in, Pakaiyin muthim lhangkhal kiheh lah-a kachending ahi, tin anaseije.

²Hijongle naum nading le, tonsotna nachenna ding mun hidingin in khat kasahpehtai, ati.

³Chuin lengpan amai aheijin, Israel houkhom ho jouse chu phatthei aboh-in: chule Israel houkhom ho jouse chu adingdoh-un ahi.

⁴ Chuin aman, kapa David henga akamtah-a anaseisa akhut tah-a guilhun sah-a Israel Pakai Pathen chu nunnom hen.

⁵Aman kamite Egypt gama kona kapuidoh nikho-a patnin kamin umna dinga in khat sahna dingin Israel phung jouse sunga khopi khatcha kanalheng khapon; kami Israelte chunga vaipo dingjong mi khatcha kana lheng khapoi.

⁶Ahinla keiman Jerusalem chu kamin umtheina din kana lhengin; kami Israelte chunga vaihomdin David chu kana lhengin ahi.

⁷Tun Israel Pakai Pathen dinga in khat sahdoh ding chu kapa David lungsunga ana umin ahi.

⁸Ahinla Pakaiyin kapa David henga, Kamin dinga in sah ding nalunga nagela, hitobang lungtup chu nalunga aumjeh-in aphalheh jenge;

⁹Hijeng jongle in chu nangman nasah louding ahi; amavang nataijola hungpeng nachapa chun, kamina in chu asahding ahi.

¹⁰Hijeh-a chu Pakaiyin anaseisa chu aguilhunsah ahi. Ajehchu keima kapa David indan sunga kahung seilenin, Pakai thutep bangin Israel laltouna-a katouvin, Israel chate Pakai Pathen min dingin in chu kasatan ahi.

¹¹Chule hiche sunga chun Pakaiyin Israel chatetoh anasem kitepna thingkhong chu kakoitan ahi, ati.

¹²Chuin ama Israel houkhom ho jouse mitmun Pakai maicham anga chun adingin, akhut ajah-in:

¹³Ajehchu Solomon'in sum-eng dokhang tong nga sao, tong nga len chule tong thum sangkhat asem ahin, hichu hongsung lailunga atun ahi. Chuin hiche chunga chun adingin, Israel houkhom ho jouse masanga chun adilsun, akhutnin vanlam sangin,

¹⁴Hitin ati, Vo Pakai, Israel Pathen, nangma banga akitepna subulhit, namasanga alung pumpiuva vahlea nasohte henga hepina musah-a van'a ahin leija ahin jong Pathen dang aumpoi.

¹⁵Nangman nasoh kapa David henga nana thutep jouse nasubulhit nin; nakamtah-in nanaphong doh-in, tunikho banghin nakhut tah-in namolso tai.

¹⁶ Hijeh chun tun, Vo Pakai Israel Pathen, nasoh kapa David henga, Nachate chu kamasanga nangma chonna banga alamlhah uva, chule kadanthu dungjuija alamlhah na diuva achihthei pou uva ahile; kamitmu-a Israelte laltouna-a touding mi lhasam louding ahi, tia nana thutep chu molsotan.

¹⁷Achutile tun, vo Pakai Israel Pathen, nasoh David henga naseisa thu chu subulhit teijin.

¹⁸ Ahinla Pathen chu leisetna hin mihemte toh achengkhom mong nadem? Vetan vanle vanho van'in jong nadolou ahin, keiman kasah hiche inhi iti neojocheh-a hitam!

¹⁹Hijeh chun vo Pakai ka Pathen, nasoh taona le thumna hi jabolpeh inlang, na angsunga nasohpa taona le pen nahi ngaipeh-in:

²⁰ Chule nasoh-in hiche lam nga-a ataona nangaipeh na dingin; kamin kakoi ding ahi tia nanaseina mun, hiche in hi asun ajanin ve jingin.

²¹Hitichun nasohpa le nami Israel ten hichemun lam nga-a ataonao chu ngaipeh-in: nachenna mun van'a konin ngaijin lang, najahpeh tengle ngaidamtan.

²²Mi khattou aheng akom douna-a achonsetna, kihahselsah dinga achunga thutep achuh-a, hiche akihahsel dingpa chu hiche insung namaicham masang ahi ahunga ahile,

²³Van'a konin hinngaijin lang na hintongin, nasoh chu athu tanpeh-in; michonpha chu themchanna le, achonphatna dungjuija lethuh inlang; migilou chu ama luchang ngeija phulahna chuhsah-in.

²⁴Chule nangma douna chonset aboljeh uva, nami Israelte chu amelmateu masanga aleluva; ahung kile heijuva, namin aphondoh uva, hiche insungahi na-angsunga taona le thumna aneijuva ahile;

²⁵Van'a konin hin ngaipeh inlang, nami Israelte chonsetna chu ngaidamin, chule nangman amaho le apu apateu nanapeh gama chun hinlepui kitnin.

²⁶Nangma douna-a achonset jeh uva, van akikha-a, go julouva aumteng; amaho hiche munlam nga-a atao uva, namin aphondoh uva, namgman nasuh genthei jeh uva, achonset naova kona ahung kileuva ahile;

²⁷Van'a konin hinngaijin lang, ajot dingu lampi pha nahil theina dingin, nasohte le nami Israelte chonset ngaidamin; chule alodinguva namite nanapehna nagam chunga hin go hinjuh sah-in.

²⁸Gamsunga kel alhah ham, hise alan ham, huise anun ham, thinglung ahiloule khaokho alan hama; melmaten agamsungu khopiho-a chu aumchah-uham; itobang hise ham ahiloule itobang natna hijongle alanteng;

²⁹Amitakipmin apohgih ule alung khamna cheh akihetdoh uva, hiche in lam nga-a akhut ajah uva, changval ham ahiloule Israel mipi jousen, itobang taona hihen, itobang thumna hijong le ahin nei tengule;

³⁰Nachenna van'a konin ngaipeh inlang, ngaidamin, chule alunggelu nahet bangin, mitin alamlhah dungjui cheh-un lethuh-in; (ajehchu nangma bouvin mihem chate lungsung nahet ahi.)

³¹Chutia chu kapu kapateu nanapehna gamsunga hi achenlai seuva nalampi ajot nadinguva nagin dingu ahi.

³²Chukalvalin namin loupitahle nakhut thahat tah, chule naban jahdoh jala gamlatah-a kona hung nami Israelte hilou gamdang mi thudola; amaho ahunguva hiche insunga hi ataovuva ahile;

³³Chuteng nachenna mun vanho ngeija konchun ngaijin lang, gamdang mipan nakoulona pen dungjui chun bolpeh-in; chutile leiset mite jouse namin ahet dingu, nami Israel ten nagin banguva nagin diu, chule keiman kasah hiche inhi namina kivo ahi ti ahet dingu ahi.

³⁴Namite chu nangman nasolna lampia amelmateu satdinga akondoh uva, nangman nalhendohsa hiche khopi lam le nangma min dinga kasah hiche in lam nga-a hi ahung tao uva ahile,

³⁵Nangman van'a konin ataonao le athumnao ngaipeh inlang, athu-u bolpeh in.

³⁶Amaho nangma douna-a achonsetnuva, (ajehchu achonse lou khatcha umlou ahi,) nangma achunguva nalunghana, amelmateu henga napeh doh-a, amahon gamlatah ham naicha hama sohchanga akaimang uva ahile,

³⁷Hijongle sohchanga akikainao gama chu ahung kingaito uva, asohchannao gama chu ahung kiheijuva nahenga ahung tao uva, Keiho kana chonseuvin, kasukhelun, chule giloutah-in na katonguve atiuva;

³⁸Soh-a akikainao asohchannao gama kona chu alung pumpiu le ahinna pumpiuva nangma lama ahung kiheijuva, apu apateu nanapeh gam le nangman nanalhen khopi, chule keiman namin dinga kasah hiche in lam nga-a hi ahungtao uva ahile;

³⁹Chuteng ataonao le athumnao chu nachenna mun van'a kon ngeichun ngaipeh inlang, athu chu bolpeh-in; chule nangma douna chonsea namite hi ngaidamin.

⁴⁰Tun, ka-Pathen, kangeh nahi, hiche mun'a taona kimanna-a hin, namit hasah inlang, nana hinsungin.

⁴¹ Hijeh chun tun, vo Pakai Pathen, nacholdona mun'a dingin nangma chule nathahatna thingkhong toh kipatdoh-in; vo Pakai Pathen nathempu ho chu huhhingna-in kivonu henlang, namithengte chu phatna-a kipah uhen.

⁴²Vo Pakai Pathen, nathaonupa mai chu heimang hih-in, nasoh David hepinaho chu geldoh-in, ati.