Read Thado Chin NEHEMIAH 13 Bible Online

NEHEMIAH 13 - Thado Chin bible

NEHEMIAH 13

¹ Hiche nikho chun mipi hetdin Mosi lekhabu asimun, chule chuachun Ammon miteleh Moab mite chu Pathen houkhom ho lah-a a-itih-a pangthei loudiu ahi tia kisun asimdoh uve.

² Ajehchu amahon Israel chate chu changlhah leh twisih-in analamto pouvin, ahinla amaho douna-a gaosapdin Balaam athalah-un ahijeng vangin ka Pathen'un gaosapna chu phattheina in aheidoh tai.

³Tun ahitin ahi, amahon danthupeh chu ajah phatnun, Israel te-a konin mipi choplopho jouse chu asepkhen taovin ahi.

⁴Chule hiche masanghin, ka Pathen'u indan sungnung vetupjing, Eliaship thempupa chu Tobiah toh akithujop lhonin,

⁵Chule Levi ho, lasaho chule kotngah ho peh dinga kithu lhahna thao, lengpitwi thah, mimle chang hopsom ho, um le bel, begole nehding thilpehho, chule thempuho dinga thiltoho, tumasanga anakoinau indan lentah chu amadin agonpeh-in ahi.

⁶Ahinla hiche phatlai hin keima Jerusalem'a kana umpoi. Babylon leng Artaxerxes kum somthumle kum ni alengchan kum-in lengpa henga kachen, chule ni ijat-ham jouvin lengpa-a konin phalna kamun ahi.

⁷Chuin Jerusalem'a kahungin, chule Pathen in hongsung ho-a amadinga indan khat agonpeh-a, Eliashib min Tobiah'a dinga thildih lou abolchu kahechen tan ahi.

⁸Chule hichun eisulungna behsetnin, hijeh chun keiman indan sunga konin Tobiah insang thilkeu jouse chu kapaidoh tan ahi.

⁹Chuin gihna thu kapen, amahon indan chu asutheng taove. Chule keiman hia chun Pathen in'a um le bel holeh anneh thiltoho chule bego chu kahinpolut kit tai.

¹⁰ Chuin keiman Levi ho chandingdol hochu akipe pouve ti kahedohtan ahi. Hijeh chun Levi ho le lasaloi chu ama ama honlam cheh-a anajamtaovin ahi.

¹¹Chujouvin keiman vaihomho chu kanelkalin, ipidinga Pathen in hi kimoh dalhahthip jingaham? chuin amaho chu kakou khomin, ama ama panmun cheh-a kapansah kit tai.

¹² Chujouvin Judah jousen changle mim chule lengpitwi thah le thao hopsom chu thilkholna-a ahinpolut nun ahi.

¹³Chuin keiman thilkholna ho chunga thilkhol ding kasemin, Shelemiah thempu, danthusun Zadok, Levi ho le Pedaiah, chule amaho bana chu Mattaniah chapa, Zaccur chapa Hanan ahi. Ajehchu amaho chu tahsan detna kisima, chule amaho natohna munchu asopiteu kihoppeh ding ahi.

¹⁴Vo, ka Pathen hiche chungchanga hin neihe jingin, chule ka Pathen in'a dingle hiche tohmun ho-a dinga thilpha kanabol hochu noimang hih-in.

¹⁵ Hichelai hin Judah gamsunga choldo nikho-a lengpiga achiluva, changphal ahinpoh uva, sangan apohsah-u, lengpitwi le lengpiga hihen, theichang ga hihen, pohgih tincheng apohsah uva, choldoni-a Jerusalem sunga ahinpoh lutjiu kamun ahi. Chuin hiche nikho-a nehle chah ajohjeh-un amaho dounan kaphoh sal-in, ahi.

¹⁶Hiche mun'a cheng Tyre mihojong chun, nga leh johthei thil namkim ahinpouvin, Judah le Jerusalem chate henga choldonin ahungjoh jiuvin ahi.

¹⁷Chujouvin keiman Judah milen milal hochu kanelkalin, ajah uvah, ipidinga hitobang thilphalou nabol uva, choldoni hi asuhboh-u ham? kati.

¹⁸Napateu vin hitobanghi anaboluva, i Pathen'un hiche thilphalou jousehi eihole hiche khopi chunga analhunsah hilou? hijongle choldoni nasuhboh naova konin Israel chunga lunghanna nahin pohlutbe nalaijun ahi.

¹⁹Chuin ahitin ahi, choldoni masanga Jerusalem kotpiho-a muthim ahungkipat jouseh le khachah-a, chule choldoni kichai kahse-a honlouna dingin gihna thu kapen ahi. Chule choldoni-a thilpoh kiti apohlut louna dingun kasohho phabep khat kotpiho-a kakoijin ahi.

²⁰Hitichun akivei holeh thil jatchom chom joh hochu khatveiham? nivei ham? Jerusalem polama chun ageh khovah dentauve.

²¹Chujouvin, keiman amaho dounan kahettohsah-in, ajah uvah, ipidinga nanghohi kulbang vela geh nahiuvem? Hitobanga nabolkit ule, nachung uva khut kalhahding ahi, katipeh-e. Hichea patchun amahon choldonin ahungkit tapouve.

²²Chuin keiman Levi ho chu amaho akisuh thenguva, chule hunguva kotpiho chu anga uva, choldoni sutheng dingin thupeh kapen, ahi. O ka Pathen, hiche chungchanga jonghin neihejingin lang, nahepina lentah dungjuijin neihing hoijin.

²³ Hiche nikholai jong chun Judah mite chun, Ashdod mite, Ammon mite Moab miho ji-a aneiju kamun ahi.

²⁴Chule Judah te pao ahekhenthem pouvin, ahinla mipi ho pao dungjui cheh-in, achateu apaodoh tengule akeh khatnin Ashdod pao amangun, ahi.

²⁵Chule ken amaho chu kakinelpi, kasamsen, abang bangjong kadengin, asamu kabopeh-in, nachanu teochu achapa teodinga napehloudiu, ahiloule nachapateo dinga achanuteu napuipeh loudiu, nangho tah-in jong nabol loudiu ahi, tin Pathen'a kaki hahsel sah-in ahi.

²⁶ Israel leng Solomon jongchu hiche thil ho-a hi anachonsea hilouham? Pathen'in Israelte chunga Leng din anapansah-in, ama tobanga Pathen'in angailut lengdang namtin vaipi lah-a anaum khapoi: Hitajeng jongleh namdang numei hon amajeng jong chonsetnan alhahsah-un ahi.

²⁷Gamchom numei ho kichenpia ka Pathen douna-a suhkhel dinga, hiche thil phalouho boldinga nathu-u kangai dingu ham?

²⁸ Thempu chungnung Eliashib chapa Joiada chapate khat chu Horon mi Sanballat tupa ahin, hijeh chun keiman amahi keija konin kanomangtai.

²⁹Vo, ka Pathen amahohi hejing temin, ajehchu amahon themputna kin chule thempu hina-a kitepna le Levi kitepna asubohtauve.

³⁰Hitichun keiman gamdang mite akonin amaho kasuthengin, thempuho leh Levi dinga anatoh ding dolcheh-u leh anatoh ding danu kagot peh-in ahi.

³¹Akitepsa phatho-a thing toh dingle, aga masapen peding kagot toh peh-in ahi. Vo ka Pathen aphalam thila dingin nelheng jingin.