Read Thado Chin Ezra 9 Bible Online

Ezra 9 - Thado Chin bible

Ezra 9

¹Tun hiti thil jouse akitoh chai phatnin, milenho chu eikimuto pidingin ahunguvin, kajah-a; Israel mite, thempuho, chule Levi ho chense chu, hiche gama cheng Canaan mite, Hit mite, Perizz mite, Jebus mite, Ammon mite, Moab mite, Egypt mite chule Amor mite thilbol thet umtah tahho-a konin amaho le amaho akikangse pouve, tin aseijun ahi.

²Ajehchu amahon achanu teu chu achapateu jidingle, amaho jidin akipuijun; hitichun muchi theng chu amaho le amaho agam miho toh akihalsoh taovin, hiche suhkhelna chu lengho le vaihomho khut ahahi dehsetne.

³Hiche thilsoh kajah apat hin, kavon holeh kaponsil kabot telin, kasam le kakhamul kabot doh-in, kidang satah-in katou lhatai.

⁴Sohchanga kikaiho thil suhkhel jeh-a Israel Pathen thua ati kithingleu hochu kahenglama ahung khomun; chuin nilhah lam ganlhaiphat channin kidang satah-in katoutai.

⁵Chule nilhah lam ganlhai phatnin lungkham tah-a katouna-a konin kathoudoh-in, kavonle kapon kabokeh tolhonin kaboh khupmin, chule Pakai ka Pathen lama kakhut kajah-in,

⁶Chule hitin kati, Vo Ka Pathen, nahenglam hinngat dinghi kajah achan kamaimoh lheh jenge, vo Pathen; ajehchu kachonset naohin kaluvumu achup jengin, chule kasuhkhel naohi van chan phahelin akitungdoh-e.

⁷Kapu kapateu nikho laija pat tuni chanin suhkhelna lentah kanei jingun; kakhan gitlou jeh-un keiho, kalengteo, chule kathempu hou gamsunga lengho khutna, chemjam'a, sohchang dinga, chomgam dinga, jumle ja thoh dinga, tunia banga hi eikipedoh-u ahi.

⁸Chule tunvang ka Pathen'un kamit hou ahadohsah theina dingle, soh-a kaum naova kona halna neokhat eipeh theina diule, asohcha amoh themkhat beh kaum theina dingun, chule amunthenga eiumsah theina dingun, Pakai ka Pathen'un chom khatbeh lungsetna eimusah nalaiju hen.

⁹Ajehchu keihohi soh kihen kahibouvun, ahijeng vangin ka Pathen'un kakihen naova eidalha pouvin, ahivangin keiho halna peh kit dingle, Pathen in tungdoh ding, chule aselaiho sempha dingle, Judah gamle Jerusalem'a kulbang sempha dingin, Persia lengte mitmu-a hepina eimusah-un ahi.

¹⁰Chule Vo ka Pathen, tu-a keihon hicheho jouse nunga ipi kasei dingu hitam? keihon nathupeh ho kanung ngatsan taovin,

¹¹Nalhacha themgaoho mangcha-a, hitia nanasei, nagalo dingu gam chu, agama chengho thenlounale, thil kidah umtah abolhouva kona bohtin bohtanga among langkhat napat among langkhat geija asuhboh-u, gam thenglou ahi.

¹² Hijeh chun tun nathahat na dingule, gamsunga anpha naneh nadingu, chule nachateo gou ding nadalhah peh theina dingun: nanghon nachanuteu chu achapateu pedoh hih-un, chule achanuteu chu nachapateo dingin puipeh hih-un, chuleh a-imatih chanin amaho-a konin chamna le neile gou hol hih-un.

¹³Chule ka-eng khan jeh-uleh, kasuhkhel nau jeh-a, kachung uva hitobang thil ahunglhun nungin jong, nang ka Pathen'un kakhan gitlounau jeh-a kathoh dingu sanga lhomjo-a gotna neipeh uva, hitobang tah hin neihoidoh nahlai jeh-un:

¹⁴Neithupeh hou chu kasuhkehkit uva, chule hiche thet umtah miho hi kaki guijoppi kit dingu ham? Ahoidoh-a le ajamdoh-a beihela neisuh mang kahseuva, kachunguva nalunghang lou ding ham?

¹⁵Vo Israelte Pakai Pathen, nangma chonphatah nahi; ajehchu keiho tunikho-a banghin kahoidoh nalaijun ahi. Ven kasuh khelnao pumin namasanga kaum uve; ajehchu hiteho jeh-a hi nama sanga dingthei lou kahiuve.