Read Thado Chin 2 Thusimbu 7 Bible Online

2 Thusimbu 7 - Thado Chin bible

2 Thusimbu 7

¹ Tun Solomon taojou phatnin, van'a konin mei ahungleng lhan, govam thilto le ganlhaina hochu akavamin, houin chu Pakai loupina adimtan ahi.

²Chuin Pakai in chu Pakai loupina adimjeh-in, Pakai insunga chun thempuho alutthei tapouve.

³ Chuin Israel chate jousen mei ahung lenlhah le in chunga Pakai loupina ahung kumlhah chu amuphatnun, tolla songlhongnal chunga amaiju asulutnun, Pakai chu ahouvun, avahchoijun, Ama aphat jeh-in, ahepina tonsotnin aumjinge, atiuvin ahi.

⁴Chuin lengpa le mijouse chun Pakai angsunga chun ganlhaina atoh taovin ahi.

⁵Chuin Solomon'in bongchal sangsomni le sangni toh, kelngoi sang jankhatle sangsomni in kilhaina abolin; hitichun lengpa le mijouse chun Pathen in chu athenso taove.

⁶Chuin thempuho chu atohmun cheh uva adingun; chule Levi ho jong chun David'in, Ajehchu ahepina atonsotnin aumjinge tia Pakai vahchoina dinga anasem, Pakai tumging thei manchah ho chu akichoijun; chuin thempuhon mipi angsunga chun sumkon amutnun ahile, Israelte jouse chu adingdoh sohkeijun ahi.

⁷Chukalvalin Solomon'in Pakai in maija hongsung lailung chu athenson ahi: ajehchu Solomon'in asem sum-eng maicham chun govam thilto le anneh thilto, chule thao thilto chu adol joulou jeh-a, govam thilto le chamna thilto thao ho chu hikoma chu atou ahi.

⁸Hiche sung mama chun Solomon le akoma um Israelte jouse, Hamath lutna-a pat Egypt vapi geija hung kikhom mipi atama tam chun nisagi kut amangun ahi.

⁹Chuin niget lhinin kikhoppi loupitah abolun ahi: ajehchu amahon maicham thensona chu nisagi amanuva, kut chu ni sagima amanu ahi.

¹⁰Chuin lha sagina, nisomni le nithum ni chun, Pakaiyin David le Solomon chule ami Israelte henga anamusah phatna jeh chun, mipi chu kipahtahle thanom tah-in aponbuh lamuva asoltan ahi.

¹¹Hitichun Solomon'in Pakai inle lengpa in chu ajoutai: chule Pakai in le amatah in sahna dinga Solomon lunga kon jouse chu aman lamjang keijin amolsotan ahi.

¹²Chuin Pakai chu jan-in Solomon henga akilah-in, ahenga hitin aseije, Nataona kangaijin, hiche munhi keima dinga ganlhaina in hidingin kalheng tai.

¹³Keiman van kakha-a go ajuhda-a, ahiloule gamsung bahgam dinga khaokhopi kalansah-a, ahiloule kamite lah-a hise kalansah-a ahile;

¹⁴Kamina kikou kamite hi ahung kineosah uva, atao uva, kamai aholuva, akhansetna houva kona akile heijuva ahile; chuteng keiman van'a kona ataonao kangaipeh ding, achonsetnao kangaidam-a, agamu kadamsah ding ahi.

¹⁵Hiche mun'a taona kimangho lama kamit kahasah-a kana kasun jing ding ahi.

¹⁶Ajehchu a-itih-a kamin umjing nadinga hiche in hi kalhena kasuhtheng ahitai: kamit le kalungthim hi chukoma umjing ding ahitai.

¹⁷Chule nangma thudol vang, napa David lamlhah banga kamasanga nalam lhah-a, Keiman kathupeh jouse dungjuija nabola, kachonna dan le kathutan lhah nanitna ahile;

¹⁸ Nanga kona Israelte lah-a vaipo ding lhasam louding ahi, tia napa David toh kakitepna dungjuija nalenggam laltouna kaphudet ding ahi.

¹⁹Ahinla nakihei manga, namasanga kakoi kachonna dan le kathupeh nadalhah-a, nache-a pathen dangho najena naga houva ahile;

²⁰Chutengle amaho kanapeh gamsunga kona ajung ajaova kabodoh uva, kamin dinga kathenso hiche in hi kamitmu-a kona kapaidoh ding, namtin lah-a thuchih le seichah khatna kaum sah ding ahi.

²¹Chule hiche in sangtah hi ajotpa channin adatmoa; chutia chu amahon, Pakaiyin ibola hiche gam le hiche in hi ahitibol ham? atidiu ahi.

²²Amahon apu apateu Pakai Pathen, Egypt gama kona ahin puidohpao adalhah uva, pathen dangho akolchah uva, ahou uva chule ajenjeh uva; hijeh-a chu hitobang thilsehi achunguva alhunkhum sah ahi, tia adonbut dingu ahi.