Read Thado Chin Ezra 7 Bible Online

Ezra 7 - Thado Chin bible

Ezra 7

¹Tun hicheng nunghin Persia leng Artaxerxes alengchan laijin, Ezra: amachu Seraish chapa, Azariah chapa, Hilkiah chapa,

²Shallum chapa, Zadok chapa, Ahitub chapa,

³Amariah chapa, Azariah chapa, Meraioth chapa,

⁴Zerahiah chapa, Uzzi chapa, Bukki chapa,

⁵Abishua chapa, Phinehas chapa, Eleazar chapa, thempu chungnung Aaron chapa ahi.

⁶Hiche Ezra hi Babylon'a kon achetouvin, chule Pakai Israel Pathen'in apeh Mosi danthu sunthem tah ahin, Pakai a-Pathen khutchu achunga aumjeh-in angeh chanchu lengpan apejingin ahi.

⁷Chule leng Artaxerxes alengchan kum sagi alhinnin, Israel chate phabep, thempuho, Levi ho, Lasaho, kotngah ho, chule Nethinim ho Jerusalem'a agache touvun ahi.

⁸Chule lengpa lengchan kal kum sagina, alha ngana-a chun Ezra Jerusalem ahung lhungin ahi.

⁹Ajehchu lha masapen nikho masapen ni-a Babylon'a kona hung kipatdoh ahin, a-Pathen khutchu achunga aum dungjuijin alha chaina nikho masapen nin Jerusalem ahung lhungin ahi.

¹⁰Ijeh inem itileh Ezra chu Pakai dan thupeh ho chu hol ding le tongdoh dinga, chule tepna dan kisun hole thutanlhahna chu Israel lah-a hildingin, alunggila akigo chaisa ahitai.

¹¹Tun, leng Artaxerxes in Ezra thempu, danthu sun, Pakaiyin Israelte apeh dan thupeh ho le danthu kisunho hethempa, henga apeh lekhathot chu hichehi ahi.

¹²Lengho leng Artaxerxes Ezra thempu, van Pathen danthusunpa henga: lungmona chamkim tu le khonungin umjinghen.

¹³Kaleng gamsunga Israel mipi jouse, thempuho le, Levi ho, Jerusalem'a chetou nom jouse chu nangma toh kilhondin thu kalhuhsahtai.

¹⁴Nakhutna um Pathen dan dungjuija, Judah gam le Jerusalem chungchang thudol kholtoh dinga lengpa le athumop mi sagihon nangmatah nasolu ahin;

¹⁵Chule Jerusalem'a cheng Israel Pathen henga, lengpa le athumop hon achamtah uva atou, sanale dangka thah dinga;

¹⁶Chule Babylon gamkai jouse sana le dangka namu jousetoh, Jerusalem'a Pathen in dinga kiphal tah-a mipi hole thempuhon atodoh-u, lungcham thilpeh hojong thah dinga kisol nahi:

¹⁷Chutia chu nangman hiche suma chu bongchalho, kelngoichalho, kelngoinou ho, anneh thilto hole donthei theilto ho chu gangtah-a nachoh-a, Jerusalem'a um na Pathen houin maichama chu natoding ahi.

¹⁸Chule sanale dangka amoh chengse chu nangma le nasopi hon naphatsahna lam lamun, na Pathen lungdeilamin mangtaovin.

¹⁹Na Pathen in'a akinbolna dinga nakipe kong leh bel hojong, Jerusalem'a Pathen angsunga napehlut ding ahi.

²⁰Chule na Pathen in'a dinga akhohna chana pehding aum nahlaileh, lengpa nei khol khomna in'a kona napehding ahi.

²¹Chule keima Artaxerxes leng keimatah-in, vadung gal lama um neiching ho jouse henga; ipi hijongle Ezra thempu, van Pathen danthu sunpan naheng uva athumchan chu gangtah-a nabolpeh dingu ahi, tin thulhah kaneijin ahi.

²²Dangka talent jakhat, suhlou chang tena jakhat, lengpitwi atena jakhat, thao atena jakhat, chule chi ijatmong ti umlouva napeh dingu ahi.

²³Van Pathen thupeh chanchu, van Pathen in dinga thanom tah-a pehding ahi. Ajeh chu ipidinga lunghanna chu lengpa le achapate lenggam douna-a umding ham?

²⁴Chujongle thempuho, Levi ho, tumginga lasaho, kotngah ho, Nethinim ho, ahiloule Pathen in'a lhachaho chunga thilpohman kai, ahiloule thilho kai lah hi danto kitohlou ahi, ti kahin hetsah nahiuve.

²⁵Chule Ezra nangman, nakhutna Pathen chihna nanei dungjuija, vadung gala mipi jouse thutan dinga, na Pathen dan heho lah-a kona thutan dingle vaihom ding nalhen ding, chule ahelouho chu nahil ding ahi.

²⁶Koihile na Pathen danle lengpa dan joplou chu: thading ham, nodoh dingham, ahiloule athilkeo lahpeh dingham, songkul'a khumding ham, gangtah-a dan dungjuija athu-u tanding ahi.

²⁷Jerusalem khopi'a Pakai in jephoina dinga lengpa lungsunga hitobang lunggel khumpeh-a ipu ipateu Pakai Pathen chu nunnom hen.

²⁸Chule aman lengpa le athumopho, chule lengpa pipui loupitahho masanga hepina eina pejingin ahi. Chule Pakai ka Pathen khut kachunga aumjeh-in keima katha ahatdoh-in, Israel lah-a konin mithupiho keima kilhontoupi din kakhomkhomin ahi.