Read Thado Chin Ezra 4 Bible Online

Ezra 4 - Thado Chin bible

Ezra 4

¹Tun Judah le Benjamin mite kidoupihon, gal hinga kikaihon Israel Pakai Pathen houin ding asauve ti ajahphat uvin;

² Amaho Zerubbabel leh pate lamkaiho henga ahungun, ajah uva, keihon nasah khompiu vinge; ajehchu nangho bol bangin, keihon jong na Pathen'u kahol ui; chule hichan geija eihinpui toupao Assyria leng Esarhaddon nikho-a pat ama henga chu ganlhaina kana pehjiu ahi, atiuve.

³Ahivangin Zerubbabel le Jeshua chule Israel lah-a pate lamkai dangho chun ajah uvah hitin aseijun, Ka Pathen'u in kisahna-a hin nangho ima nakikum nadiu aumpoi; ahinla Persia leng Cyrus'in thu eipeh banguva keihotah in Israel Pathen in kasahpeh dingu ahi, atiuve.

⁴Chuphatnin chuche gama miho chun Judah mipi khut tha chu ahatmosah-un, a-insah-u chu asunohphah taove.

⁵Chule Persia leng Cyrus nikholai sungsele, Persia leng Darius vaihom chan geijin, athilgonnu sunoh dingin amaho dounan thumopthem ho athalah-un ahi.

⁶ Chule Ahasuerus leng vaipoh kipattil lamin, amahon Judah gamsungle Jerusalem'a chengho hehna lekha asunuve.

⁷Chule Artaxerxes nikho laijin Bishlam, Mithredath, Tabeel chule akiloipi dangho Persia leng Artaxerxes henga lekha ajih-un; chule lekhathot chu Syria paova kisun ahin, Syria paova kiledoh ahi.

⁸Vaipo pipui Rehum le danthu sunpa Shimshai'in Jerusalem douna-in Artaxerxes lengpa henga hitobanghin lekhathot asun lhonin:

⁹Chuin vaipo pipu Rehum, danthu sunpa Shimshai, chule akiloipi dangho: Dina mite, Apharsath mite, Tarpel mite, Apharsith mite, Archevite mite, Babylon mite, Susan mite, Dehavi mite, chule Elam mite,

¹⁰Chule ginle ja umtah Asnapper'in ahinpuidoh-a, chuche phat laija Samaria gamsung achensahho leh luigallam gamdanga cheng adang chengsen, hitihin asunun ahi.

¹¹Alekha thotnu chu hiche hi ahi: Artaxerxes lengpa henga, luigal langkhatna chengho leh adang dangho-a kon nalhacha tehon:

¹²Nangma-a kona Judah mi hungkitol dohho chu kahenguva Jerusalem'a ahungun, amahon baotamna le phaloutah khopi asauvin, abangho atungdoh-un, chule abulhochu asuto taove tihi lengpan anahe tan.

¹³Hiche khopihi akisah phatna, chule abangho akitundoh kitna ahile, amahon gam man, thilpoh man, lamlen man ho apehlou dingu ahitan, chule hitia chu lengho sum mun'a asuhset dingu ahi, tihi tun lengpan anahe tan.

¹⁴Ajehchu keiho leng inpia kona kivah kahi jalun, lengpa kijabol louna mu hi keiho dinga vet thada umtah ahin, hijeh-a chu keihon hiche thuhi lengpa kahin hetsah-u ahi.

¹⁵Napu napate thuchin lekhabua chun kiholhen; chutile thuchin lekhabua kona chu, hiche khopihi kiphinna khopi, lengho le agamkaiho dinga kisuhkhah nathei, chule phat masa-a patna ana kiphin jing ahi jeh-a hiche khopi chu kisumanga anahi, ti namudoh-a nahetdoh ding ahi.

¹⁶Hiche khopihi akisahphat kitna, chule abang akitundoh kitleh, hichejeh-a hi hilam pang vadung gal sese-a hi nangman chanvou nanei louhel ding ahi, ti lengpa kahin hetsah-u ahi.

¹⁷Chuphatnin lengpan adonbutna alethot nin: Vaipo pipu Rehum le danthu sunpa Shimshai, chule Samaria'a cheng akiloikhompi dangho le vadung lama chengho henga chun, chamna umhen.

¹⁸Kahenguva nahin thotnu lekha chu, kamasanga kichentah-in akisim doh-e.

¹⁹Chule thu lhahna kapen, aki khol toh-in; hiche khopihi masanga patna lengho douna-a thunoh baotam boljing, asungah kiphinna le kiphin dinga mijollhahna ana umjing ahi, ti mudoh ahi.

²⁰Jerusalem'a hin leng thahat tahtah ana umin, amaho chu vadung gal gamjousea jong vai anahom uvin, chule amaho henga chun gam man, thilpoh man, lamlen man anapeuvin ahi.

²¹Tun hiche miho chun anatoh-u angahna diu le keiman thupeh dang kanei kit masangse-a khopi chu akisah kit louna dingin nanghon thu peuvin.

²²Hichehi boldoh louva aumlouna dingin tun nangho chingtheijun; ipidinga lengho setnading kiboldoh becheh ding ham?

²³Tun Artaxerxes lengpa lekhathot chu Rehum le danthu sunpa shimahai le akiloipiho masanga asimjouvun, kinotah in Jerusalem'a Judah te henga acheuvin, thuneitah le thahatsanin anatoh-u chu angahsah taove.

²⁴ Chuphatnin Jerusalem'a Pathen Houin kisa chu atang tan ahi. Hitichun Persia leng Darius vaihom kum ni lhinna geijin atangdel tan ahi.