Read Thado Chin Ezra 6 Bible Online

Ezra 6 - Thado Chin bible

Ezra 6

¹Chuphatnin lengpa Darius chun thupeh apen, Babylon'a goukholna, thusimlui jouse kikoina in chu akhol toh uvin ahi.

²Hichea hin Media gamkai, Achmetha khopi leng inpia lekhabujol amuvin, chule hiche sunga chun hitihin akisunin ahi.

³Leng Cyrus lengchan kumkhat alhin kum-in, hiche Cyrus lengpa hin Jerusalem'a Pathen houin thudola chun hitihin thupeh apei; ganlhai thilto aboljinao in chu kisapha hen, chule akhombul chu dettah-in kiphut hen, asanlam chu tong somgup, chule availam jong tong somgup hihen;

⁴Songtum len tahtah golthum min kigol hen, chule thingpeh thah gol khatnin kigol hen, chule akimang jouse chu leng ina kona kipeding ahi.

⁵Chule Pathen in'a kon sana le dangka-a kisem khonle lheng jouse, leng Nabuchadnezzar in Jerusalem houin'a kona alahdoh-a Babylon lama anapohho chu, kilepehkit henlang Jerusalem houin'a chun kipolutkit hen, chule Pathen in'a akikoina muncheh-a kikoi kit hen.

⁶Hijeh chun tun vadung gal lama gam vaipo Tatnai, Shetharbozenai le vadung gal lama um naloiho Apharsach mite chu, chukoma konchun ana kikhindalun.

⁷Hiche Pathen in kisahi limsah hih-un, Judah te gam vaipopa leh Judah upaho chengsen hiche Pathen houin hi amun mama-a saohen.

⁸Chukalvallin hiche Pathen in kasahna dinga, Judah upaho chunga ipi naboldingu thupeh kapeh nahiuve; amaho natoh atanlouna diuva lengpa thilholeh vadung lama kaiho chu, hiche miho hin amanchah diuva pehding ahi.

⁹Chule van Pathen dinga govam thilto ding angaichat jouseu, bongchal golho, kelngoichalho, kelngoinou ho, suhlou chang, chi, lengpitwi le thao ho chu Jerusalem'a thempu hon angaichat khoh dungjuijuva aniseh-a amaho thonlouva napeh teitei dingu ahi.

¹⁰Chutileh van Pathen henga namtui tahtah-a ganlhaina aneitheijuva, chule lengpa le achate hinkho dinga ataopeh theidingu ahi.

¹¹Hiche thupeh jonghi kapeh ahi: koihile hiche thuhi akhela aumle, a-in lhungpi kiloilha hen, chule hichu kiphut hen, achunga chun kikhailih hen; chule a-in chu eh notnan kineihen.

¹²Chule chemuna amin umsah Pathen chun, Jerusalem'a Pathen in suhsetgo-a, chule hiche thu kheldoh ding go-a khut lama chu lengho hihen, mipi ho hijongleh suhmang hihen, keima Darius in thu kapeh ahi; gangtah in kitongdoh hen.

¹³Chujouvin Darius lengpan thu ahinthot dungjuijin, vadung hilamsanga vaipo Tatnai le Shetharbozenai chule aloihon gangtah in aboltauve.

¹⁴ Chule Judah upaho chun asaovin, Haggai themgao le Iddo chapa Zekeriah gaothusei vangin amachallheh jenguvin ahi. Hitichun Israel Pathen thupeh dungjuile, Persia leng Cyrus, Darius, chule Artaxerxes thupeh dungjuijin asauvin, ajoutaovin ahi.

¹⁵Chuin hiche in chu Darius alengchan kumgup lhinna, Adar lha nithum channin ajou taove.

¹⁶Chuin Israel chate, thempuho, Levi ho, chule sohchang chate danghon, hiche Pathen in thensona chu kipahtah-in amangun,

¹⁷Hiche Pathen houin thenso na-a hin, bongchal jakhat, kelngoichal jani, kelngoinou jali, chule Israel pumpidin chonset thilpeh-a dingin Israel phungjat dungjuijin kelchal somleni apeuvin ahi.

¹⁸Mosi lekhabua kisun dungjuijin, Jerusalem'a Pathen kin bolna dingin thempuho chu aloiloijin chule Levi ho chu agolgolin ahomkhenun ahi.

¹⁹ Chule lha masapen nisomle nili lhinin, gal hinga kikai chaten kalchuh kut amangun ahi.

²⁰Ajehchu thempuho le Levi ho chu akisutheng khomun, abonchauvun atheng taovin, chuin sohchang chate jouse dingle asopiteu thempuho chule amaho ding ngeijin kalchuh kut satha aboltauve.

²¹Chule Israel chate gal hinga kikai hungkilekit hole, Pakai Israel Pathen holdinga chuche gama Pathen helou thenlouna-a kona kikangse jouse chun aneuvin ahi.

²²Chutichun cholsolou changlhah kut chu thanom tah-in nisagi amanguve. Ajehchu Pakaiyin amaho chu akipasah in, Pathen, Israel Pathen insahna-a akhuthou hatsah dingin, Assyria lengpa lungthim chu amaho lam angatsah-in ahi.