Read Thado Chin 2 Thusimbu 8 Bible Online

2 Thusimbu 8 - Thado Chin bible

2 Thusimbu 8

¹Chuin Solomon'in Pakai in le ama in ding asahsung kum somni kichaijin ahitin ahi.

²Huram'in Solomon analepeh khopi chu Solomon'in asaphan, hia chun Israel chate chu achensahtan ahi.

³Chuin Solomon Hamath-zobah satdin achen, agajou tan ahi.

⁴Chuin aman gamthipma Tadmor asan, Hamath'a thilkholna khopiho jouse asan ahi.

⁵Aman Beth-horon sahnung le Beth-horon lhangnung khopi kium kul, abangho, akotpiho, akotgolho pumin jong asan,

⁶Chule Baalath le Solomon'in anei thil kholna khopi jouse, sakol kangtalai khopiho, sakol touthemho khopiho asan, chule Jerusalem le Labanon chule alenggam pumpi-a Solomon'in asah nom jouse chu asadohtan ahi.

⁷Israel hilou Hit mite, Amor mite, Perizz mite, Hiv mite, chule Jebus mite amoh chengse thudola,

⁸Achateu gamsunga amaho nunga kidalha, Israel chaten asuhmang louhou chu Solomon'in tuni geijin kai apeh sah-in ahi.

⁹Israel chate lah-a konin Solomon'in anatong soh alapon ahi; ahin amaho chu galbolin, gal lamkaijin, sakol kangtalai ho le sakol ho chunga lamkaijin apansahjon ahi.

¹⁰Hichehohi Solomon pipui lenho ahiuvin, mipi chunga vaihom mi jani le somngajen ahiuve.

¹¹Chuin Solomon'in Pharaoh chanu chu David khopi-a konin ama dinga asahpeh in lama apuitoutai. Ajehchu aman, Israel lengpa David in chu Pakai thingkhong lhunna muntheng ahijeh-in, ka-inneipi chengthei louding ahi, ati.

¹²Chuin Solomon'in hongcha maija asem Pakai maicham chunga chun Pakai henga govam thilto atoh-in,

¹³ Mosi thupeh dungjuija, niseh-a dia kibituh ngei bangin choldo nikho ho, lhathah niho, kumkhatna abineija kibol kut thumho; cholsolou changlhah kut, haptaho kut, chule Houbuh kutna atohjin ahi.

¹⁴Chuin apa David thupeh bangin, thempuho chu natong dingin aloi aloijin, Levi ho chu niseh-a angaichat dungjuija vahchoi dingle thempuho masanga lhachana tongding, Kotpi ngahho jouse jongchu kotpi jouse-a akihopkhen dungjui uvin mopohna apesoh keijin ahi; ajeh chu Pathen mipa David'in hitia hi ana thupeh ahi.

¹⁵Chule thempuho le Levi ho chu lengpan athupeh-a konin ipilam thu hihen, sumle pai lampang hijongle akiheimang pouvin ahi.

¹⁶Tun Pakai inbul kiphu nikho-a pat le akijo theng nikho geija Solomon natoh jouse chu gontupsa ahi. Hitichun Pakai in chu achamkimin ahi.

¹⁷Chuin Solomon Edom gamsunga luipipanga um Ezion-geber le Eloth'a chun achen ahi.

¹⁸Chuin Huram'in asohte khut, twikhanglen umdan hethem asohteho khutnin kong inneiho ahin thotnin ahi. Chuin amaho Solomon sohte toh Ophir'a acheuvin, chua kon chun sana talent jali le somnga ahin laovin, Solomon lengpa heng ahinlhut taove.