Read Thado Chin Ezra 5 Bible Online

Ezra 5 - Thado Chin bible

Ezra 5

¹Chuchephat laichun Themgaoho, Haggai Themgao le Iddo chapa Zakariah'in, Judah le Jerusalem'a chengho Judah te henga Israel Pathen minin gaothu asei lhonin ahi.

² Chujouvin Shealtiel chapa Zerubbabel leh Jozadok chapa Jeshua chu Jerusalem'a Pathen in chu sadingin akipan lhontai. Amani chu Pathen Themgaoho toh ahiuvin, amaho chun akithopiuvin ahi.

³Hichephat laitah chun vadung hilamsang vaipopa Tatnai le Shetharbozenai, chule aloihotoh ahenguva ahungun, ajah uvah, hiche in sadingle abangho sajoudinga thu napeuvah koiham? tin ahung seijun ahi.

⁴Chuphatnin keihon ajah uvah hitin kasei taove, hiche in saho min chu ipiham? katiuve.

⁵Ahivangin Pathen mit chu Judah upaho chunga chun aumin, hiche thudol hi Darius leng heng alhun masangsen anatoh-u chu asutang theipouve. Chuphatnin hiche thudol hi lekhathot nin ahindonbut taove.

⁶Hiche hi Tattenai'in athot lekhathot chu ahi: Vadung hilamsang vaipopa Tatnai le Shetharbozenai le akiloipi Aphreachi mite, vadung hilam sanga umhon, leng Darius henga:

⁷Amahon ahenga lekha athotnun, asunga hitin akisune: Darius lengpa henga, lungmona jouse umhen.

⁸Keiho Judah gamsunga kacheuvin, Pathen in loupitah, song lenpipi-a akisah le abang thing lenpipi-a kigen, chule hiche natoh hi amachal lheh-a, akhut tah uva akhantouvu hi lengpan anahen ahi.

⁹Chuin keihon upaho henga chun, hiche in sading le abangho tungdoh dinga koijin thu napeh uham? tin kadongun ahi.

¹⁰Nangma henga alamkai hou min kichehtah-a kahin jih theina dingun, aminu jong kadongun ahi.

¹¹Amahon hitin eidon butnun, keihohi van le lei Pathen lhacha kahiuvin, kum tamtah masanga anakisa, Israelte leng loupi khatnin anasahdohsa in chu kasah-u ahi, atiuve.

¹² Ahinla kapu kapa teovin van Pathen chu ana sulunghangun, Aman Chaldea mi Babylon lengpa Nebuchadnezzar khutna amaho anapen, aman hiche in hi anasusen, miho chu Babylon gama anapuimang tan ahi.

¹³ Ahivangin Babylon leng Cyrus lengchan akum khat na-in, leng Cyrus hin hiche Pathen in sah ding thupeh anapen ahi.

¹⁴Chule Jerusalem'a um Pathen houin'a kon, sanale dangka-a kisem khonle bel jouse, Nebuchadnezzar'in analahdoh-a Babylon houin'a apohlut chengse chu, leng Cyrus chun Babylon houin'a konin aladoh kitnin, mikhat amin Sheshbazzar gam vaipo-a apansahpa henga chun apedohtan;

¹⁵Chule ahenga, hiche kong leh bel hohi lanlang, chen, Jerusalem'a um houin'a polutnin, Pathen houin chu akisahna ngaima-a kisa hen, ati.

¹⁶Chuphatnin Sheshbazzar chu ahungin, Jerusalem'a um Pathen houin sahnading khombul chu atungdoh-in, chule hichea patna chu tuni geija kisa jing ahin, chule tuchan hin akisajou hihlaije.

¹⁷Hichejeh chun tun lengpan pha asahlam ahile, Jerusalem'a hiche Pathen in kisahna dinga leng Cyrus'in thutanlhah apehmong hinam ti hetdoh nadin, Babylon'a um lengpa goukholna in chu kikholtoh hen, chule hiche chungchang thudolla hin lengpan alungdeilam eihin hetsah taohen.