Read Thado Chin Ezra 3 Bible Online

Ezra 3 - Thado Chin bible

Ezra 3

¹Chuin lhasagi ahunglhina, Israel chate khopiho-a aumlaijun, mipi ho chu mikhat bangin Jerusalem'a akikhom khommun ahi.

² Chuin Jozadak chapa Jeshua le asopi thempuho, chule Shealtiel chapa Jerubbabel le asopiho chu ading doh-un, Pathen mi Mosi dan thupeh-a kisun banga achunga govam thiltona ding Israel Pathen maicham chu asataove.

³ Chuin amun mama-a chun maicham chu asemuve; ajeh chu chuche gamkaija miho jeh-a chun achunguva kichatna chu-a ahitai. Chua chun amahon Pakaiya dingin govam thilto atoh uvin, jingkah nilhah seh-in jong govam thilto atoh jiuvin ahi.

⁴ Anakisunsa bangin amahon Houbuh kut jong abollun, chule niseh-a bolding jat danthua kisun dungjuijin nisehle govam thilto chu atohjiovin;

⁵ Chule hiche nunghin govam thilto aboljompeh-un, lhathah ho chule akithenso Pakai kut ho jouse-a, Pakai dingin mitinin kiphal tah-in lungcham thilpehho chu atoh-un ahi.

⁶Lha sagina nimasa ni-a patnin Pakai dinga govam thilto atoh panun ahi. Ahinla Pakai houin chu abul akiphutdoh hihlaijin ahi.

⁷Persia lengpa Cyrus'in apeh dung juijun, amahon songkheng hole thingthem bol hochu sum apeuvin, Lebanon'a pat Joppa twipi geijin Cedar thingho hinpo-a Sidon le Tyre miho chu anneh, twidon chule thao apeovin ahi.

⁸Tun Jerusalem'a Pathen In ahunglhunu kum nina, lhani na-in, Shealtiel chapa Zerubbabel le Jozak chapa Jeshua, chule asopite thempu dangho jouse le Levi ho, chule asoh channauva kona Jerusalem'a hungkileho chun natoh apanuvin, Levi ho kum somni-a lhah achunglamse chu Pakai in sahna-a mopo dingin apansah-un ahi.

⁹Chujouvin Jeshua chu achapate le asopite, Kadmiel le achapate, Judah chapate Pathen in'a natong dinga kisepdoh ho toh thakhatnin adingun, Henadad chapateleh asopite Levi chapate toh ahiuve.

¹⁰ Chuin insahon Pakai houin chu abul aphudoh phatnun, amahon thempuho chu sumkon leh von akivonsah-un, chule Asaph chapate Levi ho chun khutbeh akichoijun, Israel lengpa David houdan thupeh dungjuijin Pakai chu avahchoijun ahi.

¹¹ Chuin amahon kilhang lhah-in vahchoina le thangvah nachu Pakaiya apeuvin: Ajehchu Pakai aphai, ijeh inem itileh ahepina a-imatih chanin Israel chunga aum jinge, tin asaovin ahi. Chule Pakai in abul akiphudoh tahjeh chun, mipi chun Pakai avahchoijun, awsang tah-in asamun ahi.

¹²Ahinla thempu tamtah le Levi ho chule phunglah-a lubohho, milui tehse houin masa anamukha ho chun, amit mutah uva hiche Pakai in khom akiphu amutah-un, aw thong jejun akapmun, chule mitamtah kipah tah-in a-aosot sot jengun ahi.

¹³Hitichun mipi chun kipana jeh-a awgin leh mipi ka awgin chu ahekhenthem tapouve. Ajeh chu mipi chu thong jejun a-aovun, aw gin kithong chu gamlatah-a akijan ahi.