Read Thado Chin Ezra 8 Bible Online

Ezra 8 - Thado Chin bible

Ezra 8

¹Hichehohi leng Artaxerxes vaihom laija Babylon'a kona keitoh hung kilhontou aphung sunga upa chengse phunggui chu ahi.

²Phinehas chapate lah-a Gershom, Ithamar chapate lah-a Daniel, David chapate lah-a Hattush.

³Shecaniah chapate, Parosh chapate, Zekeriah chapate chule amatoh phunggui kisimna-a pasal jakhatle somnga alhinguve.

⁴Pahath-moab chapate, Zerahiah chapa Elihoenai ahin, chule amatoh jani ahiuve.

⁵Shecaniah chapate, Jahaziel chapa chule amatoh pasal jathum ahiuve.

⁶Adin chapate, Jonatham chapa Ebed chule amatoh pasal somnga ahiuve.

⁷Chule Elam chapate, Athaliah chapa Jeshaiah chule amatoh pasal somsagi ahiuve.

⁸Shephatiah chapate, Michael chapa Zebadiah chule amatoh pasal somget ahiuve.

⁹Joab chapate, Jehiel chapa Obadiah chule amatoh pasal jani leh somleget ahiuve.

¹⁰Chule Shelomith chapate, Josiphiah chapa chule amatoh pasal jakhatle somgup ahiuve.

¹¹Chule Bebai chapate, Bebai chapa Zekeriah ahin chule amatoh pasal somni le get ahiuve.

¹²Chule Azgad chapate, Hakkatan chapa Johanan chule amatoh pasal jakhatle som ahiuve.

¹³Chule Adonikam chapate anunung lamho lah-a, aminho chu Eliphelet, Jeiel, Shemaiah, chule amatoh pasal somgup ahiuve.

¹⁴Bigvai chapate jong Uthai le Zabbud chule amatoh pasal somsagi ahiuve.

¹⁵Chule amaho chu keiman Ahava luidunglen lama long vadunga chun kakhom khomin, chule hiche mun'a chun pon in'a nithum kaumun, chule mihole thempuho chu kagahven ahile Levi chapate khatcha jong kamupoi.

¹⁶Chuphatnin mithupiho, Eliezer, Ariel, Shemaiah, Elnathan, Jarib, Elnathan, Nathan, Zekeriah, Meshullam koudin mi kasolin; chule hetkhenna nei Joirib le Elnathan jong kakouvin ahi.

¹⁷Chule keiman amaho chu Kasiphia mun'a lamkai Iddo henga thupeh pumin kasollin, chule ka Pathen in'a lhachading kahenguva ahinpuina dingun Kasiphia mun'a um Iddo le asopipa Nithinim jah-a ipi aseidingu kaseipeh-in ahi.

¹⁸Chule ka Pathen khut phatah kachunguva aumjeh-in, milung chingtah khat: Mahli chapate lah-a, Levi chapate lah-a, Israel chapate lah-a kon Sherabiah kitipa chu achapate le asopite somleget toh kahenguva ahinpuijun ahi;

¹⁹Chule Hashabiah, amatoh Merari chapate Jeshaiah, asopite leh achapate toh somni ahiuvin,

²⁰Chujongle David le pipuhon Levi ho kin boldinga anapansah-u, Nethinim lah-a Nethinim mi jani leh somni ahiuvin, amahohi amincheh-a kiphongdoh ahiuve.

²¹Chuphatnin Ahava vadunglen'a chun, ka Pathen'u anga keihole keiho kaki gimbol uve, ama-a kona lamdih kamutheina dingun, keiho dingle kacha tediu chule kathilnei jouseu diuvin, an ngolding thu kaphongin ahi.

²²Ijeh inem itile sepai honkhat, chule sakol sepaiho lamkah-a melma ho-a kona eikithopi diu lengpa henga thumding chu kajah achai. Ajehchu keihon lengpa henga, ka Pathen'u khutchu ama holho jouse chunga aphatna diuvin aumjin, ahinla ama nungsun ho jouse chunga athahatna le alunghana chujia ahi, tia kanaseiju ahi.

²³Hitichun hiche dingin an kangol taovin, ka Pathen'u henga kathum un, eijahpeh-un ahi.

²⁴Chuin thempuho lah-a lamkai somleni, Sherabiah, Hashebiah, chule asopiho somtoh kasep khentan ahi.

²⁵Chule lengpa le athumopho, a-pakai ho, chule chua Israel aum jousen anato doh-u sanale dangka, umle bel, ka Pathen'u in'a thilpehho jengjong chu amaho katedoh pehtan:

²⁶Keiman dangka talent jaguple somnga, dangka umle bel talent jakhat, chule sana talent jakhat,

²⁷Chujongle sana twikong somni, dram sangkhat, chule sana tobanga lu sumsantheng bel ni, akhutnuva katedoh in ahi.

²⁸Chule ajah uvah nangho Pakai dinga atheng nahiuvin, umle bel hojong atheng ahin, chule sanale dangka hohi napu napateu Pakai Pathen henga lungcham thilto ahi.

²⁹Jerusalem'a Pakai indan ho-a, thempuho le Levi ho lamkai, chule Israel pateho lamkaiho angsunga hicheho hi natedoh masang seuvin, vetupmun lang chingphaovin.

³⁰Hitichun thempuho leh Levi hon todohsa dangkale sana chule um le bel ho chu, Jerusalem'a ka Pathen'u in'a pohdingin alataovin ahi.

³¹Chujouvin lhasomle lhani na nimasanin, Ahava vadunglen'a konin Jerusalem'a chedin kakipan taove. Chule ka Pathen'u khutchu kachunguva aumin, lampi dunga eichanglhi ho leh melmaho khutna konin eihuhdoh uve.

³²Chule Jerusalem'a kahungun, chule hia chun nithum kanichong taove.

³³Tun anili channin, dangka le sana chule umle bel ho chu ka Pathen'u in'a thempu Uriah chapa Meremoth khutna katedoh taovin; chule amato chun Phinehas chapa Eleazer aumin, chule amanitoh Levi mi Jeshua chapa Jozabad le Binnui chapa Naodiah aumin ahi.

³⁴Thil jouse chu simsoh keile tesohkei ahin; chule akite jouse chu hiche petchun akisunlut sohkeije.

³⁵Chujongle anakikai manga sohchana-a kona hungkilekit chatehon, Israel Pathen henga bongchal somleni, kelngoichal somko le gup, kelngoinou somsagi le sagi, govam thilto din, chule kelchal somleni chonset thiltodin atoh uve. Hicheho jousehi Pakai henga govam thilto ahi.

³⁶Chuin amahon lengpa thalheng ho, chule vadunglen hilam sanga gam vaipoho henga, lengpa thutanlhah hochu apedoh taove. Chule amahon mipileh Pathen houna in chu akithopi jomjing taovin ahi.