Read Thado Chin Ezra 1 Bible Online

Ezra 1 - Thado Chin bible

Ezra 1

¹ Persia lengpa Cyrus lengchan kum khat alhinin, Jeremiah kama Pakaiyin athumopsa chu aguilhun theina dingin, Persia leng Cyrus lung chu Pakaiyin achoh thouvin ahi. Chule jihtho-a koidingin aseijin alenggam pumpi-a thu aphongdoh tai.

² Persia leng Cyrus chun hitin aseije, leiset lenggam jouse chu keima khutna van Pakai Pathen'in phatthei eiboh-in eipen; chule aman Judah gam Jerusalem'a a-in sadingin thu eipetai.

³Nangho amite jouse lah-a koi umam? ama chu a-Pathen'in umpihen, chule Judah gam Jerusalem'a chetou henlang, Pakai Israel Pathen (ama chu Pathen ahi) in chu gasahen, hichu Jerusalem'a um ahi.

⁴Chule apemna mun'a chengdena koi hijongle aumna muncheh-a chun lungcham thilpeh tilouvin; dangka-in, sana-in, thil lelo-in, gancha-in Jerusalem'a Pathen in sahna dingin kithopiu hen.

⁵Chujouvin Judah le Benjamin phunga apateo lah-a alamkaiho, thempuho, chule Levi ho, Jerusalem'a um Pakai in sadinga chetou dinga Pathen lhagaovin alung asuhthouho chutoh akipatdoh taove.

⁶Amaho chu akimveluva umho chun lungcham thilpeh-a apeh-u tilouvin, dangka umle belho, sana, thil le loho, ganchaho chule thillu tahtah ho apeuvin, atha hatsah-un ahi.

⁷Chule Cyrus lengpan jong Nebuchadnezzar'in Jerusalem'a kona anapoh-a, a-pathen in'a anakoi, Pakai in'a umle belho chu ahinpodoh-in ahi.

⁸Hitihohi Persia leng Cyrus chun neichingpa Mithredath alahdohsah-in, chule ajat asimun, Judah gama vaipipo Sheshbazzar khutna apetai.

⁹Hitiho asimdoh-u chu: sana kong somthum, dangka thih-a kisem kong sangkhat, chemcha somni le ko ahi.

¹⁰Sana khondal somthum, dangka khondal jatchom jali le som, chule um le bel adang sangkhat toh,

¹¹Um le bel sana le dangka-a kisem chu aboncha sanga le jali ahi. Sohchangho Babylon'a kona Jerusalem'a ahintoltou laichun, hitiho jouse jonghi Sheshbazaar in ahintolthan ahi.